Zaburi 40 - KITABU KITAKATIFU

Lwimbu lwu kwizominya Nyasaye

¹ Ndaalindilira Yahova nuvwikuziri aduuki kongonya; maku yambuliriza kandi naahulira lianira liange.

² Yang'usa kutura mu vogo vwuvuhimwa kandi kutura mu vodohi vwe kedende. Yasingiriza ku lwanda mu mirembe; kandi nandinyiriza kusingira vudinyu.

³ Yanzigiza kwimba lwimbu luhia, lwimbu lwi lizominya ku Nyasaye wiitu. Avanyingi avalolaa yaga, valanyora lieganihiza, kandi vasuuvira, Yahova Nyasaye.

⁴ Vaveeye nuvugasu avandu vasuuviraa mu Yahova, avatagirung'anaa nu kusigamira misambwa, kandi siviyungaa ku yavo avasigamiraa avanyasaye vuvugadi mba.

⁵ O, Yahova Nyasaye wiitu, Ivi wamala kongolera vindu viokogenyia vinyingi; sihaveeyeho nu mulala kuli ivi mba! Viveeye vinyingi ligali ivitanyala kuvalizwa.

⁶ Ivi siwenya ivisiuviliru anoho ivihaanwa mba; siotevanga oheevwe zinyama ziukusambwa zing'ima ku vwali, anoho ivisiuviliru viukusamiha uvwoni. Mu vogono yivwo, wamba amatu kukuhulira.

⁷ Nandio, ndaativura, “Yee, mbeeye hano! Amigizu googo gang'odwa mu kitabu chi Lilaga.”

⁸ O, Nyasaye wange, Inzi nyanza kokora uvulariri vuvwo. Mbikaa malago googo mu mwoyo gwange.

⁹ O, Yahova, Mu livugana lia avandu vovo. Inzi ndaavavoolera amakuva malahi ndi ivi okohonyiaa. Ivi umanyi vulahi ndi sindalekela livoora amakuva go vohonyi yivwo mba.

¹⁰ Inzi sindaakunikira makuva go vohonyi vuvwo mu mwoyo gwange mba. Mali komoloma kazozo amakuva gu vusuuvirifu vuvwo kandi govokonyi vuvwo. Mu livugana lia vandu vovo, sindachiling'ana ku amakuva gi zimbavasi ziuvuyaanzi vuvwo vutaveeye ne keheri mba.

¹¹ O, Yahova, inzi manya ndi siulalekela kombeera zimbavasi mba, uvuyanzi vuvwo nu vusuuvirifu vuvwo, vilaniinda vulahi kazozo.

Lisaala liokoteeva ovokonyi (Zaburi 70)

¹² Uvudinyu vunyingi uvutanyala kuvalizwa vuungumbirizi! Uvwoni vwange vung'umiyi, kali sinyala kolola uwanziza kandi mba. Voveeye uvunyingi kuvita iliisu liu ku mutwi gwange; kandi mali kogotiza uvuluviliri mu mmwoyo gwange.

¹³ Yahova, uyaanze ombonyie! Ongonye kalunu!

¹⁴ Leka yavo venya kunzita, vaguutwi ligali kandi vagoyana. Leka yavo avayaanzaa kigira uvudinyu vwange, viranywe inyima kandi vaduuki mu zisoni.

¹⁵ Leka yavo avangoleraa kehenyahenye, vatiihizwi ligali ni liguutwa liavo!

¹⁶ Leka yavo vosi avaazaa ivi, vasangale kandi vayanze, leka yavo avaveeye nilisandiza kigira ovohonyi vuvwo vavoole kazozo, “Yahova aveeye munene ligali!”

¹⁷ O, Yahova, Inzi mbeeye mudedekere kandi mudaka, navuzwa ukikiri kunzivilira. Ivi oveeye muhonyi wange kandi Nyasaye wange, hamba vwangu ongonye!