Zaburi 39 - KITABU KITAKATIFU

Lieganira liu mundu oveeye mu vusaliri vwu vulwaye

¹ Inzi ndavoora, “Ndilinda mu zinzira ziange ziosi, kandi sindakola uvwoni kali hakuzu mba. Sindavoola kindu kali kilala imbiri wa vandu vadamanu mba.”

² Ndachiring'ana machiriri vugira kovora kindu; sindavoola kindu kali kilala kilahi mba! Navuzwa vusaliri vwange vwameedeka ligali;

³ kandi mwoyo gwange gwaaduka kuli muliru. Lwa ndazizagilira kuganagana, na uvusaaliri vwange vwameedeka ligali. Maku mu vusaliri vwange ndateeva,

⁴ “O, Yahova, Inzi ndamenya kuduuka ing'inga ki? Lidiku lie likuza liange lilava ing'inga ki? Mbolera ing'inga ye keheri chi livamwoyo liange.”

⁵ Ivi umali kwimbihiza livamwoyo liange. Madiku gi livamwoyo liange si galoleka kuva kindu imbiri woovo mba. Gaveeye agiligali ndi; vuli mundu aveeye vuzaa kuli umwika,

⁶ kandi aveeye vuzwa kuli chiriri. Viosi akolaa siviveeye kindu mba, avungiza uvutugi vwivwe, na siamanyi mundu ulivugula mba.

⁷ O, Yahova, navuzwa kalunu, lisuuvira liange liveeye ku ivi.

⁸ Ombonyie uvwoni vwange vwosi, kandi utaleka avasiru vasekerizi mba.

⁹ Inzi ndakiring'ana machiriri, kandi si ndavoora likuva kali lilala mba, kigira ni ivi wagira ninyoola vusaliri kuli yivu.

¹⁰ Utahaana amageri ku inzi kandi mba, kigira mbeeye ahimbi kukuza kuturana na amageri ga ombezaa.

¹¹ Ivi uhaanaa amageri ku vwoni vwu mundu ku ligondoka liilio. Kali ohenzeriza ligali uvulahi vwivwe nu kumudiviza, kuli izisere ziononyia viukulia muchage. Gaveeye gi ligali ndi, vuli mundu aveeye vuzwa kuli umwika.

¹² O, Yahova, yaanza uhulirizi ku lisaala liange, kandi hulira lianira liange; hamba ongonye lwa mbeeye ni lilira linyingi. Mbeeye vuzwa mugeni woovo ku ing'inga engekeeke, kuli avaguuga viitu vosi vaali.

¹³ O, Yahova, yaanza utulizi amageri googo ku inzi, ombe zinguru kandi vusangali vwi zimbavasi zizio imbiri wa ngikiri kukuza nu kwivililwa ligali.