Zaburi 38 - KITABU KITAKATIFU

Lisaala liu mundu oveeye mu vusaliri

¹ O, Yahova, mwaza utahaana amageri ku inzi mu vutima vuvwo mba! Kandi utanguya mu vutima vuvwo vululu mba.

² Ivi umali kundumita vululu ni mivano juvuta vuvwo. Kandi mukono gugwo umali kunduya vudamanu.

³ Muviri gwange gwosi guunzunaa kigira uvutima vuvwo. Kali vigumba viu muviri gwange viveeye mu vuzunu vonene; kigira uvwoni vwange.

⁴ Uvwoni vwange vunguniki kali kuduuka kumutwi gwange kuli musigo muliduhu, ugwa inzi ndakavuli kuginga.

⁵ Kigira uvusiru vwange, zingwagu ziange ziafunyaa vugundu kandi ziagundaa.

⁶ Uvuzunu voveeye vululu ligali kali vunzinaminyi hasi, siomaa lidiku liosi.

⁷ Iviungu viange visambaa, kali mbeeye ahimbi kukuza.

⁸ Zinguru ziange zifeye kandi mali kuduvulanywa ligali. Mwoyo gwange goveeye mu vudinyu nzoyaa nuvuzunu vululu ligali.

⁹ O, Yahova, ivi umanyi lienya liange liosi; uhuliraa likenya liange liosi.

¹⁰ Mwoyo gwange gukubaganaa vwangu, zinguru ziange zifeye; na zimoni ziange zizengeye.

¹¹ Avalina na vatende vange sivanyala kuuza ahimbi ninzi mba, kigira vatiiyi lifunya lie zingwagu ziange. Kali avinyumba yange vaasingiyi ihale kutura ku inzi.

¹² Yavo avenya kunzita vamali kotega mitego jaavo ku inzi, yavo avenya kusaliriza vatihiza ukundiviza ligali. Sivaleka kunganaganira uvudamanu mu vwivisu mba.

¹³ Mbeeye kuli mundu wahana amatu, na sinyala kuhulira mba; mbeeye kuli idimbidi, sinyala komoloma mba.

¹⁴ Mbeeye kuli mundu utaveeye na mativuli.

¹⁵ O, Yahova, kigira siahuliraa mba. Navuzwa inzi suuviraa mu ivi; na ivi Nyasaye wange ulandivulira.

¹⁶ Utaleka avasigu vange vasangaliri lidambizwa liange mba; utaleka vigingiri kigira ligwa hasi liange mba.

¹⁷ Mbeeye ahimbi kugwa kandi mbeeye mu vuzunu vuli ing'inga.

¹⁸ Nziyamaa uvwoni vwange, kandi mbereraa kuvwo.

¹⁹ Avasigu vange vaveeye avalamu kandi vizingulu, vaveeye avanyingi avandunyira vugira kivuni.

²⁰ Yavo avatungaa inzi uvudamanu ku uvulahi vwa mbakoleraa, vahing'ana niinzi kigira ngerizaa kokora amalungi.

²¹ O, Yahova Nyasaye wange, utaandeka mba kandi utava ihale kutura ku inzi mba!

²² O, Yahova, muhonyi wange, hamba vwangu ongonye!