Zaburi 36 - KITABU KITAKATIFU

Uvudamanu vwu mundu

¹ Avoni vaganagana uvudamanu musi mwi mioyo jaavo kazozo; vumulombaa avuli kuva ni liegehiza imbiri wa Nyasaye.

² Kigira mundu uyu aganagana aveeye munene kuvita avandi vosi, aganagana ndi Nyasaye sialamanya uvudamanu vwivwe nu kumukalagira mba.

³ Amakuva geege gaveeye amachamu kandi gu vugadi, siakolaa agovogeri mba, anoho amalahi mba.

⁴ Alombaa lilohiza liu uvudamanu lwa agonaa ku kidali chichie; ichakolaa choosi sikeveeye kilahi mba, navuzwa akolaa uvudamanu vuli kazozo.

Uvulahi vwa Nyasaye

⁵ O, Yahova, vuyanzi vuvwo vutaveeye nekeheri vuduuka mwigulu, na uvusuuvirifu vuvwo vuduuka ku malesi.

⁶ Uvulungi vuvwo voveeye igulu ligali kuli vigulu, likalaga liilio lirungi liveeye kuli ululiva lwi inyanza; ivi ulindaa avandu ni zinyama ziosi.

⁷ O, Nyasaye, vuyanzi vuvwo vutaveeye nekeheri voveeye vulahi ligali, ukingaa mu likingwa liilio, kuli engoko ikingaa viminyu mu zimbaha ziayo.

⁸ Kulizaa viukulia vilahi vinyingi via uhaanaa kuli mugera gwiturukaa. Kandi ivi olekaa kunwi kutura mu mugera gwu vulahi vuvwo.

⁹ Ivi uhaanaa livamwoyo litahera mba, oveeye uvutangiliru vwi livamwoyo liosi. Kigira uvulavu, vuvwo kololaa uvulavu.

¹⁰ O, Yahova, uzizagili komeeda zimbavasi ziu vuyanzi vuvwo ku avandu vamanyi ivi, kandi uhaane uvugasu ku vandu vaveeye avalungi.

¹¹ Utaleka avandu vu kwigingira vaanwane anoho avachamu vaangole nziruki.

¹² Henza aha vadamanu vagwiyi; Hene yaho vaagoni na sivalasingira kandi mba.