Zaburi 35 - KITABU KITAKATIFU

Lisaala liukwenya ovokonyi

¹ O, Yahova, uhiing'ane na yavo avahing'anaa ninzi, ulwaane yavo avalwaanaa ninzi!

² Uvuguli inguva ni viugi vivio ma uzi kongonya!

³ Uvuguli litimu nu ludanga lulwo! Na uungayiri yavo avanondeleraa! Usuuvirizi ndi ulambonyia!

⁴ Leka yavo avagerizaa kunzita vaguutwi kandi valeganywe! Leka yavo avaang'anaganira uvudamanu mu vwivisu viranywe inyima nukudandana!

⁵ O, Yahova, leka vave kuli mukuuzi guhuuzwa ni imbuza, nivakungwa ne engelosi!

⁶ Leka zinzira ziavo zive nikisundi kandi zindelere. Na engelosi woovo avakungaa!

⁷ Vategera inzi mutego muvwivisu vugira kivuni, kandi vayavaa ovogo vaduuki kung'umira.

⁸ Leka lidiva livagumiri vwangu nivakikiri kulimanya. Valagumirwa mu mutego gwaavo aveene. Leka nukudivira muvogo vwa vamali kuyava.

⁹ Hene yaho, ndasangara ku aga ivi Yahova umali kongolera! Ndayaanza kigira umali kombonyia.

¹⁰ Ndavolera Yahova nu mwoyo gwange gwosi, “Sihaveeye ho nu mundu mulala kuli ivi, O, Yahova! Ivi ukingaa avadedekere kutura ku yavo avizingulu, na avadaka kutura ku vadambizi.”

¹¹ Avaloli vadamanu valolekiza ku inzi, kandi vanzaala ku livunaga malago ga inzi ndamanyi.

¹² Vandungaa uvudamanu ku uvulahi vwange vwambakoleraa; na inzi mwene mwoyo gwange guukuzi.

¹³ Navuzwa lwa vaali avalwaye, inzi ndiviika zinguvu zia magunia kumanyia vovereri. Ndiisaaliriza ku lihonga lilia. Ndavasaalira ligali ninzinaminyi mutwi hasi,

¹⁴ kuli siomeraa mulina anoho amwavo wange, Ndaazia yiyi ni yiyi mu vovereri vwu mwoyo, kuli mundu usiomaa kigira likuza lia mama weve.

¹⁵ Navuzwa lwa ndaali mu vudinyu, vosi vaali nuvusangali ligali. Kandi vangumbiriza nokongolera kehenyahenye; avandu vageni vaanguya kandi nivazizagilira ukuunduya.

¹⁶ Kuli avandu vakolera mulema kihenyahenye, vaadiedieyiza amiinu mu lindunyira.

¹⁷ O, Yahova, ulahenza vuzwa kuduuka ng'inga ki? Ombonyie kutura ku lingilira liavo. Honyia livamwoyo liange kutura ku zisimba zinduru!

¹⁸ Maku ndakusandiza mu livugana lia avandu vovo. Ndakwizominya imbiri wavo vosi.

¹⁹ Utaleka avasigu valulu vange kusangalira liguutwa liange mba. Utaleka yavo avandunyira vugira kivuni vaangunukiri kigira liverera liange mba.

²⁰ Sivamoloma munzira indahi yuvulina mba; mu vogono yivwo, veelombelaa aveene zing'ano ziosi ziu vugadi ku avandu vayaanza mirembe.

²¹ Vanzaala, nivahanzuka nivavoora, “Kwalola icha wakola!”

²² O, Yahova, navuzwa ivi, umali kolola yaga. Kunangwa, utakiring'ana mba, utava ihale kutura ku inzi mba.

²³ O, Yahova, vuka, na osoore. O, Nyasaye wange, singira na unwanili.

²⁴ O, Yahavo, Ivi oveeye mulungi, kunangwa unandizi ndi mbeeye vugira uvwoni; utaleka avasigu vange vasangaliri liguutwa liange mba.

²⁵ Utaleka vevoolere aveene ndi, “Kalunu kumali konyoora cha kwenyaa, kumali kuvamala.”

²⁶ Leka yavo avasangalira uvusaliri vwange, vaguutwi ligali kandi vadandanywi. Leka yavo avevoora vaveeye avalahi kuvita inzi vaduuki mu lilegwa.

²⁷ Leka yavo avenyaa vaandole nimbohololeywi vahanzuki nuvusangali kandi vayaanzayaanze kazozo nokovoora, “Yahova aveeye munene ligali! Ayaanzizwa ni liguuta liu mutumikiri weve.”

²⁸ Maku ndalandiza uvulungi vuvwo kandi ndakwizominya umbasu gwosi.