Zaburi 33 - KITABU KITAKATIFU

Lwimbu lwu kwizominya Yahova

¹ O, munyi avaveeye valungi, musangare mu Yahova; mwizominye Yahova mwosi avamuhulira.

² Mwizominye Yahova nu vukana, mwimbi zinyimbu ziu kusandiza nu vukana vwi migoye likomi!

³ Mwimbiri Yahova lwimbu luhia, mukubi uvukana ni limanya linene, kandi munyaanze musangare!

⁴ Makuva ga Yahova gaveeye giligali, kandi miyinzi jije josi jiveeye misuuvirifu.

⁵ Yahova ayaanza uvulungi kandi likalaga lirungi. Lirova lizuuyi vuyanzi vwivwe uvutali ne keheri.

⁶ Yahova yalomba ligulu ku lilaga lilie: liuva, mweli kandi zing'ereng'ani ku likuva lilie lia yamoloma.

⁷ Yavungiza amazi gi zinyanza ziosi nagaviika havundu harara, avungiza zinyanza ziosi kuli mundu avungiza vuswage mu kedeera.

⁸ O, munyi avandu vosi ku lirova mutie Yahova, muhaane luyali kuye. O, munyi avandu vi lirova.

⁹ Lwa Yahova yamoloma likuva, lirova lialombwa. Ku lilaga lilie, vindu viosi vialoleka.

¹⁰ Yahova yononyiaa zing'anagani zia avizihiiri valohiza kokora. Avakolaa vavuli kuduukiza lilohiza liavo.

¹¹ Navuzwa lilohiza lie zing'anagani zia Yahova zihindiraa mihiga ni mihiga. Zing'anagani zizie zimenya mihiga ni mihiga.

¹² Vaveeye nu vugasu avandu va Nyasaye wavo aveeye Yahova. Vaveeye nu vugasu avandu va yatovola kuva aveeve umwene.

¹³ Yahova aheenzaa hasi kutura mwigulu; kandi alolaa avandu vosi.

¹⁴ Ahenzaa avandu vosi vu mulirova, kutura kondeve yeeye yu vwami mwigulu.

¹⁵ Alombaa zing'anagani ziosi mu mwoyo gwa vuli mundu, kandi amanya vindu viosi via vakora.

¹⁶ Mwami sianyala kuguuta mu vulwani kigira iliihi lilie lie zinguru mba, musikari sianyala kuguuta avasigu veve kigira zinguru zizie mba.

¹⁷ Zibarasi ziu vulwani sizinyala koleta vuguuti mu vulwani mba. Zinguru zia zio zinene sizinyala kohonyia mba.

¹⁸ Yahova aheenzaa yavo avamutiizaa, kandi yavo avasuuviraa mu vuyanzi vwivwe uvutali ne keheri.

¹⁹ Yahova ahonyia avandu veve kutura mu likuza, avakolaa kuva mwoyo mu ing'inga yinzara.

²⁰ Kwasuuvira Yahova ni mioyo jietu josi, aveeye likingwa lietu kandi vokonyi vwetu.

²¹ O, Yahova, kusangara mu ivi, kigira kusuuviraa mu lieta liilio litakatifu.

²² Yaanza okohe vuyanzi vuvwo vutaveeye ne keheri mba, kuli kusuuvira mu ivi.