Zaburi 32 - KITABU KITAKATIFU

Lieganira kandi lisamiifwa

¹ Aveeye nu vugasu oyo wa mahiolo geege gasamiihiywi, kandi wu vwoni vwivwe vutuliziywi ho.

² Aveeye nu vugasu mundu wa Yahova avulaa kuvaliza uvuchamu kuye, kandi utaveeye nu vugadi mu mwoyo gwigwe.

³ Lwa ndaavura kwiyama uvwoni vwange, ndaluha ligali kigira likenya liange lie lidiku liosi.

⁴ Yahova, ivi wahaana amageri ku inzi umbasu nu vudiku vwosi zinguru ziange ziafwa ligali, kuli mbasu mululu gukaminyaa amazi.

⁵ Maku, ndiyama uvwoni vwange vwosi ku ivi, na sindavisa mahiolo aange mba. Ndavoora, “Ndiganira uvwoni vwange ku Yahova; na ivi wasamiiha uvwoni vwange vwosi.”

⁶ Kunangwa, avandu vovo avasuuvirifu vosi kuduuka vasaale ku ivi mu ing'inga ya vaveeye mu vudinyu; lwu vudinyu vunyingi kuli amazi gi migelera gaaza zimbiru kuvamira, sigaladuuka kuvo mba.

⁷ O, Yahova Ivi oveeye havundu hange hu kwivisa, ulambonyia kutura mu vudinyu vwange vwosi. Ndimba vudinyu zinyimbu ziu kwizominya ovohonyi vuvwo kigira ukingaa inzi.

⁸ Yahova ovola, “Ndakwigiza zinzira zia uziira ku; kandi ndakwidera nu kukuha zing'anagani.

⁹ Utava musiru kuli ibarasi anoho sukiri mba, iziamiifwa ni lijamu kandi olokova mu minwa jazio kuzikola zihuliri amalago nukumanya uwazienyekaa zizie.”

¹⁰ Avandu vachamu vosi valava ni lisalira linene ligali, navuzwa yavo avaasuuvira mu Yahova, vakingwa nu vuyanzi vwivwe vutaveeye ne keheri.

¹¹ Munyi avaveeye avalungi, muyanze nukusangara, kigira aga Yahova amali kumukolera. Munyi avahulira Yahova, musangare ligali.