Zaburi 30 - KITABU KITAKATIFU

Lisaala lie lisandiza

¹ O, Yahova, nzizominyaa ivi, kigira umali kombonyia; na sioleki avasigu vange vasangaliri kivi chiange mba.

² O, Yahova, Nyasaye wange ndaanira ku ivi ongonye, kandi wambonyia mu vulwaye.

³ O, Yahova, ivi umali kombonyia kutura mu kihadisi; umali kunziranyira livamwoyo kandi umali kunduliza hagati ha yavo avaziizaa mu kilindwa.

⁴ Mwimbiri Yahova zinyimbu zie lizominywa, O, munyi mwosi avasuuvirifu veve; mwizurizi aga uyu Mutakatifu amali kokora na mumusandize!

⁵ Uvutima vwivwe voveeye vuzwa ku ing'inga ngekeeke. Navuzwa uvulahi vwivwe vuhindiraa mihiga ni mihiga. Amaliga ganyala kwidoroka mu vudiku, navuzwa uvusangari vuuzaa mugamba.

⁶ Lwa ndagasizwa ndaavoora, “Sindaguutwa kandi mba!”

⁷ Ivi, O, Yahova, waali mulahi ku inzi; ivi waakinga inzi kuli imbinga yu kukigulu. Navuzwa wamanya niwiivisa umwene kutura ku inzi, na inzi ndaali nuvuti ligali.

⁸ O, Yahova, Inzi ndaanira ku ivi; ndakusaala ongonye.

⁹ Ulanyora vukala ki kutura kulikuza liange. Ni vukala ki vwa onyoora kutura ku liitwa liange. Avandu vaakuza vaveeye avanyala kukwizominya? Vaveeye avanyala kulandiza uvulahi vuvwo vutali ne keheri?

¹⁰ O, Yahova, umbuliri, na ombere zimbavasi, ongonye O, Yahova!

¹¹ Ivi umali kugirung'anyia ovovereri vwange kuva vusangali; umali kutuliza ho ovovereri vwange na ungumbirizi nuvusangali.

¹² Kunangwa, sindakiring'ana mba. Ndakimbi zinyimbu zie lizominya ku ivi. O, Yahova, Ivi oveeye Nyasaye wange, ndakusandiza mihiga ni mihiga.