Zaburi 28 - KITABU KITAKATIFU

Lisaala lio kwenya vokonyi

¹ O, Yahova, mukingi wange, nzanira ku ivi, huliriza ku lilira liange! Niiva ulavula kundivulira, ndava mulala ku yavo aviikaa mu kivala cha vakuzu.

² Umbulirize lwa nzanira ku ivi ongonye, lwa ng'ingaa makono gange kohenziza ku Litembeli liilio litakatifu.

³ Utangalagira harara na vachamu, kandi harara na yavo avakolaa uvudamanu avandu va makuva gaavo gaveeye guvulina navuzwa uvusigu voveeye mu mioyo jaavo.

⁴ Uvahe amageri ku aga vakoli, ku vudamanu vwa vamali kokora. Uvahe mageri kolondekana ni vikolwa viavo, uvahe agadukanaa vanyoore.

⁵ Sivaganaganaa ku vindu via Yahova amali kokora mba. Anoho ivia Yalomba; kandi alavadiviza mihiga ni mihiga.

⁶ Yahova yizominywe, kigira umali kuhulira lianira liange kwenya vokonyi.

⁷ Yahova aveeye zinguru ziange, kandi inguva yange; inzi suuviraa muye: mwoyo gwange gu lamusangalira ligali; kigira amali kongonya; ndamwizominya ni zinyimbu ziu kumusandiza ligali.

⁸ Yahova aveeye zinguru zia vandu veve, aveeye imbinga yo vohonyi yu mutovole weve.

⁹ O, Yahova, ohonyie avandu vovo kandi uvagasize. Ove mwayi wavo kandi uvalindi mihiga ni mihiga.