Zaburi 26 - KITABU KITAKATIFU

Lisaala liu mundu mulungi

¹ O, Yahova, umbalize kuva vugira imbara, kigira inzi ngolaa agaveeye malungi, kandi suuviraa ivi ligali.

² O, Yahova, unzideere na ongerize; ukalagiri lienya liange ni zing'anagani ziange.

³ Vuyanzi vuvwo uvutali nekeheri vunzimiliraa kandi uvusuuvirifu vuvwo vunzimiliraa.

⁴ Inzi si nzikalaa na vandu vu vugadi mba, kandi si mbambanaa na vagadi mba.

⁵ Ndunyiraa mavugano ga yavo avakolaa uvudamanu, kandi si nzikalaa na vachamu mba.

⁶ O, Yahova, inzi savaa makono gange kumanyia ndi simbeeye nimbara mba.

⁷ Nyimbaa zinyimbu ziu kuhaana lisandiza ku ivi, kandi ndalandiza vikolwa viivwo viosi viokogenyia.

⁸ O, Yahova, nyanza mu Litembeli liilio aha omenyi havundu hu vukumi vuvwo vomenyaa.

⁹ Utandiviza harara na vandu vuvwoni, kandi ombonyie ku kivi kilidukira ku viiti,

¹⁰ avandu vakora uvudamanu zing'inga ziosi kandi vaveeye vwangu kuvugura viambeti.

¹¹ Navuzwa inzi mbeeye mulungi imbiri woovo, yaanza ombere zimbavasi kandi ombonyie!

¹² Inzi mali kohona kutura mu vuhimwa vwosi; na kigira yaga, nzizominyaa Yahova mu livugana linene lia vandu veve.