Zaburi 25 - KITABU KITAKATIFU

Lisaala kigira liemilirwa nilikingwa

¹ O, Yahova, ng'inga mwoyo gwange ku ivi, mu lisaala!

² O, Nyasaye wange, suuviraa mu ivi. Utaleka mbe mu zisoni utaleka avasigu vange vasangale kigira liguutwa liange!

³ Utaleka yavo avasuuviraa mu ivi vanyoore zisoni kigira liguutwa. Navuzwa oleke yavo avaveeye vwangu ukwiibaala ku ivi, vave soni.

⁴ O, Yahova, onzigize zinzira zizio; uzikole zimanyikane ku inzi.

⁵ Unzigize komenya kolondekana nagiligali googo. Kigira oveeye Nyasaye wange, ombonyia. Inzi suuviraa mu ivi kazozo.

⁶ O, Yahova, wizulizi, uvugasu kandi uvuyanzi vuvwo uvutahera mba. Uvwa umali kumanyia kunyi kutura kale.

⁷ Usamihi uvwoni na mahiolo gu vwana vwange. O, Yahova mu vuyanzi vuvwo uvutahera kandi mu vulahi vuvwo unzizulizi.

⁸ Yahova yigizaa avoni zinzira zia gavadukiraa valonde, kigira aveeye mulungi kandi mulahi.

⁹ Yimiliraa avahooma munzira eveeye inungi, kandi avigizaa uvulariri vwivwe.

¹⁰ Yahova yimiliraa vosi nu vusuuvirifu, kandi nuvuyaanzi yavo voosi avagumira lilagana lilie kandi avahulira malago geege.

¹¹ O, Yahova, uliinde lilagana lliilio na usamihi vwoni vwange, kigira voveeye uvunyingi.

¹² Yavo avatiizaa Yahova valiiga kutura kuye zinzira zia vaduukana valonde.

¹³ Valagasizwa kazozo, avana vaavo valanyora miandu ji kivala.

¹⁴ Yahova aveeye mulina wa yavo avamuhulira; kandi adinyirizaa lilagana lilie navo.

¹⁵ Mbenzaa ku Yahova kazozo yangonye, na yambonyia kutula mu vuhimwa.

¹⁶ O, Yahova, girung'ana ombeenze, na ombere zimbavasi; kigira mbeeye nekesoma kandi mudedekere.

¹⁷ Osoosize kutura ku lihenda mwoyo liange na ombonyie kutura mu vudinyu vwange vwosi.

¹⁸ Henza ku lidambizwa kandi lisalirizwa liange, na usamihi vwoni vwange vwosi.

¹⁹ Henza kuli avasigu vange vamedeki kuva avanyingi. Henza kuli vandunyiraa ligali.

²⁰ Linda livamwoyo liange na ombonyie. Utaandeka nduuki mu liguutwa. Nziza ku ivi uduuki kombonyia.

²¹ Uvulahi nu vusuuvirifu vwange vuduuki vuuniinda kigira inzi suuviraa mu ivi.

²² O, Nyasaye, ohonyie avandu vovo Isiraeli, kutura mu vudinyu vwavo vosi.