Zaburi 21 - KITABU KITAKATIFU

Lizominya kigira liguuta

(Izaburi ya Daudi)

¹ O, Yahova, Mwami aveeye nuvusangali kigira wamuha zinguru; asangalaa kigira wamuha liguuta linene.

² Ivi umali kumuha lienya liu mwoyo gwigwe umali kumutivulira lienya lilie.

³ Ivi waza kuye nuvugasu vonene ligali kandi nuviika itaji yi zahabu indahi ku mutwi gwigwe.

⁴ Yaakoteeva livamwoyo, na ivi wamuha, wamuha livamwoyo lie mihiga ni mihiga.

⁵ Uvukumi vwivwe voveeye vonene kigira ovokonyi vuvwo. Ivi umali kumuha liizominywa lwuluyali.

⁶ Uvugasu vuvwo voveeye kuye mihiga ni mihiga. Aveeye nuvusangali vonene imbiri woovo.

⁷ Mwami asuviraa mu Yahova Wanyala Viosi; na kigira zimbavasi ziu vuyanzi vwa Yahova, alava mu mirembe kazozo.

⁸ Mwami alagumira avasigu veve vosi; alagumira yavo vosi avamudunyira.

⁹ Alavadiviza kuli muliru gusambaa lwa alolekaa, Yahova alavamira vugara mu vutima vwivwe na umuliru gulavasamba.

¹⁰ Aladiviza visukululwi viavo kutura ku lirova kandi aladiviza avana vaavo vatuli hagati ha vandu.

¹¹ Valomba lilohiza liavo, nukumuganaganira uvudamanu. Navuzwa sivalaguuta mba.

¹² Alavalasa ni mivano juvuta kandi alavakola viiruki ligali.

¹³ O, Yahova, kukwizominyaa ligali, kigira zinguru zizio zinene! Kunangwa kulimba nukwiizominya zinguru zizio.