Zaburi 20 - KITABU KITAKATIFU

Lisaala kigira liguuta

¹ Yahova akutivuliri lwa oveeye mu kivi! Nyasaye wa Isiraeli akukingi!

² Akutumiri ovokonyi kutura mu Litembeli lilie; kandi akohe vokonyi kutura ku kiguru cha Ziyoni.

³ Avugiliri vihaanwa vivio viosi kandi aduuki kuyaanzizwa ni visiuviliru vivio viosi.

⁴ Yahova akohe viu mwoyo gugwo gwenyaa kandi aduuki kudukiza lilohiza liilio liosi.

⁵ Maku kulahanzuka kigira uvusangari ku liguuta liilio na kulaloomba lilia ku lizominya Nyasaye wiitu kigira liguuta liilio. Yahova akutivuliri lienya liilio liosi.

⁶ Kalunu inzi manya ndi Yahova ahaanaa liguuta ku mwami mutovole weve; amutivuliraa kutura mwigulu mwimwe Mutakatifu, kandi amuhezanga liguuta linene kuzinguru zizie.

⁷ Avalala vasuuvira mu magare gaavo gu vulwani na avandi vasuuvira mu zibarasi ziavo, navuzwa kunyi kusuuviraa mu zinguru zia Yahova Nyasaye wiitu.

⁸ Avandu kuli yava valikigitara nukugwa; navuzwa kunyi kulavuuka nukusingira vudinyu.

⁹ O, Yahova, haana liguuta ku mwami; ukutivuliri lwa kukwaniraa.