Zaburi 2 - KITABU KITAKATIFU

Mwami mutovole wa Nyasaye

¹ Kigira ki vandu avizihiiri valohiza kwibaala? Kigira ki avandu valomba zing'anagani zia vuzwa?

² Avami vi lirova vibaara vene. Avamihi vaavo valomba zing'anagani mu vwivisu ukusuula Yahova Nyasaye Wuvunyali Viosi harara nu mwami mutovole weve.

³ Vavoola, “Gendi kwevoholole kutura mu liamiifa liavo; gendi kusiuvi ihale minyororo jaavo!”

⁴ Yahova Nyasaye uwikala igulu mwigulu asekeliza kandi avakolera kehenyahenye.

⁵ Maku aviganihizaa mu vutima vwivwe nukuvatiihiza mu livihirirwa lilie.

⁶ Yahova avoora, “Mali kwamiihiza mwami wandatovola, ku Ziyoni, kiguru change kitakatifu.”

⁷ Mwami avoora, “Ndalandiza aga Yahova Nyasaye Wuvunyali yambolera, ‘Ive oveeye mwana wange muyaayi; kalunu inzi mali kugwa baba woovo.

⁸ Ondeeve, na inzi ndakuha zihiiri ziosi ni vindu vie lirova liosi kuva iviivio.

⁹ Ulavatanyia nimbimbu yikivia; ulavaduvulanyia mu vidonye kuli inyingu yumulongi.’ ”

¹⁰ Kalunu munyi avami, mutumikiri ovogeri; muhulirizi lieganihiza yili, O, munyi avamihi vilirova:

¹¹ Mutumikiri Yahova nuvuti; mumutumikiri nilidegera;

¹² mudegere nukumwinamira gase uvutima vwivwe vulaaka, na munyi mukuzi vwangu. Vaveeye nuvugasu yavo vosi avanyagura kuye vanyoore likingwa.