Zaburi 19 - KITABU KITAKATIFU

Uvukumi vwa Nyasaye ku vilombe vivie

(Izaburi ya Daudi)

¹ Ligulu livuulaa uvukumi vwa Nyasaye! Uvwerefu vulandizaa miyinzi jije!

² Vuli mbasu gulandizaa uvukumi vwa Nyasaye ku mbasu golonda ku. Vuli vudiku vwilaniraa kuvuvuula ku vudiku volonda ku.

³ Limoloma anoho makuva sigatumikirangwa mba. Kandi sihali nu mwoyo guhulilikaa mba;

⁴ navuzwa amakuva gavio galaanda mu lirova mwosi; kandi gahulilikaa kuduuka ku keheri chi lirova. Nyasaye yalombera iliuva hango muvwerefu.

⁵ Liuva litongaa mugambazuri kuli musaza osereye mwiha atulaa munyumba yeeve nuvusangali. Lisangala kuli mundu wizimbiru anyaguraa mu ligerana.

⁶ Liuva litongaa kutura lovega lulala lwu vwerefu, ma lizia kuduuka ku lovega lundi. Si keveeye ho ni kindu kinyala kwivisa ku uvuhiu vwalio.

Lilaga lia Yahova

⁷ Lilaga lia Yahova liveeye liduukiru, liheezaa mundu zinguru zimbia. Amalago ga Yahova ahaanaa gaveeye gukusuuvirwa, gahaanaa ovogeri ku yavo avatali navwo.

⁸ Malago ga Yahova gaveeye malungi, na yavo avagahuliraa vaveeye nu vuyanzi. Malago ga Yahova gaveeye malungi, kandi gahaanaa limanyiriza mu zing'anagani.

⁹ Iliitia Yahova liveeye lilahi, lihindiraa mihiga ni mihiga. Likalaga lia Yahova liveeye lirungi; liveeye lilahi kazozo.

¹⁰ Likalago yili liegombangwa ligali kuvita izahabu indahi ligali; liveeye linolu kuvita uvwuki vulahi ligali.

¹¹ Limbezaa limanya, inzi mutumikiri woovo. Mbeeveywi madanyi kigira ilihulira likalaga yilio.

¹² Si haali numulala unyala kolola mahiolo geege umwene; O, Yahova Ombonyie, kutura mu mahiolo giivisi!

¹³ Osoore kutura ku vwoni vwukuhindagiriza, utavoleka vunzamihi mba. Hene yaho inzi ndava muduukiru, kandi ndava muvoholore kutura ku vudamanu vwu vwoni.

¹⁴ Makuva gange kandi zing'anagani ziange zivugiriki ku ivi, imbiri woovo, O, Yahova, uvuhaliru kandi mutungiri wange.