Zaburi 18 - KITABU KITAKATIFU

Lwimbu lwa Daudi lwi liguuta

¹ O, Yahova, Inzi nguyaanzaa ivi! Kigira ivi oveeye mukingi wange.

² Yahova aveeye mukingi wange, aveeye imbinga yange yizingulu. Nyasaye wange aveeye chu kwivisamu change; aveeye inguva yange, kandi aveeye zinguru zio vohonyi vwange nu munara gwange.

³ Inzi nzanira ku Yahova kigira adukanaa kwizominywa, na ndio inzi ndahonywa ku vasigu vange.

⁴ Uvuhimwa vwi likuza vwangumberiza, viguvuli vinene vie lidiviza viaminira hasi.

⁵ Uvuhimwa vwi likuza vwangumbiriza, na kilindwa chetegeki kumbugura.

⁶ Ndaanira Yahova mu vudinyu vwange, ndaalira ku Nyasaye wange yangonye. Yahulira mwoyo gwange mu Litembeli lilie; yahuliriza ku lilira liange kigira ovokonyi.

⁷ Maku lirova liosi liadegera na imise ji vigulu jadengeya. Kigira Nyasaye yaali nu vutima.

⁸ Mwochi gwaduuma kutura mu amuulu geege, na olomemo lusambaa na manda gu muliru gwaduka kutura munwa gwigwe.

⁹ Yatandula ligulu ma niyiika hasi, na kisundi kenene chaali isi wi virenge vivie.

¹⁰ Yikala ku zimbaha ziu Mukerubi; ma nabuluka vwangu ku zimbaha zie imbuza.

¹¹ Kisundi kenene chamukunika; kandi malesi maliduhu agizula mazi manyingi ga mukumberiza.

¹² Imbura ya amagina no lomemo lwu muliru kutura koloheni, viaturuka mu malesi imbiri weve, kandi viavitira mu malesi mamwamu.

¹³ Maku Yahova yamoloma kuli inguba kutura mwigulu, na umwoyo gwa Nyasaye, oveeye igulu wa viosi, gwahulirika.

¹⁴ Yalasa mivano jije ju vuta, naasalanyia avasigu veve. Yavakunga ni lihemahema lie zimbeni.

¹⁵ O, Yahova, ivi wakola luliva lwi inyanza kwuma, kandi imise ji lirova jakunulwa lwa wagondokera avasigu vovo, nufuumira mu vutima vuvwo vululu.

¹⁶ Yahova, yaza kutura mwigulu, noong'umira; yang'usa kutura mululiva lwa mazi manene.

¹⁷ Yambonyia kutura ku avasigu vange vizingulu, kandi kutura ku yavo vosi avandunyira. Vaali ni zinguru zinene ligali kuvita inzi.

¹⁸ Lwa ndaali mu vudinyu, avasigu vange vanzingilira, navuzwa Yahova yasoola.

¹⁹ Yangoonya kutura mu vuhimwa, yaambonya kigira yayanzizwa niinzi.

²⁰ Yahova yaambezaa amadanyi kigira ngolaa agaveeye malungi; yangasizaa kigira mbeeye vugira imbara.

²¹ Mali kuhulira amalago ga Yahova, kandi sindagirung'ana kutura ku Nyasaye wange mba.

²² Mali kugumira amalago geege goosi, kandi sisuuyi amalago geege mba.

²³ Yahova amanya ndi, inzi mbeeye vugira imbara, kandi ndayigaya ku likora uvwoni.

²⁴ Nandio, Yahova yaambezaa amadanyi, kigira ngolaa agaveeye amalungi. Kandi amanya ndi mbeeye vugira imbara.

²⁵ O, Yahova, oveeye musuuvirifu ku yavo avaveeye vasuuvirifu ku ivi, kandi oveeye umulahi ligali ku yavo avaveeye vadukiru imbiri woovo.

²⁶ Ivi oveeye mutakatifu ku yavo avaveeye vatakatifu, navuzwa oveeye umululu ku yavo avaveeye vachamu.

²⁷ Ivi ohonyiaa avaveeye vahoma imbiri woovo, navuzwa ogehizaa yavo avigingiranga imbiri wavo.

²⁸ O, Yahova Nyasaye wange, ombezaa vulavu, na utulizaa ho kisundi change.

²⁹ Ombeezaa zinguru nduuki kwingilira avasigu vange, kandi zinguru ukuguuta liekinga liavo.

³⁰ Vikolwa via Nyasaye viveeye vidukiru, kandi amakuva geege gaveeye agiligali. Aveeye kuli inguva ku vosi avenyaa mu likingwa lilie.

³¹ Yahova weng'ine aveeye Nyasaye; kandi niye yeng'ine oveeye likingwa lietu.

³² Ni Nyasaye ongolaa mbe ni zinguru, kandi akolaa zinzira ziange kuva zindahi.

³³ Alombaa inzi kunyagula kuli embongo, kandi angolaa kusingira nuvuluviliri.

³⁴ Yanzigizaa kuli nyara kulwaana, kunangwa nduuki kutumikira uvuta vwu mugasa vwizingulu kuvita vwosi.

³⁵ Ivi ombeeye inguva yo vohonyi vuvwo, kandi zinguru zizio ziniindi.

³⁶ Ivi onombi kuvula kugumirwa, kandi ngikiri kugwa hasi kali hakuzu.

³⁷ Ndalondelera avasigu vange na ndavagumira, si ndalekera kuvalondelera kuduuka lwa mbadiviza.

³⁸ Ndaavatumita, nu kuvadiviza ligali, si valasingira kandi mba. Valagwa hasi hi virenge viange.

³⁹ Ivi ombeye zinguru kulwaana na vasigu vange, kandi kuvaguuta ligali.

⁴⁰ Ivi okoli avasigu vange kwiruka kutura ku inzi, na mali kudiviza yavo avandunyira.

⁴¹ Vanira vokonyi, navuzwa siaveeye ho mundu unyala kuvakonya mba, kali vanira ku Yahova, navuzwa Yahova yavativulira mba.

⁴² Ndavaduvaganyira hasi kunangwa vagwi kuli luguchi lwi imbuza iduumiyaa.

⁴³ Ivi wambonya kutura ku yavo avibalaa ku inzi, kandi wangola kuva mwamihi ku zihiiri ziosi, avandu va inzi ndaavura kumanya, kalunu vaveeye avatumikiri vange.

⁴⁴ Lwa Avageni viinama imbiri wange; lwa vahuliraa agambooraa, vegehiza.

⁴⁵ Liluvirira liavo liageha, kandi vaza kutura mu zimbinga ziavo ni lidegera linene.

⁴⁶ Yahova aveeye mwoyo! Mukingi wange yizominywe! Landiza ovonene vwa Nyasaye ombonyia!

⁴⁷ Nyasaye ambezaa liguuta ku vasigu vange, kandi aviikaa zihiiri hasi hi zinguru ziange;

⁴⁸ kandi yambonyia kutura ku vasigu vange. O, Yahova, ivi ombezaa liguuta ku vasigu vange kandi ukingaa inzi ku avandu vatindi.

⁴⁹ Kigira yaga, ndakwizominya ivi O, Yahova hagati hi zihiiri. Ndakwimbira zinyimbu zie lizominya.

⁵⁰ Nyasaye ahaanaa liguuta linene ku mwami weve; kandi amanyiaa uvuyanzi vutali nekeheri ku uyu wamali kotovola, ku Daudi harara ni visukululwi veve mihiga ni mihiga.