Zaburi 17 - KITABU KITAKATIFU

Lisaala liu mundu utali niimbala

¹ O, Yahova, hulira ligoonya liange kigira likalaga liuvulungi! Huliriza ku lianira liange kigira ovokonyi. Huliriza ku lisaala liange lisuuvirifu!

² Ivi ulangalagira mu liyanzilira inzi. Kigira ivi umanya agaveeye malungi!

³ Ivi umanya mwoyo gwange ligali ivi umali kuuza ku inzi mu vudiku; ivi umali kombenzeriza ligali. Na uvuli konyoora likayirwa lidamanu mu inzi. Inzi simolomaa uvudamanu kuli vandi vakora mba.

⁴ Mali kuhulira lilago liilio kandi sinondaa kuzinzira zia avikirage vatindi.

⁵ Mali kogenda kuzinzira zizio kazozo, kandi ngikiri kuzia halovega kutura kuzio mba.

⁶ Ngusaala, O, Nyasaye, kigira ivi undivuliraa. Kunangwa tegiza ugutu gugwo na uhuliri lisaala liange.

⁷ Vuula uvuyanzi vuvwo vwokogenyia na ombonyie; ivi ohonyiaa aviirukiraa ku ivi ha mukono gugwo mulungi, inzi mboni kutura ku vasigu vange.

⁸ Uniindi kuli unyala kulinda emoni yooyo mwene. Umbisi kuli engoko ivisaa ivimiinyu viayo isi wi zimbaha

⁹ uniindi kutura ku lingilira lia vasigu vadamanu vaangumbirizi;

¹⁰ sivaveeye nilivererera mu mioyo jaavo kandi vamolomaa ni liegingira.

¹¹ Vanondeleraa kandi vaangumbirizi, vaang'oneki vaduuke kunzita.

¹² Vaveeye kuli zisimba izinindiliraa, izietegeki kundandulanyia mu vidonye.

¹³ O, Yahova, hing'ana na vasigu vange na uvaguute! Ombonyie kutura ku avadamanu nikivavi chicho.

¹⁴ Ombonyie, kutura ku yava avaveeye na viosi iviavenyaa mu livamwoyo yili. Uvahe mageri nuvusaliri vululu uvwuwavavikira leka avana vaavo vanyoore mageri gavaduukanaa, amagari gandi kandi gatigalili visukululwi viavo.

¹⁵ Navuzwa inzi ndakalole ivi kigira mbeeye mu vulungi. Lwa mbuukaa, ndiizura uvusangari kigira mali kolola ivi.