Zaburi 16 - KITABU KITAKATIFU

Lisaala lie lisuuvirizwa

¹ O, Nyasaye, osoore, kigira nzirukiraa ku ivi nyoore mirembe.

² Mbolera Yahova, “Ivi oveeye Yahova wange; vindu viosi vilahi via mbeeye navio vituraa ku ivi.”

³ Avatakatifu avaveeye mu lirova, nivo avaveeye vuvukumi ligali na liyaanzilira liange linene liveeye muvene yavo.

⁴ Yavo avanyagura kusigamira avanyasaye vandi, veleteraa kivi kenene. Inzi sindasanga mu visiuviliru viavo mba. Sindasigamira avanyasaye vaavo mba.

⁵ Ivi O, Yahova, niyie wambeeye naye weng'ine ombeezaa viosi via nyenya; livamwoyo liange lia madiku gaaza liveeye mu makono googo.

⁶ Vihaanwa vivio ku inzi viveeye viokogenyia ligali. Yee, viveeye vilahi ligali!

⁷ Nzizominyaa Yahova kigira yanzimilira, kandi mu vudiku zing'anagani ziu mwoyo gwange zinziganihizaa.

⁸ Inzi manya ndi Yahova aveeye harara inzi kazozo. Aveeye ahimbi ninzi na sihaveeye ho ni kindu kinyala kondegeliza mba.

⁹ Kigira yaga mbeeye ni lisandiza ligali nuvusangali, kandi ndamenya mu mirembe.

¹⁰ Kigira ulakinga inzi kutura kuzinguru zie likuza; inzi mali kukutumikira nu vusuuvirifu vwosi, na siulandeka kuva mukihadisi.

¹¹ Ivi ulamanyia inzira yi livamwoyo. Lwa oveeye himbi ninzi nzizulaa uvusangari du. Kandi ombezaa uvuyanzi mihiga ni mihiga.