Zaburi 147 - KITABU KITAKATIFU

Mwizominye Nyasaye Wanyala Viosi

¹ Mwizominye Yahova! Voveeye vulahi ligali kwimbira Nyasaye wiitu zinyimbu zie lizominywa! Gaveeye gukuyaanziza kandi malungi ku mwizominya.

² Nyasaye yumbaka Jerusalemi vuhia; yiranyia avandu va Isiraeli avaari ni liadikizwa.

³ Ahonyia avi mioyo jidedekee, kandi avoheleraa zingwagu ziavo.

⁴ Amali kukalaga livaliza lie zing'ereng'ani ziduukanaa kuva ho, kandi ahaanaa amita kuvuli ndala.

⁵ Yahova wiitu aveeye munene kandi wizingulu; ovogeri vwivwe sivunyala kogerwa mba.

⁶ Yahova anenehiza avahocha, navuzwa aduvulanyiraa avadamanu hasi.

⁷ Mwimbiri Yahova zinyimbu zie liizominywa; mwimbiri Nyasaye wiitu zinyimbu ku vukana.

⁸ Akunikaa ligulu na malesi; ahaanaa imbura ku lirova, kandi akolaa uvulimu komera ku vigulu.

⁹ Ahaanaa viukulia ku zinyama kandi alihizaa viminyu via majikoro lwa viayulaa.

¹⁰ Liyanzilira lilie siliveeye mu zibarasi ziezingulu, anoho lisangala lilie mu avasikari valuviliri.

¹¹ Navuzwa ayanziliraa yavo avamuhezaa luyali, kandi mu yavo avasuuviraa mu vuyanzi vwivwe vwa kazozo.

¹² Mwizominye Yahova, O, Jerusalemi! Mwizominye Nyasaye winyu, O, Ziyoni!

¹³ Adinyirizaa miluguyu jie virivwa vivio. Kandi agasizaa avandu vovo.

¹⁴ Akolaa zinzako zizio kuva ni mirembe, kandi akwigutizaa ni ingano indahi ligali.

¹⁵ Ahaanaa lilago ku avandu ku lirova, agavoora gekolekaa vwangu.

¹⁶ Avagalaa likonza kuli ipamba, kandi asalanyiaa lime lizililu ligali kuli ligoke.

¹⁷ Atumaa imbura ya magina kuli zigongodo; siali ho nunyala kwikuzira uvukindu vwa atumaa mba.

¹⁸ Maku ahaanaa lilago ma likonza likamuluka; kandi atumaa imbuza na amazi gaavita.

¹⁹ Ahaanaa makuva geege ku vandu veve; kandi ahaanaa amigizu geege na malago geege ku vandu va Isiraeli.

²⁰ Akikiri kokora yaga ku zihiiri zindi; kandi sivamanyi malago geege mba. Mwizominye Yahova!