Zaburi 145 - KITABU KITAKATIFU

Lwimbu lwu kwizominya Nyasaye

¹ O, Nyasaye wange kandi mwami wange inzi ndalandiza ovonene vuvwo, ndakusandiza mihiga ni mihiga.

² Ndakusandiza vuli lidiku, kandi ndakwizominya mihiga ni mihiga.

³ Yahova aveeye munene, kandi uwukwizominywa ligali; ovonene vwivwe vuviti limanyiriza lietu.

⁴ Miyinzi jijo jilizominywa kutura ku likula kuduuka ku likula, valalandiza vikolwa vivio vinene.

⁵ Valamoloma ku vukumi vuvwo kandi ku vonene vuvwo, na inzi ndaganagana ku vikolwa viivwo viokogenyia.

⁶ Avandu valamoloma ku vikolwa vivio viezingulu kandi inzi ndalandiza ovonene vuvwo

⁷ Avandu valamoloma kigira uvulahi vuvwo vwosi, kandi valimba zinyimbu kigira uvulungi vuvwo.

⁸ Yahova aveeye wu vuyanzi kandi wizura zimbavasi. Aveeye wa galaha ku vutima kandi aveeye wu vuyanzi vutaveeye ne keheri.

⁹ Aveeye mulahi ku vandu vosi, kandi aveeye nilivererera ku viosi via yalomba.

¹⁰ O, Yahova, vilombe vivio vilizominya ivi, kandi avandu vatakatifu vovo vosi valakusandiza.

¹¹ Valamoloma makuva guvukumi vwu vwami vuvwo vwi zinguru. Kandi valavoora makuva gizingulu zizio zinene;

¹² Kunangwa avandu vosi valamanya vikolwa vivio vie zinguru, kandi valamanya uvukumi vonene vwu vwami vuvwo.

¹³ Liamiiha liilio lihindira mihiga ni mihiga, kandi ivi oveeye mwami mihiga ni mihiga. Yahova aveeye musuuvirifu ku lisuuviriza lilie, kandi aveeye wi livererera mu vikolwa vivie viosi.

¹⁴ Yahova akoonyaa yavo vosi avaveeye mu vudinyu; kandi adigululaa yavo vosi avaveeye avadedekere.

¹⁵ Avandu vosi veereda ku ivi, kandi uvahezaa viukulia viavo mu zing'inga ziduukanaa.

¹⁶ Uvahezaa viduukana navo, kandi wigutizaa lienya lia vuli mundu.

¹⁷ Yahova aveeye mulungi mu zinzira zizie ziosi, kandi aveeye wi livererera mu viosi via okolaa.

¹⁸ Yahova aveeye ahimbi ku yavo vosi avamwanira, ku yavo vosi avamwanira mu agiligali.

¹⁹ Ahaanaa lienya lia yavo vosi avamutizaa, ahuliraa lirira liavo nukuvahonyia.

²⁰ Yahova alindaa yavo vosi avamuyanzaa, navuzwa aladiviza avachamu vosi.

²¹ Inzi ndizominya Yahova kazozo; kandi vilombe viosi vizominye lieta lilie litakatifu mihiga ni mihiga.