Zaburi 144 - KITABU KITAKATIFU

Mwami asandizaa Nyasaye kigira Liguuta

¹ Yahova mukingi wange yizominywe, aveeye mukingi wange. Yanzigiza kuli nyara kuzia mu liihe, kandi yanzetegekizaa kuzia mu vulwani.

² Ivi oveeye mukingi wange kandi imbinga yange, inguva yange kandi muhonyi wange, uwa inzi suuviraa alangoonya. Ivi wambika kwamiiha zihiiri ziosi zia vandu vovo.

³ O, Yahova, mundu siaveeye kindu imbiri woovo uduuki kumuhendera mwoyo? Kandi aveeye ki ivi uduuki kuganagana kigira kuye?

⁴ Mundu aveeye vuzwa kuli mwika, kandi amadiku geege kuli chiriri kivitaa.

⁵ O, Yahova, yigula ligulu wiki kutura mu ligulu. Udiiri vigulu na viduuki kuvuuya mwoki.

⁶ Tuma oloheni lohemaheme kandi usalanyie avasigu, ulase mivano ju vuta vuvwo na uvakole viiruki vazie ihale.

⁷ Unyiire mukono gugwo kutura igulu, osoore na ombonyie kutura mu amazi amanene. Kandi kutura ku zihiiri zing'eni zie zinguru,

⁸ avatavola agiligali, kandi avavooraa uvugadi kali ku liesuuha.

⁹ O, Nyasaye, inzi ndakwimbira lwimbu luhia. Ndakuba uvukana vwi migoye likomi nukukwimbira.

¹⁰ Uhaana liguuta ku vami, kandi osoore mutumikiri woovo Daudi.

¹¹ Ombonyie kutura ku vasigu vange valulu, kandi osoore kutura kuzinguru zia vasigu vange vi zihiiri zing'eni, avatavola agiligali kandi avavooraa uvugadi kali ku liesuuha.

¹² Avayaayi viitu mu vwana vwavo vave kuli vitagwa vivirukaa ni zinguru. Avakaana viitu vave kuli zitiru ziu mukoona izisiaha inyumba yu vwami.

¹³ Videera vietu viizule ligali ni ligesa lie zing'ano ziosi. Na amagondi gave mu milimi jietu giivulane zielefu makumi na makumi.

¹⁴ Zing'ombe zietu ziivulane muvunyingi ligali vugira lilogosa anoho uvudinyu, kandi litavaho ni lilira lie linyang'ana mu madaala giitu mba.

¹⁵ Vaveeye nu vugasu avaveeye ni liiva kuli yili, kandi vaveeye nu vugasu yavo ava Nyasaye aveeye Yahova wavo.