Zaburi 143 - KITABU KITAKATIFU

Lisaala kigira ovokonyi

¹ O, Yahova, hulira lisaala liange, huliriza ku ligoonya liange mu vulungi vuvwo; kandi undivuliri, mu vusuuvirifu vuvwo!

² Utambika inzi mutumikiri woovo mu likalagirwa mba, kigira sihaveeye ho numundu kali mulala oveeye mulungi imbiri woovo mba.

³ Avasigu vange vamali konondelera ligali, kandi vamali kunguuta ligali. Vamali kumbika mu kisundi kenene, mbeeye kuli yavo avakuza kale.

⁴ Kigira yaga, mwoyo gwange guukuzi, kandi lisuuvira liange lituli mu inzi.

⁵ Nzizuliza amadiku gakale, ng'anagana ku vindu viosi via ivi walomba, kandi nzizuliza vikolwa vivio viosi.

⁶ Ng'ingaa amakono gange igulu mu lisaala ku ivi; mwoyo gwange goveeye nu vuluhu ku ivi, kuli lirova liveeye liumu vugira amazi.

⁷ O, Yahova, yaanza undivuliri kalunu ndi! Mali kogotiza lisuuviriza liange liosi. Utiivisa umwene kutura ku inzi mba, gase ndava kuli yavo aviikaa mu kilindwa.

⁸ Unzizulizi vuli mugambazuri makuva kigira uvuyanzi vuvwo vwa kazozo vuli mugambazuri. Kigira inze mbikaa lisuuvira liange mu ivi, kandi masaala gange ganigiraa ku ivi; umanyie inzira ya nonda ku.

⁹ O, Yahova, nziza ku ivi osoore, ombonyie kutura ku vasigu vange,

¹⁰ Ivi oveeye Nyasaye wange; unzigize kokora uvulariri vuvwo. Roho gugwo umulahi gunzimiliri kunzira yu vulungi.

¹¹ O, Yahova, osoore kuli umali kusuuviriza; ombonyie kutura mu vudinyu vwange mu vulungi vuvwo!

¹² Kigira uvuyanzi vuvwo vwa kazozo ku inzi, wiite avasigu vange, kandi udivize vosi avadambizaa mwoyo gwange, kigira inzi mbeeye mutumikiri woovo.