Zaburi 141 - KITABU KITAKATIFU

Lisaala lia hamugorova

¹ O, Yahova, nzanira ku ivi ongonye kalunu! Umbulirize lwa nzanira ku ivi!

² Vugilira lisaala liange kuli kimuli kifunyaa mwayu imbiri woovo, kandi umbugiliri lwang'ingaa amakono gange ku ivi kuli kisiuviriru cha ha mugolova.

³ O, Yahova, linda lulimi lwange, mburi kutivula amakuva madamanu.

⁴ Utaleka mwoyo gwange gukayilwi kokora uvudamanu mba, kandi utaleka mbe ni lihambana harara na vandu vadamanu mu vudamanu vwavo mba, kandi mbule kusanga mu lisangala lie lilia liavo mba.

⁵ Mundu mulahi alahaana amageri ku inzi kandi alang'ondokera mu vulahi, navuzwa si ndavugilira uluyali kutura ku vandu vadamanu mba, kigira inzi saalaa kazozo ku vikolwa viavo vidamanu.

⁶ Lwa vami vaavo vaguluka hasi kutura ku vigulu via magina mugii, hene yaho avandu valakamanye ndi amakuva ga Yahova gaveeye agiligali.

⁷ Vigumba viavo vilakasalanywe ha munwa gwi kilindwa, kuli misaala jatanywa kandi jikalaganywa mu vidonye.

⁸ O, Yahova, Nyasaye wange inzi suuviraa mu ivi, nyenyerizaa likingwa liilio; utaandeka nduuki kudiva mba.

⁹ Osoore ku mitego ja vasigu vange vamali kuviika imbiri wange. Osoore kutura ku viveto via vakoli vu vudamanu.

¹⁰ Leka avandu vachamu vagwi mu mitego jaavo aveene, na inzi ongonye mburi kusalilizwa.