Zaburi 136 - KITABU KITAKATIFU

Lwimbu lwi lihaana Lisandiza

¹ Omuhaane lisandiza ku Yahova kigira aveeye mulahi; kigira uvuyanzi vwivwe vuhindiraa mihiga ni mihiga.

² Muhaane lisandiza ku Nyasaye oveeye munene ligali wa vanyasaye vosi. Kigira uvuyanzi vwivwe vuhindiraa mihiga ni mihiga.

³ Muhaane lisandiza ku mwami oveeye wizingulu ligali kuvita avami vosi, kigira uvuyanzi vwivwe vuhindiraa mihiga ni mihiga.

⁴ Niyie yeng'ine okolaa vilolekizu vinene; kigira uvuyanzi vwivwe vuhindiraa mihiga ni mihiga.

⁵ Yalomba ligulu ku vogeri vwivwe vonene; kigira uvuyanzi vwivwe vuhindiraa mihiga ni mihiga.

⁶ Yumbaka lirova ku mazi gululiva ligali; kigira uvuyanzi vwivwe vuhindiraa mihiga ni mihiga.

⁷ Oyo walomba uvulavu ovonene; kigira uvuyanzi vwivwe vuhindiraa mihiga ni mihiga.

⁸ Yalomba iliuva kwamiiha ku mbasu; kigira uvuyanzi vwivwe vuhindiraa mihiga ni mihiga.

⁹ Yalomba umweli ni zing'ereng'ani kwamiiha uvudiku; kigira uvuyanzi vwivwe vuhindiraa mihiga ni mihiga.

¹⁰ Yita avayaayi vukutanga kwivulwa Avaegebeti; kigira uvuyanzi vwivwe vuhindiraa mihiga ni mihiga.

¹¹ Yimilira avandu va Isiraeli kutura Egebeti; kigira uvuyanzi vwivwe vuhindiraa mihiga ni mihiga.

¹² Yaavimilira numukono gwigwe gwizingulu kandi ku vwami vwivwe vwizingulu; kigira uvuyanzi vwivwe vuhindiraa mihiga ni mihiga.

¹³ Yavukanyia Inyanza Nzakanyu; kigira uvuyanzi vwivwe vuhindiranga mihiga ni mihiga.

¹⁴ Yimilira avandu veve Isiraeli kuvitira mu. Inyanza Nzakanyu, kigira uvuyanzi vwivwe vuhindiranga mihiga ni mihiga.

¹⁵ Navuzwa yadivizira mwami wa Egebeti harara ni liihi lilie mu Inyanza Nzakanyu; kigira uvuyanzi vwivwe vuhindiraa mihiga ni mihiga.

¹⁶ Yimilira avandu veve kuvitira mu changalangwe; kigira uvuyanzi vwivwe vuhindiraa mihiga ni mihiga.

¹⁷ Yita avami vi zinguru; kigira uvuyanzi vwivwe vuhindiraa mihiga ni mihiga.

¹⁸ Yita avami avamanyikana ligali; kigira uvuyanzi vwivwe vuhindiraa mihiga ni mihiga;

¹⁹ Yita Sihoni mwami wa Avaamori; kigira uvuyanzi vwivwe vuhindiraa mihiga ni mihiga.

²⁰ Kandi yita Ogu mwami wa Bashani; kigira uvuyanzi vwivwe vuhindiraa mihiga ni mihiga.

²¹ Yahaana vivala viavo ku vandu veve; kigira uvuyanzi vwivwe vuhindiraa mihiga ni mihiga;

²² Yaavihaana vive ku vatumikiri veve Isiraeli; kigira uvuyanzi vwivwe vuhindiraa mihiga ni mihiga.

²³ Yahova siyivilira kunyi lwa kwaali ni kuguutiywi mba; kigira uvuyanzi vwivwe vuhindiraa mihiga ni mihiga.

²⁴ Yaavoholora kunyi kutura ku vasigu viitu; kigira uvuyanzi vwivwe vuhindiranga mihiga ni mihiga.

²⁵ Ahaanaa viukulia ku vilombe viosi viveeye mwoyo viosi; kigira uvuyanzi vwivwe vuhindiraa mihiga ni mihiga.

²⁶ Muhaane lisandiza ku Nyasaye wu mwigulu; kigira uvuyanzi vwivwe vuhindiraa mihiga ni mihiga.