Zaburi 135 - KITABU KITAKATIFU

Lwimbu lwu kwizominya Yahova

¹ Mwizominyi Yahova! Mwizominyi lieta lilie, munyi avatumikiri veve.

² Mumwizominye munyi avasingira munyumba yeye, mu Litembeli lia Nyasaye wiitu.

³ Mwizominye Yahova kigira aveeye mulahi; mumwimbiri zinyimbu zie lizominywa kigira aveeye wi zimbavasi ligali.

⁴ Yahova yatovola Yakobo kuva weve umwene, kandi yatovola avandu va Isiraeli kuva mwandu gwigwe mwene.

⁵ Inzi manya ligali ndi Yahova wiitu aveeye munene, aveeye munene ligali kuvita avanyasaye vosi.

⁶ Yahova akolaa cha yaanza mwigulu kandi ku lirova; mu zinyanza kandi hasi mu luliva.

⁷ Niyie oleeta malesi gimbula kutura ku zinduru zielirova. Atumaa loheni harara ni imbura. Kandi aleetaa imbuza kutura havundu hayo.

⁸ Yita vasaza vukutanga kwivulwa vosi mu Egebeti, avandu kandi zinyama harara.

⁹ Uwene yeyo, yakola vilolekizu viokogenyia, kuhaana mageri ku mwami kandi ku vanene veve vosi.

¹⁰ Yadiviza zihiiri zinyingi ligali, kandi niyiita avami vizingulu:

¹¹ Sihoni, mwami wa Avaamori, Ogu, mwami wa Bashani, na avami vosi va Kanaani.

¹² Yahaana milimi jaavo ku avandu veve; Yajihaana ku vandu veve Isiraeli.

¹³ O, Yahova, kulalandiza ivi kuli Nyasaye mihiga ni mihiga; kandi amakura goosi galakwizuliza.

¹⁴ Yahova alakinga avandu veve; alavererera avatumikiri veve.

¹⁵ Avanyasaye vi zihiiri valombwa ku ifeza nizahabu; valombwa na makono gavandu.

¹⁶ Vaveeye niminwa, navuzwa sivanyala komoloma mba, vaveeye ni zimoni, navuzwa sivanyala kolola mba.

¹⁷ Vaveeye namatu, navuzwa sivanyala kuhulira mba; kali sivanyala koherana mba.

¹⁸ Yavo vosi avavalomba kandi avasuuviraa muvo vagwi kuli vifananyi via vamali kolomba!

¹⁹ Mwizominye Yahova, munyi avandu va Isiraeli; mumwizominye munyi avasaalisi va Nyasaye!

²⁰ Mwizominye Yahova, munyi avinyumba ya Levi; Mumwizominye munyi mwosi avamusigamiraa!

²¹ Mwizominye Yahova mu Ziyoni, mu Jerusalemi hango hehe. Mwizominye Yahova!