Zaburi 132 - KITABU KITAKATIFU

Lizominya Uvulahi Vwi Litembeli

¹ O, Yahova wizulizi Daudi, kandi nuvudinyu vwosi vwa yikuzira ku.

² O, Yahova, wizulizi cha yalagana, liesuuha lia yalomba ku ivi Nyasaye wizingulu wa Yakobo:

³ “Sindingira munyumba yange, anoho kuzia kogona mu kidali change mba,

⁴ sindazia kosoosa anoho kogona zindoolo,

⁵ kuduuka lwa nyoleraa Yahova havundu ho komenya ha Nyasaye Wizingulu wa Yakobo.”

⁶ Kwahulira amakuva gi Lisandugu lie Lilagana mu Bezelehemu, na kwalinyoola mu milimi ja Jearimu.

⁷ Kwavoola, “Gendi kuzie mu Litembeli lia Yahova; Gendi kusigame imbiri we endeve yeeye yu vwami.”

⁸ O, Yahova, hamba mu Litembeli ni Lisandugu lie Lilagana, iliveeye kelolero chi zinguru zizio, na omenye hano mihiga ni mihiga.

⁹ Leka avasaalisi vovo vakole agaveeye malungi kazozo; leka avandu vovo vakubi isango kigira uvusangari!

¹⁰ Ivi walomba lisuuviriza ku mutumikiri woovo Daudi; O, Yahova, utasuula mwami mutovole woovo mba.

¹¹ Ivi walomba lilagana lie liesuuha ku Daudi, lisuuviriza lia utanyala kugirung'anyia kandi mba: “Ndakora mulala ku vayaayi vovo kuva mwami, na alamiiha inyima woovo.

¹² Niiva vayaayi vovo valava avasuuvirifu ku lilagana liange, kandi ku malago ga mbaheezaa, valava avami kuli ivi mihiga ni mihiga.”

¹³ Yahova umali kotovola Ziyoni; yenyaa kulikola live hango hehe:

¹⁴ “Yaaha niho aha inzi ndimenya mihiga ni mihiga; kandi ha nyenya kwamiiha.

¹⁵ Ndahaana ku lidaala lia Ziyoni uvutugi vwosi vwa lienyaa: ndigutiza avadaka valio nichukulia.

¹⁶ Ndagasiza avasaalisi valio mu viosi via vakora, kandi avandu valio valimba nukukuba isango kigira uvusangari.

¹⁷ Hene hano, ndakora mulala ku visukululwi va Daudi kuva mwami munene ligali; kandi ndalinda liamiiha liu mwami mutovole wange.

¹⁸ Ndakunika avasigu veve nizisoni zinene ligali, navuzwa uvwami vwivwe vulamedeka kandi vulagasizwa ligali.”