Zaburi 12 - KITABU KITAKATIFU

Lisaala kwenya vokonyi (12-13)

¹ O, Yahova, okokonye! Sihaveeyeho nu mundu kali mulala oveeye mulungi imbiri woovo mba, Avandu valungi vafeeye; avasuuvirifu sivanyala konyoleka hagati havandu mba.

² Vuli mundu avoora ovovehi ku wache, vagadana aveene naveene.

³ O, Yahova, kiringanyia vandu vavola uvugadi yava! Uhanyie minwa jimolomaa amakuva gu kwigingira nukovola.

⁴ “Kunyi kulaguuta na makuva gaturaa mu minwa jietu, kulavoola goosi ga kugananganaa, na sihaveeye ho nu mundu unyala kukugaya mba.”

⁵ Yahova avoora, “Navuzwa kalunu inzi ndaza, kigira avadaka vadambizwa, kandi avasalirizwa vakenya mu vuzunu. Inzi ndavaha likingwa liavenyaa.”

⁶ Makuva ga Yahova gaveeye giligali kandi gukusuuvirwa, gaveeye agiligali kuli izahabu isiyirwa mu kisambiru haali saba.

⁷ O, Yahova, ukukingi, kandi ukulindi ku likula lidamanu yili mihiga ni mihiga.

⁸ Avandu vachamu vaveeye havundu hoosi, na vuli mundu yizominya agaveeye madamanu.