Zaburi 119 - KITABU KITAKATIFU

Amalago ga Yahova

¹ Vaveeye nuvugasu avandu yavo vilimenya liavo liveeye vugira imbara; avamenyaa kolondekana ni lilaga lia Yahova.

² Vaveeye nuvugasu yavo avalondaa malago geege, avamuhulira nimioyo jaavo josi.

³ Sivakora uvudamanu kali hakuzu; vagenda mu zinzira zia Yahova.

⁴ O, Yahova, ivi umali kukuha malago googo, kandi wakovolera kugahuliri nu vusuuvirifu vwosi.

⁵ O, ndakegombi ndi mbe musuuvirifu. Ku lihulira malago googo.

⁶ Niiva ngumira malago googo goosi, sindaviikwa mu zisoni mba.

⁷ Ndakwizominya nu mwoyo mulungi lwa nzigaa malago googo matakatifu.

⁸ Ndahulira malago googo, sindagaleka mba!

Lihulira malago ga Yahova

⁹ Muyaayi anyala kulinda ndi limenya lilie live lirungi? Anyala kulinda mulihulira malago googo.

¹⁰ Ngerizaa kukutumikira nu mwoyo gwosi, unindi mburi kwibaala ku malago googo.

¹¹ Ndaviika lilaga liilio mu mwoyo gwange, kunangwa mburi kokora vwoni ku ivi.

¹² O, Yahova nzizominyaa ivi; unzigizi malago googo.

¹³ Ndiranira kuvoola vudinyu, amalago goosi ga umali kuhaana ku inzi.

¹⁴ Inzi sangala mu lilonda malago googo kuvita kuva nuvutugi vunyingi.

¹⁵ Ng'anagana ligali ku malago googo, mbenzerizaa amigizu googo ligali.

¹⁶ Nyanzilira malago googo ligali; sinyala kwivilira malago googo mba.

Kusangalira amalago ga Yahova

¹⁷ O, Yahova, ove mulahi ku inzi, mutumikiri woovo, kunangwa nduuki komenya nokolonda amigizu googo.

¹⁸ Ukunuli zimoni ziange, kunangwa nduuki kolola agiligali gokogenyia mu lilaga liilio.

¹⁹ Inzi mbeeye hano ku lirova ku ing'inga ngekeeke vuzwa; utavisa malago googo kutura ku inzi mba.

²⁰ Mbeeye nuvuha vonene; nyenya kumanya likalaga liilio zing'inga ziosi.

²¹ Ivi ogondokera avigingiri; leka yavo avatahuliraa malago googo valaamwe.

²² Omboholore kutura ku manyego gaavo kandi lilegwa liavo, kigira mali kulinda malago googo.

²³ Avamihi vaagana harara okolohiza kongolera vudamanu mu vwivisu. Navuzwa inzi ndaganagana ligali ku amigizu googo.

²⁴ Amigizu googo ganyanziza ligali; gambeezaa zing'anagani zindahi ligali.

Kugumira malago ga Yahova

²⁵ Mbeeye himbi kukuza; unzilanyili livamwoyo liange kuli umali kusuuviriza.

²⁶ Ndiiganira goosi ga ndakora na waandivulira. Nzigiza amalago googo.

²⁷ Ngonya kumanyiriza malago googo, na ndaganagana ligali ku amigizu googo gokogenyia.

²⁸ Mbeeye mu vovereri vonene ligali. Ombe zinguru kuli umali kusuuviriza.

²⁹ Undulizi kuzinzira zindamanu; na muvulahi vuvwo, unzigize malago googo.

³⁰ Mali kotovola kuva musuuvirifu; mali kolonda likalaga liilio.

³¹ O, Yahova, mali kolonda amigizu googo; utaleka mbikwi mu zisoni mba.

³² Ndahulira malago googo nu mwoyo gwosi, kigira ulamba limanyiriza linyingi ligali.

Lisaala liu kwenya limanya

³³ O, Yahova, unzigize kolonda malago googo; na ndagagumira kuduuka ku keheri.

³⁴ Ombe limanyiriza, kunangwa nduuki kuliinda amalago googo; kandi nduuki kugahulira nu mwoyo gwange gwosi.

³⁵ Unzimiliri mu zinzira zia malago googo, kigira nyooraa uvusangari mugo.

³⁶ Ombe uvuha vwu kuhulira malago googo, kuvita kuva nuvutugi.

³⁷ Undulizi kutura ku lihuliriza makuva ga vuzwa. Linda limenya liange, kuli umali kusuuviriza.

³⁸ Dukiza lisuuviriza liilio ku inzi mutumikiri woovo, lisuuviriza lia ulaga ku yavo avahulira ivi.

³⁹ Ombonyie kutura ku manyego gangoraa kuva muti. Likalaga liilio liveeye liokogenyia.

⁴⁰ Nyenya ligali kuhulira malago googo; ombe limenya lihia kigira ivi oveeye mulungi.

Kusuuvira malago ga Yahova

⁴¹ O, Yahova, umanyie vuyanzi vuvwo uvutaveeye nekeheri, kandi ombonyie kolondekana ni lisuuvirizwa liilio.

⁴² Kunangwa nduuki kutivulira yavo avanyegaa, Kigira inzi ndasuuvira likuva liilio.

⁴³ Ongole nduuki kovora agiligali vuli ing'inga, kigira lisuuvira liange liveeye mu likalaga liilio.

⁴⁴ Inzi ndahulira amalago googo kazozo, ndagagumira mihiga ni mihiga.

⁴⁵ Inzi ndamenya mu vovoholore vuduukiru, kigira ngelizaa kuhulira amigizu googo.

⁴⁶ Inzi ndalandiza amalago googo imbiri wa vami, Kandi si ndava ni zisoni mba.

⁴⁷ Inzi nyanza kuhulira amalago googo, kigira ngayaanzaa ligali.

⁴⁸ Mbana luyali kandi nyanza amalago googo; ndaganagana ku amigizu googo.

Lisuuvira mu amalago ga Yahova

⁴⁹ Wizulizi amalago googo ku inzi, mutumikiri woovo; gamali kumba lisuuvirizwa.

⁵⁰ Kali mu lisalirizwa liange ndaleminywa mwoyo gwange, kigira lisuuviriza liilio liamba vulamu.

⁵¹ Avandu vuluyayi vaandegeriza kazozo, navuzwa si ndaaleka amalago googo mba.

⁵² O, Yahova, nzizulizaa malago googo ga kale, kandi nyooraa lileminywa mwoyo ligali.

⁵³ Lwa ndolaa avachamu ni vavunaga amalago googo nzizulaa vutima ligali.

⁵⁴ Mu limenya liange liimbi mu lirova, nombaa zinyimbu kolondekana na malago googo.

⁵⁵ O, Yahova, nzizuliza ivi mu vudiku, kandi ng'anagana ku malago googo.

⁵⁶ Inzi nyooraa vusangali mu lihulira malago liilio.

Kuhaana Luyali ku malago ga Yahova

⁵⁷ O, Yahova, ivi wengine niyie wa nyenya; kandi ndagaa kuhulira amalago googo.

⁵⁸ Ngoteva nu mwoyo gwange gwosi, ombere zimbavasi kuli umali kusuuviriza.

⁵⁹ Mali kuganagana ligali ku miima jange, kandi ndagaa kolonda amigizu googo.

⁶⁰ Ngolaa vwangu vugira kulindagira kuhulira amalago googo.

⁶¹ Avandu vadamanu vamali kondega mutego, navuzwa si ndivilira amalago googo mba.

⁶² Mbuukaa mu vudiku hagati kukwizominya. Kigira likalaga liilio lirungi.

⁶³ Inzi mbeeye mulina wa yavo vosi avatumikiraa, kandi yavo vosi avahulira lilaga liilio.

⁶⁴ O, Yahova, lirova liosi lizuuyi vuyanzi vuvwo vwa kazozo; unzigize kolonda amalago googo.

Uvulahi vwa amalago ga Yahova

⁶⁵ O, Yahova, ivi umali kuduukiza lilagana liilio ku inzi, kandi oveeye mulahi ku inzi mutumikiri woovo.

⁶⁶ Ombe ovogeri kandi limanya kigira suuviraa mu malago googo.

⁶⁷ Lwa ndaali ningikiri konyoora amageri kutura ku ivi, ndakora uvudamanu, navuzwa kalunu mbulira likuva liilio.

⁶⁸ Ivi oveeye mulahi ligali kandi okolaa agaveeye malahi. Unzigizaa amalago googo!

⁶⁹ Avandu vu luyaayi vamali kuung'ina, navuzwa inzi nondaa amigizu googo nu mwoyo gwange gwosi.

⁷⁰ Avandu yava si vaveeye ni limanyiriza mba, navuzwa inzi nyooraa lisangala mu lilaga liilio.

⁷¹ Lihevwa mageri liange liali lilahi ku inzi, kigira liangola kwiga amalago googo,

⁷² Amalago ga wahaana gaveeye amalahi ligali ku inzi, kuvita mabesa goosi mu lirova.

Likalaga lirungi lia amalago ga Yahova

⁷³ O, Yahova, ivi wanomba kandi waniinda vulahi; ombe limanyiriza kunangwa nduuki kwiga amalago googo.

⁷⁴ Yavo avahaana uluyali ku ivi valasangala lwa vandora kigira suuviraa mu malagano googo.

⁷⁵ O, Yahova, inzi manya vulahi ndi likalaga liilio liveeye lirungi, kandi wamba amageri kigira oveeye musuuvirifu.

⁷⁶ Leka uvuyanzi vuvwo kazozo voneminye mwoyo, kuli umali kusuuviriza inzi mutumikiri woovo.

⁷⁷ Ombere zimbavasi na inzi nduuki kuva mwoyo, kigira inzi sangaliraa mu malago googo.

⁷⁸ Leka avandu vuluyayi vaviikwi mu zisoni kigira vamali kuung'ina ligali, navuzwa inzi ndaganagana ligali ku amigizu googo.

⁷⁹ Leka yavo avatizaa ivi vaze ku inzi, na vaduuki kumanya, amalago googo.

⁸⁰ Leka mwoyo gwange gove vugira imbara ku amalago googo, kunangwa mburi kuvikwa mu zisoni.

Lisaala kigira ovohonyi

⁸¹ O, Yahova, nduhi ligali nindiliraa ivi ombonyie, mbikaa lisuuvira liange mu likuva liilio.

⁸² Zimoni ziange ziiluhi kigira lihenzelera cha wandaga, lwa ndeva, “Ulangonya ng'inga ki?”

⁸³ Mbeeye vuzwa vugira vokonyi kuli imuuya yekeseero yiwaini isiuviiywi, navuzwa ngikiri kwivilira amalago googo.

⁸⁴ Ndalindilira kuduuka ng'inga ki? Ulahaana mageri ku yavo avadambizaa ng'inga ki?

⁸⁵ Avandu vigingiri avatahuliraa amalago googo, vamali kulima malina kondega.

⁸⁶ Malago googo goosi gaveeye gu kusuuvirwa; avandu vandambizaa novovehi, ongonye!

⁸⁷ Vaveeye ahimbi ligali kunzita, navuzwa inzi ngikiri koleka malago googo.

⁸⁸ Kigira vuyanzi vuvwo vutali ne keheri, yaanza ulindi livamwoyo liange, kunangwa nduuki kuhulira malago googo.

Lisuuvira mu amalago ga Yahova

⁸⁹ O, Yahova, likuva liilio lilahindiraa mihiga ni mihiga; lihindiraa mihiga ni mihiga mwigulu.

⁹⁰ Uvusuuvirifu vuvwo vuhindira mu makura goosi. Ivi umali kusingiriza lirova mu vogono vwalio nalio limenya.

⁹¹ Ku malago googo vilombe viosi viveeye ho kuduuka lero, kigira vindu viosi vikutumikiraa.

⁹² Amalago googo galavula kuva uvutangiliru vwu vusangali vwange, ngano ndakuza kuturana nuvusaliri vwange.

⁹³ Inzi sindaleka amigizu googo kali hakuzu, kigira umali kongola mbe mwoyo mugo.

⁹⁴ Inzi mbeeye woovo, ombonyie! Ngerizi ligali kuhulira malago googo.

⁹⁵ Avandu vadamanu valindilira kunzita; navuzwa inzi ndaganagana ligali ku malago googo.

⁹⁶ Mali kwiga ndi vuli kindu keveeye nekeheri chacho, navuzwa amalago googo gaveeye maduukiru ligali.

Kuyaanza Amalago ga Yahova

⁹⁷ O, inzi nyanza amalago googo ligali! Ng'anagana kugo umbasu gwosi.

⁹⁸ Amalago googo gaveeye niinzi kazozo, kandi gangoraa mugeri kuvita avasigu vange.

⁹⁹ Manyiriza kuvita avigizi vange, kigira ng'anagana ligali ku amigizu googo.

¹⁰⁰ Mbeeye ni limanyiriza linene ligali kuvita avasaakulu, kigira mbulira malago googo.

¹⁰¹ Mali kweleha ligali ku miima midamanu josi; kigira nyenya kuhulira likuva liilio.

¹⁰² Ngikiri koleka amigizu googo, kigira ivi umwene oveeye mwigizi wange.

¹⁰³ Amigizu googo gaveeye manolu ligali - amanolu ligali kali kuvita uvwuki!

¹⁰⁴ Nyooraa ovogeri kutura ku malago googo, nandio ndunyiraa miima midamanu josi.

Uvulavu kutura ku Amalago ga Yahova

¹⁰⁵ Likuva liilio liveeye itaya kunzimilira, kandi uvulavu kunzira yange.

¹⁰⁶ Ndalinda lilagana liange lie liesuuha, kuhulira amigizu googo gilikalaga lirungi.

¹⁰⁷ O, Yahova, uvusaliri vwange voveeye vwukutihiza ligali, unindi mbe mwoyo kuli umali kusuuviriza.

¹⁰⁸ O, Yahova vugilira lisaala liange lielisandiza, kandi unzigize amalago googo.

¹⁰⁹ Livamwoyo liange liveeye mu vuhimwa kazozo navuzwa ngikiri kwivilira amalago googo.

¹¹⁰ Avandu vachamu vaandegi umutego, navuzwa ngikiri kwibaala ku amalago googo mba.

¹¹¹ Amalago googo gaveeye miandu jange ji mihiga ni mihiga; gaveeye uvusangari vwu mwoyo gwange.

¹¹² Mali kotovola kuhulira amalago googo, kuduuka lidiku liandikuza. Mirembe mu malago ga Yahova.

¹¹³ Ndunyiraa ligali yavo avataveeye avasuuvirifu ku ivi, navuzwa nyanza Amalago googo.

¹¹⁴ Ivi oveeye mukingi wange kandi musooli wange. Mbikaa lisuuviriza liange mu lilagana liilio.

¹¹⁵ Tuli ku inzi munyi avoni. Inzi ndahulira malago ga Nyasaye wange.

¹¹⁶ Ombe zinguru kuli wasuuviriza na inzi ndava mwoyo; utaleka mbe esoni mu lisuuvira liange mba.

¹¹⁷ Ongonye na inzi ndahona, inzi ndahuliriza amalago googo kazozo.

¹¹⁸ Ivi usulaa sa mulala utahulira malago googo; zing'anagani ziavo zindamanu ziovovehi ziveeye zia vuzwa.

¹¹⁹ Ivi usiuvaa avadamanu vosi vu mu lirova kuli amandu vuzwa, kunangwa inzi nyanza amigizu googo.

¹²⁰ Mbeeye nuvuti vonene kigira ivi; nzizuuyi uvuti kigira likalaga liilio.

Lihulira lilaga lia Yahova

¹²¹ Inzi mali kokora agaveeye malungi kandi malahi, utaandeka mu makono ga vasigu vange mba.

¹²² Usuuvirizi ndi ulangonya, utaleka avasigu vange vaandambizi mba.

¹²³ Zimoni ziange ziiluhi ninindiliraa ovohonyi kutura ku ivi, kandi ninindiliraa uduukizi lisuuviriza liilio lirungi ku inzi.

¹²⁴ Okolere mutumikiri woovo kolondekana nu vuyanzi vuvwo vwa kazozo, kandi unzigize amalago googo.

¹²⁵ Inzi mbeeye mutumikiri woovo ombe ovogeri vwi limanyeriza, kunangwa nduuki kumanya amigizu googo.

¹²⁶ O, Yahova, ing'inga iduuki ivi kokora kindu, kigira avandu vavunagi amalago googo.

¹²⁷ Inzi nyanza amalago googo ligali, kuvita izahabu indahi ligali.

¹²⁸ kunangwa inzi nonda amigizu googo goosi, kandi ndunyiraa uvudamanu vwizing'ano ziosi.

Liegomba kuhulira Amalago ga Yahova

¹²⁹ Amigizu googo gaveeye gokogenyia, ngahuliraa nu mwoyo gwange gwosi.

¹³⁰ Livaala lia amakuva googo lihaana uvulavu ku avandu vovo, kandi lihaana limanyiriza ku avataveeye ni limanya.

¹³¹ Ndakunura munwa gwange nokoherana ligali, kigira nzegomba amalago googo.

¹³² Unziranili kandi ombere zimbavasi, kuli okolera yavo vosi avayaanzaa ivi.

¹³³ Ongole singiri vudinyu ligali kolondekana ni lilagana liilio ku inzi kandi utaleka uvudamanu vuunguuti mba.

¹³⁴ Ombonyie kutura ku yavo avandambizaa, kunangwa nduuki kuhulira amalago googo.

¹³⁵ Okole mumoni mumwo kong'ereng'ana ku mutumikiri vwovwo, kandi unzigize amalago googo.

¹³⁶ Zimoni ziange zidorokaa amaliga kuli migera ja amazi, kigira avandu si vahuliraa amalago googo mba.

Likalaga lirungi lia Amalago ga Yahova

¹³⁷ O, Yahova, ivi oveeye mulungi, kandi likalaga lia malago googo liveeye lirungi.

¹³⁸ Amalago gu mali kuhaana gaveeye amalungi, kandi amasuuvirifu ligali.

¹³⁹ Uvutima vwange vusamba kuli muliru, kigira avasigu vange si vahuliraa amalago googo mba.

¹⁴⁰ Lilagana liilio ku inzi liveeye lia giligali! Na inzi mutumikiri woovo ndaliyaanza ligali!

¹⁴¹ Inzi mbeeye mukekeeke ligali kandi wu kuchaywa, navuzwa si nziviriraa amigizu googo mba.

¹⁴² Uvulungi vuvwo vulahindira mihiga ni mihiga, kandi Amalago googo gaveeye ga giligali kazozo.

¹⁴³ Inzi nzizuuyi uvudinyu ni kivi kenene, navuzwa amalago googo galetaa uvusangari ku inzi.

¹⁴⁴ Amigizu googo gaveeye amalungi kazozo, ombe limanyiriza na inzi ndava mwoyo.

Lisaala kigira mirembe

¹⁴⁵ O, Yahova, nzanira ku ivi nu mwoyo gwange gwosi; undivuliri na inzi ndahulira amalago googo.

¹⁴⁶ Inzi nzanira ku ivi umbonyie, na inzi ndagumira amalago googo.

¹⁴⁷ Kali imbiri wi liuva nilikikiri kotonga, nzanira ku ivi ongonye, lisuuviriza liange liveeye mu lilagana liilio.

¹⁴⁸ Kali mu vudiku vwosi singonaa mba, ng'anagana ku lilagana liilio.

¹⁴⁹ O, Yahova, kigira uvuyanzi vuvwo sivoveeye ne keheri mba, yaanza uhuliri lisaala liange, ombere zimbavasi, kandi ombonyie.

¹⁵⁰ Avadambizi valulu visunda ahimbi niinzi ligali, avandu vatahulira Amalago googo kali hakuzu.

¹⁵¹ O, Yahova, navuzwa ivi oveeye ahimbi ni inzi, kandi amalago googo goosi gaveeye agiligali.

¹⁵² Kutura kale, inzi ndiiga kandi nimanyiriza amigizu googo, ivi wagaloomba gahindiri mihiga ni mihiga.

Kogoonya Nyasaye ahaane Ovokonyi

¹⁵³ O, Yahova, henza ku vusaliri vwange na ombonyie, kigira si nziviriraa amalago googo mba.

¹⁵⁴ Yaanza osoore mu kiyaalo na omboholore, ombonyie kuli umali kusuuviriza.

¹⁵⁵ Avandu vachamu si valahonywa mba, kigira si vahuliraa amalago googo mba.

¹⁵⁶ O, Yahova, zimbavasi zizio ziveeye zinene ligali; omberere kandi ombonyie.

¹⁵⁷ Mbeeye na vasigu kandi avadambizi vanyingi, navuzwa singirung'anaa kutura ku malago googo mba.

¹⁵⁸ Lwa ndolaa avazami yavo, mbihirirwa ligali, kigira si valinda amalago googo mba.

¹⁵⁹ O, Yahova, lola kuli nyanza amigizu googo. Ombonyie kigira vuyanzi vuvwo sivugirung'anaa mba.

¹⁶⁰ Kivuni cha malago googo keveeye cha agiligali, kandi likalaga liilio liveeye lirungi mihiga ni mihiga.

Lihanda ku Amalago ga Yahova nu mwoyo gwosi

¹⁶¹ Avandu vizingulu vanzingilira vugira kivuni, navuzwa inzi mbana luyali ku malago googo.

¹⁶² Mbeeye nuvuyanzi vonene kigira lisuuviriza liilio mbeeye nuvuyanzi kuli mundu onyoora vindu viuvuguli vonene ligali.

¹⁶³ Inzi ndunyiraa nukuvihilirwa ovovehi vwosi, navuzwa nyanza amalago googo.

¹⁶⁴ Ngusandizaa haali saba ku lidiku kigira likalaga liilio lirungi.

¹⁶⁵ Yavo avayaanzaa lilaga liilio vaveeye nimirembe midukiru; kandi sikeveeye ho ni kindu kinyala kuvakola vagwi mba.

¹⁶⁶ O, Yahova, nindiliraa ivi ombonyie, kandi ngolaa aga ivi ulaga ngole.

¹⁶⁷ Inzi mbulira amigizu googo, ngayaanzaa nu mwoyo gwange gwosi.

¹⁶⁸ Inzi mbulira amalago kandi amigizu googo; ivi ololaa vuli kindu cha inzi ngolaa.

Lisaala Liokwenya Ovokonyi

¹⁶⁹ O, Yahova, leka lilira liange kigira ovokonyi liduuki ku ivi! Ombe limanyiriza kuli umali kusuuviriza.

¹⁷⁰ Huliriza ku lisaala liange, na ombonyie kolondekana ni lisuuviriza liilio!

¹⁷¹ Inzi ndakwizominya zing'inga ziosi, kigira unzigizaa amalago googo.

¹⁷² Ndimba lwimbu ku malago googo, kigira gaveeye amalago malungi.

¹⁷³ O, Yahova, ove mwetegeku kongonya, kigira nondaa malago googo.

¹⁷⁴ O, Yahova, nzegomba ovohonyi vuvwo. Amalago googo gaveeye uvusangari vwange.

¹⁷⁵ Ombe uvulamu kunangwa nduuki kukwizominya; leka amigizu googo gangoonye.

¹⁷⁶ Ng'endagenda yiyi ni yiyi kuli ligondi liagota; hamba onzenye inzi mutumikiri woovo, kigira ngikiri kwivilira amalago googo mba.