Zaburi 116 - KITABU KITAKATIFU

Mundu wahonywa kutura mu likuza yizominyaa Nyasaye

¹ Nyanza Yahova kigira yambuliraa. Ahulirizaa lisaala liange.

² Nzanira Yahova kazozo, kigira ahuliraa lianira liange.

³ Uvuhimwa vwi likuza vwangumbiriza; uvutihizi vwi likuza vwangunika ligali. Uvuti nilihenda mwoyo vizura mu inzi.

⁴ Maku ndaanira ku Yahova, “O, Yahova, ngogonya ombonyie!”

⁵ Yahova aveeye wizimbavasi kandi umulahi. Nyasaye wiitu aveeye wilivererera.

⁶ Yahova akingaa avaveeye avadedekere, lwa ndaali mu vuhimwa yambonyia.

⁷ Ove nilielemeriza mu mwoyo gwange; kigira Yahova umali kongolera malahi ligali.

⁸ Yambonyia kutura mu likuza; yigalira maliga mu zimoni ziange, kandi naaninda mburi kwikigatira.

⁹ Kunangwa ndagenda imbiri wa Yahova; mu kivala cha vandu vaveeye mwoyo.

¹⁰ Ndaazizagilira kusuuvira, kali lwa ndavoora: “Inzi saliriziywi ligali.”

¹¹ Kali lwa ndaali nuvuti ndaavoora, “Siaveeye ho nu mundu unyala kusuuvirwa mba.”

¹² Nyara kuhaana ki ku Yahova, kigira uvulahi vwivwe vwosi ku inzi?

¹³ Ndahaana kihanwa chi iwaini ku Yahova, kumusandiza kigira yambonyia.

¹⁴ Ndatunga cha ndalaga ku Yahova, imbiri wa vandu veve vosi.

¹⁵ Likuza lia vatakatifu va Yahova, liveeye liuvukumi imbiri weve.

¹⁶ O, Yahova, inzi mbeeye mutumikiri woovo; ngutumikiraa vuzwa kuli mama wange yaandumikira. Ivi umali kombonyia kutura mu likuza.

¹⁷ Ndakuha kisiuviriru chi lisandiza, kandi ndahaana lisaala liange ku ivi.

¹⁸ Ndahaana viandalagana na Yahova, imbiri wa vandu veve vosi,

¹⁹ mu migize ji Litembeli lilie litakatifu, kandi hagati hi lidaala linene lia Jerusalemi. Mwizominye Yahova!