Zaburi 115 - KITABU KITAKATIFU

Nyasaye mulala wa Giligali

¹ Uvukumi vuduukana vuhaanwe ku ivi weng'ine O, Yahova, ku ivi weng'ine; navuzwa si gaali ku kunyi mba, kigira uvuyanzi vuvwo uvutali ne keheri, kandi uvusuuvirifu vuvwo.

² Kigira ki zihiiri ziteeve kunyi: “Nyasaye winyu aveeye haliha?”

³ Nyasaye wiitu aveeye mwigulu; akolaa choosi cha alalira.

⁴ Avanyasaye vaavo valombwa ku ifeza ni zahabu, valombwa na makono gavandu.

⁵ Vaveeye ni minwa navuzwa sivanyala komoloma mba; kandi vaveeye nizimoni navuzwa sivanyala kolola mba.

⁶ Vaveeye namatu navuzwa sivanyala kuhulira mba; kandi vaveeye namuulu navuzwa sivanyala kufunyiriza mba.

⁷ Vaveeye namakono navuzwa sivanyala kuhavatiza mba; kandi vaveeye nivirenge navuzwa sivanyala kogenda mba; kandi sivanyala kohelana nokomoloma mba.

⁸ Yavo avalomba vifananyi yivi kandi avasuuviraa muvio; vave kuli vifananyi via vamali kolomba.

⁹ O, munyi avandu va Isiraeli, musuuviri mu Yahova, Amukonyaa kandi amukingaa.

¹⁰ O, munyi vasaalisi va Nyasaye, musuuviri mu Yahova. Amukonyaa kandi amukingaa.

¹¹ Munyi avatizaa Yahova, musuuvire muye. Amukonyaa kandi amukingaa.

¹² Yahova yizuliza kunyi kandi alakugasiza; alagasiza avandu va Isiraeli kandi avasaalisi vosi va Nyasaye.

¹³ Yahova alagasiza sa mulala uhaanaa luyali kuye, avanene navakekeeke harara.

¹⁴ Yahova amugasize amuhe avana; munyi harara na visukululwi vinyu!

¹⁵ Yahova walomba ligulu nilirova, amugasize ligali.

¹⁶ Ligulu liveeye lia Yahova yeng'ine, navuzwa yahaana lirova ku vandu.

¹⁷ Avakuzu siviizominyaa Yahova mba, anoho yavo aviikaa mu kivala cha vakuzu.

¹⁸ Navuzwa kunyi avakoveeye mwoyo, kulahaana lisandiza kuye kalunu kandi ku mihiga ni mihiga. Mwizominyi Yahova!