Zaburi 109 - KITABU KITAKATIFU

Lielilira liu mundu oveeye mu vudinyu

¹ O, Nyasaye nzizominyaa ivi, utakiring'ana mba.

² Avandu vadamanu kandi avagaadi vamali kundulira ligali. Vavoola vovehi kigira inzi.

³ Vavoola ivindu vidamanu ligali ku inzi kandi vaanduliraa vugira kivuni.

⁴ Vahing'ana niinzi, kali niiva mbayaanzaa, kali ndio mbasaaliraa uvugasu.

⁵ Vandungaa uvudamanu ku vulahi vwa mbakoleraa, kandi vandungaa uvudunyi mbogono vwuvuyanzi vwange vwa mbakolera.

⁶ Otovole mukalagi mudamanu ayaalizi musigu wange, na oleke mulala ku vasigu veve mwene amuyaale.

⁷ Leka ayaalizwi na anyoleke kuva namahiolo; leka kali lisaala lilie livalizwi kuva livunaga lia malago!

⁸ Leka livamwoyo lilie liherizwi vwangu; kandi mundu wundi avuguli miyinzi jije.

⁹ Leka avana veve vagwi vavisandu, na mukali weve ave mukunzakali!

¹⁰ Leka avana veve vagendagende nivasavasava, leka vakungwi kutura mu mang'anye mwa vamenya!

¹¹ Leka yavo avamuvanzaa magovi vavuguli miandu jije josi; leka avageni valanye viosi via yaanzilira!

¹² Hatava ho nu mundu kali mulala umuvererera mba, anoho uvilukiza vavisandu mba.

¹³ Leka visukululwi vivie viosi vikuzi, kandi lieta lilie livihilirwi mu likula lizaa.

¹⁴ Leka Yahova yizuliza uvudamanu vwa vaguuga veve vaakora, kandi avuli kusamiiha uvwoni vwa mama weve kali hakuzu!

¹⁵ Leka Yahova yizulizi uvwoni vwavo kazozo, navuzwa yavo vene vivilirwi ligali ku lirova!

¹⁶ Mundu mudamanu oyo siyaganagana ku kuva mulahi ku vandi mba; yadambiza nukwita avadaka, avadambi na avataveeye ni lienyaliza.

¹⁷ Yayanza kulaama, leka naye alaamwe! Siayaanzaa kuhaana uvugasu mba, kandi atavaho numulala umugasiza mba!

¹⁸ Kuye lilaama liali vuzwa kuli lieviika inguvu. Leka vilaamo vivie mwene viinikwi mu muviri gwigwe kuli amazi, kandi viinikwi mu vigumba vivie kuli maguta!

¹⁹ Leka vilaamo yivio vimukuniki kuli inguvu, kandi vimuvondogane kuli lokova.

²⁰ Yahova haana mageri ku vandu yavo munzira yeyo. Yee kandi ku yavo avavolaa vindu vidamanu kuli yivi ku inzi!

²¹ Navuzwa, O, Yahova, Nyasaye wange, ongonye kuli umali kusuuviriza; ombonyie kigira uvulahi vwu vuyanzi vuvwo uvutaveeye nekeheri.

²² Inzi mbeeye mudaka kandi wilienya ligali; saliriziywi ligali kali kuduuka musi mwu mwoyo gwange.

²³ Mali kuvita kuli chiriri cha hamugorova; mbunguzwa yiyi ni yiyi kuli kiguguli.

²⁴ Amasigamo gange gaveeye madedekere kigira lihonga lilia, ndigaye vuzwa vigumba niligodo.

²⁵ Lwa vandu vandora, vasekeriza; Lwa vambeenzaa vasekeriza; vasung'usa mitwi jaavo mu lingolera kehenyahenye.

²⁶ O, Yahova, Nyasaye wange, ongonye ligali; ombonyie kigira uvulahi vwu vuyanzi vwuvwo vutali nekeheri.

²⁷ Okole avasigu vange vamanye ndi, ivi niyie ombonyia kazozo.

²⁸ Vanyara kunaama, navuzwa ivi ungasize. Leka avadambizi vange vaguutwi, kandi leka inzi mutumikiri woovo sangale!

²⁹ Leka vasigu vange vaviikwi mu zisoni zinene ligali; leka viviiki zisoni kuli iganza.

³⁰ Ndahaana lisandiza linene ku Yahova, ndamwizominya mu livugana linene liavandu veve,

³¹ Kigira Yahova akingaa avadaka, kandi avahonyiaa kutura ku yavo avavakalagiraa likuza.