Zaburi 107 - KITABU KITAKATIFU

KITABU CHA KATANO Zab. 107—150 Lizominya Nyasaye ku Vulahi Vwivwe

¹ “Musandizi Yahova, kigira aveeye mulahi, uvuyanzi vwivwe vuhindiraa mihiga ni mihiga!”

² O, munyi mwosi ava Yahova yahonyia, mwiranili kovora amakuva yaga, mu lizominya Yahova, umali kumuhonyia kutura ku vasigu vinyu,

³ kandi umali kumwiranyia kutura muvivala vigeni, Ivugwi kuduuka Imadioli, kandi kutura Ivaale kuduuka Isavaalu.

⁴ Avalala ku munyi vagendagenda mu changalangwe, navuzwa sivanyoola inzira yaavo yavaziira ku mu lidaala linene lia vamenya mu mba.

⁵ Vaali ni inzara kandi nuvuluhu, kandi vaakuza mioyo jaavo ligali.

⁶ Maku vanira Yahova kutura mu vudinyu vwavo, Yahova yavahonyia mu lidambizwa liavo.

⁷ Yahova yaavimilira kunzira inungi, kandi nivaduuka mu lidaala linene lia vaali vanyara komenya mu.

⁸ Kuduuka vasandizi Yahova kigira uvuyanzi vwivwe vutaveeye ne keheri, kandi kigira ku vindu viokogenyia viayavakolera.

⁹ Yahova ahaanaa amazi makindu ku yavo avaveeye nuvuluhu, kandi yigutizaa yavo avaveeye ni inzara ni viukulia vilahi.

¹⁰ Avalala ku munyi mwamenyaa mu kisundi kenene kandi mu chiriri chi likuza, mwali avahambe avavofa niminyororo jisalirizaa ligali.

¹¹ Kigira vaali niliebaala ku malago ga Nyasaye Wuvunyali, kandi vaali ni vachaaya amigizu geege.

¹² Vaaluha ligali kuturana ni miyinzi midinyu; kali vaali vanyara kugwa hasi vugira mundu wu kuvakonya.

¹³ Maku vanira ku Yahova mu vudinyu vwavo, na yavahonyia kutura mu kivi chavo.

¹⁴ Yahova yavatuliza mu kisundi kenene kandi mu chiriri chi likuza, kandi nakalanyia minyororo javavohaa.

¹⁵ Kuduuka vasandizi Yahova, kigira uvuyanzi vwivwe vutaveeye ne keheri, kandi kigira vindu vivie viokogenyia via yavakolera.

¹⁶ Avunaganyia viliango via avasigu vaavo, vialombwa nu mugasa, kandi yakalanyia miruguyu javio ji vivia.

¹⁷ Avalala kuvo vaali avasiru kigira uvwoni vwavo, kandi vasaalira ligali kigira uvudamanu vwavo.

¹⁸ Vavihilirwa kuchukulia choosi kulia, kandi visunda ahimbi ni virivwa vie likuza.

¹⁹ Maku vanira ku Yahova mu vudinyu vwavo, naye yavahonyia mu kivi chavo.

²⁰ Yahova yahonyia uvulwaye vwavo ku likuva lilie lia yamoloma, kandi naavahonyia kutura mu likuza.

²¹ Kuduuka avandu yavo vasandizi Yahova kigira uvuyanzi vwivwe uvutaveeye ne keheri, kandi kigira vindu vivie viokogenyia viayavakolera.

²² Kuduuka vamusandizi ni visiuviliru, kandi vamusandize ni zinyimbu ziu vusangali. Kigira vindu vivie viokogenyia via yavakolera.

²³ Valala veelema kunyanza mu zimeri, ni vakora miyinzi jaavo mumazi vaduuki kwenyolera lilia lia kazozo.

²⁴ Valora vikolwa via Yahova, kandi miyinzi jije jokogenyia mu luliva lwi inyanza.

²⁵ Yahova yahaana lilaga, kandi imbuza enene yaatanga kuhuuza ni induta enene ligali, kandi viguvuli nivitanga kwinuuya.

²⁶ Iviguvuli viahinulanyia zimeri munyanza. Kandi zieyina hasi mu luliva lwi inyanza. Avandu vaakuza mioyo ligali kigira vuhimwa vwavo.

²⁷ Vagenda ni vayekayeka yiyi na yiyi nukutagataga kuli avahambiku, vogeri vwavo kuli aveelemi vwali hazwa.

²⁸ Maku vanira ku Yahova mu vudinyu vwavo, naye yavahonyia kutura mu kivi chavo.

²⁹ Yahova yakiring'anyia kihuzuzi, kandi viguvuli vie inyanza viachiringana.

³⁰ Avandu vaali nu vusangali kigira inyanza yalengera, na Yahova yavahila ni mirembe kuduuka havundu ha vazizaa.

³¹ Avandu yava vasandizaa Yahova kigira aveeye wuvuyanzi vwivwe vutaveeye ne keheri, kandi kigira vindu vivie viokogenyia viayavakolera.

³² Kuduuka valandizi ovonene vwivwe mu livugana lia vandu vosi, kandi vahane lizominya ku Yahova imbiri wi livugana lia viimiliri.

³³ Yahova yakola migera kwuma ligali, kandi yigalira visinukiru via mazi niviivura kwituruka.

³⁴ Yakola kivala cha marova magunamu kuva kuli changalangwe chijumbi, kigira uvuchamu vwa vandu vamenya mucho.

³⁵ Yaagirunganyia viangalangwe kugwa madavalia ga mazi, kandi yakola kivala chumu kugwa visenukiru via mazi.

³⁶ Yaleka, avandu vi inzara ni vamenya yo, kandi vumbaka lidaala linene lio komenya mu.

³⁷ Valima milimi nivataga mizabibu, kandi vanyoola ligesa linene.

³⁸ Yahova yagasiza avandu veve ni vameedeka mu livulana ligali; kandi mitugu jaavo jameedeka ligali.

³⁹ Lwa vandu va Nyasaye vaguutwa na vasigu vaavo nu kuvikwa mu zisoni; va dambizwa ligali nukusalirizwa,

⁴⁰ Nyasaye yalegeriza avanene vavadambizaa, kandi yavakola vagendagende mu changalangwe.

⁴¹ Navuzwa Nyasaye ahonyia avadaka kutura mu vudinyu vwavo, kandi yakola avizinyumba ziavo komeedeka ligali kuli viayo via magondi.

⁴² Avalungi vasangala lwa valora yaga, navuzwa avachamu vosi vachiring'anywaa machiriri.

⁴³ Vosi avaveeye avageri, vaganagane ku makuva gi vindu yivi; kandi vaduuki kuganagana ku vuyanzi vwa Yahova vutaveeye ne keheri.