Zaburi 105 - KITABU KITAKATIFU

Nyasaye na avandu veve

¹ Musandizi Yahova, mulandizi ovonene vwivwe; muvoolere zihiiri chamali kokora.

² Mwimbiri Yahova zinyimbu ziu kwizominya; muvoore vindu viokogenyia viamali kokora.

³ Musangare ndi koveeye aveeve; Leka yavo avamusigamiraa vasangale.

⁴ Mwenyelerizi ovokonyi kutura ku Yahova wi zinguru mumusigamiri kazozo.

⁵ Mwizurizi vikolwa viokogenyia viamali kokora; mwizurizi vilolekizu vivie kandi likalaga lia yakalaga,

⁶ O, munyi visukululwi via Aburahamu mutumikiri weve; O, munyi visukululwi via Yakobo, mutovole weve!

⁷ Yahova aveeye Nyasaye wiitu; amalago geege gaveeye ni zinguru ku lirova liosi.

⁸ Alalinda lilagana lilie mihiga ni mihiga, aladuukiza lisuuviriza lilie ku makura elefu.

⁹ Alalinda lilagana lia yalomba na Aburahamu, kandi lisuuviriza lia yisuhira Isaka.

¹⁰ Yahova yalomba lilagana na Yakobo, nalio lilava ku Isiraeli mihiga ni mihiga.

¹¹ Yavoola, “Ndamuha kivala cha Kanaani, kilava miandu jinyu aveene.”

¹² Avandu va Nyasaye vaali vakekeeke mu livaliza, kandi vaali avageni mu kivala cha Kanaani.

¹³ Vagendagenda kutura mu kivala yiki kuduuka mu kivala kindi, kutura ku vwami vulala kuzia ku vundi.

¹⁴ Navuzwa Nyasaye siyaaleka ihiiri kali indala kuvadambiza mba. Yiganihiza avami yavo ukuvakinga.

¹⁵ Vavoola, “Mutasaliriza avatumikiri, vatovole vange mba; mutadiiri ku avaporofeti vange mba.”

¹⁶ Nyasaye yatuma inzara ku kivala chavo, kandi niyononyia viukulia viavo viosi.

¹⁷ Navuzwa yatuma mundu kuzia imbiri wavo, Josefu, uwaali niyagulizwa kuli mutugwa.

¹⁸ Vaamuvoha virenge ni minyororo, kandi iniira yikivia yavofwa mwigoti mwimwe,

¹⁹ kuduuka cha yaali niyaporofeta chadukizwa kuva chagiligali. Likuva lia Yahova liamulolekiza kuva mulungi.

²⁰ Maku mwami wa Egebeti yalaga Josefu avohololwe; Mwamihi wi zihiiri yamuvoholora.

²¹ Yamukola ave munene ukulinda uvwamihi vwivwe; Kandi yamukola mwamihi ku miandu jije josi;

²² yamuha zinguru kwimilira avanene veve kuli ayaanza; kandi yamuha uvunyali kwigiza vahaani vi zing'anagani.

²³ Maku Yakobo yazia mukivala cha Egebeti, kandi niyidikira mu kivala yicho.

²⁴ Nyasaye yaaha avandu veve avana vanyingi; kandi naavakola vizingulu ligali kuvita avasigu vaavo.

²⁵ Yalomba vandu va Egebeti kudunyira avandu veve, nokokolera avatumikiri veve uvugadi.

²⁶ Maku Nyasaye yatuma mutumikiri weve Musa, kandi Haruni, uwa yaali natovoye.

²⁷ Vaakora vilolekizu vinene hagati haavo. Kandi ni vakora viokogenyia mu Egebeti.

²⁸ Nyasaye yatuma kisundi ku kivala choosi, navuzwa vandu va Egebeti sivahulira lilaga lilie mba.

²⁹ Yaagirung'anyia migera jaavo kugwa musaahi kandi niyiita zisuzi ziavo ziosi.

³⁰ Kivala chavo chizula amakere, kali inyumba yu vwami yiizurwa nago.

³¹ Yalaga iziinji ni zinda kuduuma mu kivala choasi.

³² Yatuma imbura ya magina nizimbeni ku kivala chavo havogono hi imbura indahi.

³³ Yononyia mizabibu ni misaala ja makuyu kandi navunanyia misaala jindi josi.

³⁴ Yalaga zisigi kuza, kandi zimilioni ziazio zitanyala kuvalizwa.

³⁵ Zialia vitagwa viosi mu kivala; kandi zilia ligesa liavo liosi.

³⁶ Yita vayaayi vukutanga kwivulwa, vizinyumba ziosi zia Egebeti.

³⁷ Maku yimilira avandu va Isiraeli kutura ichova, vaginga ifeza ni zahabu, kandi vosi vaali avalamu kandi vizingulu.

³⁸ Avandu va Egebeti vavatia ligali, na vasangala lwa vaatura kuzia.

³⁹ Nyasaye yalaga lilesi igulu kukinga avandu veve, kandi yaleeta muliru kuhaana vulavu kuvo havudiku.

⁴⁰ Vateva inyama naye yavaletera zisindu. Yavaha migadi kutura mwigulu niviguta.

⁴¹ Yakunura ulwanda na mazi manyingi ganyinyuka. Giturukaa kuvitira mu changalangwe kuli mugera.

⁴² Nyasaye yizuliza lisuuviriza lilie litakatifu, ku Aburahamu, mutumikiri weve.

⁴³ Kunangwa yaatuliza avandu veve vatovole mu kivala yicho, kandi viimba nivahanzuka kigira uvusangari.

⁴⁴ Yavaha vivala via vandu vandi, kandi naleka nivavugura milimi jaavo.

⁴⁵ Kunangwa avandu veve vaduuki kuhulira malago geege, nukolonda malago geege. Mwizominye Yahova!