Zaburi 104 - KITABU KITAKATIFU

Lizominywa ku Yahova

¹ Nzizominyaa Yahova Nyasaye nu mwoyo gwange gwosi! O, Yahova Nyasaye wange, ivi oveeye munene ligali! Oveeye wu vukumi kandi wu luyali;

² Ivi wikunikaa nu vulavu kuli inguvu, Waavambula ligulu kuli lihema;

³ kandi wayala mialiru jinyumba yooyo igulu wa mazi. Kandi walomba amalesi kuva kuli amagare googo gi zibarasi, uziira ku zimbaha zie imbuza.

⁴ Ivi utumikira imbuza kuli avatumwa vovo, nolomemo lwu muliru kuli avatumikiri vovo.

⁵ Ivi wavika imise je lirova jadinya ligali, kandi sijiladengeyizwa mihiga ni mihiga mba.

⁶ Wakunika lirova na mazi ginyanza kuli inguvu, kandi amazi gakunikaa vigulu.

⁷ Lwa ogondokera amazi gaamanya gasalana; lwa gahulira mwoyo gwi ligondoka lilio, gasarana ligali ma gaazia ihale.

⁸ Giturukaa kutura mu vigulu gavitira mu mavoona, ma gaazia kuvunga havundu ha wagaloombera.

⁹ Ivi wavika ulwako ku mazi siganyala kuvita, kunangwa gavuli kuza ku lirova kandi mba.

¹⁰ Walomba visenukiru via mazi kuzia mu mavoona, kandi migera kwituruka hagati hi vigulu.

¹¹ Kunangwa zinyama ziu mu vulimu ziduuki kunwa amazi yaga; kandi zibunda ziduuki kunwa amazi no kogotiza uvuluhu.

¹² Amanyonyi gu mwigulu, gumbakaa zinyumba ziago ku misaala ahimbi na mazi yaga, gimbaa ku zisia zie misaala nu kusangalira amazi yaga.

¹³ Ivi ukubizaa imbura ku vigulu kutura mu ligulu, kandi kivala chizuuyi uvugasu vuvwo.

¹⁴ Ivi olomba vunyasi komera kigira mitugu, kandi olomba vitagwa komera kigira avandu, kunangwa avandu vaduuki konyoora viukulia kutura ku lirova,

¹⁵ kandi kuhaana iwaini kolomba avandu kuva nu vuyanzi, na amaguta ga mizeituni kolomba avandu kuva nu vusangali, kandi ingano na maveere kuhaana zinguru mu miviri.

¹⁶ Midaragwa ja Lebanoni jiveeye misaala ja Yahova mwene yaataga. Misaala yiji jinyoolaa amazi manyingi gi imbura.

¹⁷ Amanyonyi gumbakaa zinyumba ziago mu misaala yiji; kandi amagungu galombaa mu vomenyo vwago.

¹⁸ Zimburi ziu mu vulimu zimenyaa mu vigulu vitambi, kandi amakinieli gamenyaa mu zimbangaywa zia magina.

¹⁹ Ivi walomba umweli kumanyia zing'inga zie mieli; kandi walomba liuva kumanya ing'inga idukanaa liyere.

²⁰ Walomba uvudiku kandi kisundi, kunangwa zinyama ziosi ziu mu vulimu ziduuki gogenda mu nukwenya chukulia.

²¹ Zisimba zisoleri zihumaa lwa zihiimaa, nizigendagenda nizienyeleriza chukulia chazio kutura ku Nyasaye.

²² Lwi liuva litongaa zisimba zisoleri zilanaa kogona hasi mu zimbangaywa mwazio.

²³ Maku avandu vaturaa kuzia ku miyinzi jaavo, kandi vazizagilira kuyinzira kuduuka hamugorova.

²⁴ O, Yahova, ivi walomba vindu vinyingi! Walomba vindu viosi novogeri vonene ligali! Lirova liosi lizuuyi vilombe vivio.

²⁵ Haveeye ninyaanza enene kandi imambararu, vilombe vinyingi vinene kandi vikekeke vimenya umwene yimwo.

²⁶ Zimeri zielemaa kunyanza zana, kandi Leviazani, inyama enene yu munyanza ya ivi walomba, ikinaa mu.

²⁷ Vindu yivi viosi vieredaa ku ivi, uvihe chukulia ing'inga ya viveeye ni inzara.

²⁸ Ivi uvihezaa chukulia ma vilia ligali; uhaanaa viukulia ma viiguta.

²⁹ Lwa ugirung'ananga kutura kuvio vivezaa nu vuti ligali. Lwu utulizaa mwika gugwo kuvio vikuza ma virana ku luguchi kwa viatula.

³⁰ Navuzwa lwa ivi wilanyia mwika muvio, vivezaa ni livamwoyo kandi; kandi uhaanaa livamwoyo lihia ku lirova.

³¹ Leka uvukumi vwa Yahova vuhindiri mihiga ni mihiga; leka Yahova asangaliri viosi via yalomba.

³² Yahova ahenzaa ku lirova ma lidegera, kandi adiira ku vigulu ma vigulu vivuya umwochi,

³³ Inzi ndimbira Yahova mu livamwoyo liange liosi; ndimba zinyimbu ziu kwizominya Nyasaye wange lwa inzi mbeeye mwoyo.

³⁴ Leka muyaanzizi ni zing'anagani ziange, kigira lisaangala liange litulaa ku Yahova.

³⁵ Leka avoni vadivizwi kutura ku lirova; leka avachamu vavuli kuva ho. Nzizominyaa Yahova nu mwoyo gwange gwosi. Yahova yizominywe!