Zaburi 103 - KITABU KITAKATIFU

Vuyanzi vwa Nyasaye

¹ O, nzizominyaa Yahova nu mwoyo gwange gwosi, nizominyaa lieta lilie litakatifu!

² Nzizominyaa Yahova, kandi sindivilira viosi vilahi viayangoleraa mba.

³ Yahova asamiiha uvwoni vwange vwosi, kandi ahonyia uvulwaye vwange vwosi.

⁴ Yahova niye ombonyia kutura mu kilindwa, kandi angasizaa nu vuyanzi vwivwe vutaveeye ne keheri kandi zimbavasi.

⁵ Yahova yigutizaa livamwoyo liange ni vindu vilahi, kunangwa nduuki kuva muyaayi kandi wizingulu kuli indizu.

⁶ Yahova akalagira avadambi ni likaraga liu vulungi kandi avaheezaa uvulungi vwavo.

⁷ Yahova yavulira Musa lilohiza lie lisaavira lilie, kandi yaleka avandu va Isiraeli valore vikolwa vivie viokogenyia.

⁸ Yahova aveeye wi livererera kandi wu vuyanzi, aveeye wa galaha kuva nu vutima, navuzwa yayizula uvuyanzi vutaveeye ne keheri.

⁹ Si azizagiliraa kogondokera avandu veve mba; kandi sialava nu vutima mihiga ni mihiga mba.

¹⁰ Siahaanaa amageri ku kunyi kuli gakuduukiraa konyoole mba, kandi siakutungaa kolondekana nuvwoni anoho nu vudamanu vwitu mba.

¹¹ Uvuyanzi vwa Yahova vutaveeye ne keheri ku yavo vosi avamutizaa voveeye vonene ligali, kuli ligulu liveeye igulu ligali kutura ku lirova.

¹² Yahova atulizaaho uvwoni vwitu nu kuvuhira ihale ligali, kuli Ivugwi eveeye ihale kutura imadioli.

¹³ Yahova averereraa yavo avamutizaa, kuli baba averereraa avana veve.

¹⁴ Yahova amanya kuli kwalombwa; yamanya vulahi ndi kunyi kwalombwa kutura ku luguchi.

¹⁵ Kolondekana nu mundu wilikuza, lihindira lie livamwoyo lilie liveeye vuzwa kuli uvunyasi, avirukaa nukulaviza vulahi kuli kimuli chu mimulimi.

¹⁶ Navuzwa lwa imbuza ihuuzaa kucho, ma kimuli zana kitulaa ho ligali, kandi sikimanya kelolekaa kandi mba.

¹⁷ Navuzwa uvuyanzi vwa Yahova vuhindiraa mihiga ni mihiga ku yavo avamutizaa; kandi uvugasu vwivwe vuhindiraa ku makura goosi;

¹⁸ Kandi ku yavo avagumira lilagana lilie, kandi avahulira amalago geege nu vusuuvirifu vwosi.

¹⁹ Yahova yamala kusingiriza endeve yeeye yu vwami mwigulu; kandi yamiha ku vindu viosi.

²⁰ Mwizominyi Yahova, O, munyi zingelosi vizingulu kandi vuvunyali, avahulira amalago geege, kandi avahulirizaa aga avoolaa.

²¹ Mwizominyi Yahova, O, munyi avamahi geege gu mwigulu, munyi avatumikiri veve avakolaa uvulariri vwivwe.

²² Mwizominyi Yahova, O, munyi vilombe vivie viosi viveeye havundu hoosi aha yamiha. O, nzizominyaa Yahova nu mwoyo gwange gwosi.