Zaburi 102 - KITABU KITAKATIFU

Lisaala liu mundu udambizwa

¹ O, Yahova, hulira lisaala liange, kandi hulira lilira liange kigira ovokonyi!

² Utiivisa kutura ku inzi lwa mbeeye mu vudinyu mba! Umbulirizi na undivuliri vwangu lwa nzanira ku ivi.

³ Livamwoyo liange likamaa vuzwa kuli mwochi; Muviri gwange gwadukaa kuli muliru mu kisambiru chi vivia.

⁴ Nduvagiywi hasi kuli uvunyasi nu kwuma; Simbeeye nuvuha vwukulia chukulia mba.

⁵ Kuturana nilikenya liu vudinyu vwange, inyama yumuviri ihandi ku vigumba viange.

⁶ Mbeeye vuzwa kuli linyonyi liu mu changalangwe, kuli likuuli mu mang'anye.

⁷ Ng'onaa nimbenza vudiku vwosi; mbeeye kuli linyonyi lideerwa ku kesegese chinyumba.

⁸ Avasigu vange vanyega umbasu gwosi; yavo avangoleraa kehenyahenye vatumikira lieta liange mu lilaama.

⁹ Ndiza ligoke kuli chukulia, amaliga gazuganyiywi ni chukunwa change.

¹⁰ Kigira uvutima vuvwo vululu ni livihirirwa liilio, waambugula nukuusiuva ihale ligali.

¹¹ Livamwoyo liange liveeye kuli chiriri cha hamugorova; nialaa vuzwa kuli vunyasi.

¹² Navuzwa ivi O, Yahova, oveeye mwami mihiga ni mihiga. Amakura goosi galizuliza liela liilio mihiga ni mihiga.

¹³ Ivi ulasingira nokovererera Ziyoni zimbavasi; ing'inga iduuki yukulivera zimbavasi. Yiyi niyio ing'inga indahi idukanaa.

¹⁴ Avatumikiri vovo vayaanza lidaala yilio kali niiva liayononywa; valiverereraa kali niiva liveeye mu mang'anye.

¹⁵ Zihiiri valatia Yahova. Avami vosi vilirova valatia zinguru zizie.

¹⁶ Lwa Yahova aliumbaka Ziyoni vuhia; uvukumi vwo vonene vwivwe vulakaloleke ku avandu.

¹⁷ Alavugilira lisaala lia vadaka, kandi alahuliriza ku lianira liavo.

¹⁸ Ong'odere amakura gaaza cha Yahova amali kokora kunangwa avandu vakikiri kwivulwa valakamwizominye.

¹⁹ Yahova yahenza hasi kutura havundu hehe hatakatifu igulu, yahenza hasi ku lirova kutura mwigulu.

²⁰ Yahulira likenya lia vahambe, kandi yaavoholora yavo avaari nivakalagirwa likuza.

²¹ Nandio avandu valalandiza lieta lilie mu Ziyoni; kandi alizominywa mu Jerusalemi,

²² lwa zihiiri nu vwami vavugana harara nukusigamira Yahova.

²³ Yahova umali kongola mudedekere lwa ngikiri muyaayi; umali kwimbihiza livamwoyo liange.

²⁴ O, Nyasaye wange, utaambugula kalunu ningikiri kusakula mba. O, Yahova ivi uhindiraa mihiga ni mihiga.

²⁵ Ivi walomba lirova zing'inga zia kale ligali kandi walomba ligulu namakono googo umwene.

²⁶ Yivi viosi viladiva, navuzwa ivi ulahindira mihiga ni mihiga. Yivi viosi vilakunguha kuli inguvu. Ulavisiuva kuli zinguvu kandi vilagota;

²⁷ Navuzwa ivi oveeye mulala mwere kazozo, ni livamwoyo liilio siliheraa mba.

²⁸ Avana viitu valamenya mu mirembe, kandi isi wi likingwa liilio, visukululwi viavo vilamenya mu mirembe.