Zaburi 10 - KITABU KITAKATIFU

Lisaala kigira likalaga liuvulungi

¹ O, Yahova, kigira ki usingiraa ihale? Kigira ki wivisaa lwa koveeye mu vudinyu?

² Vachamu vigingiraa kandi vadambiza avadaka. Uvagumiri mu mitego ja vamali kolomba.

³ Mundu muchamu yiyizominyiraa ku likayirwa lilie lidamanu, mundu wi liegomba linyingi alaama kandi asuraa Yahova.

⁴ Mundu muchamu siahendera Yahova mwoyo mba; mu liegingira lilie, umudamanu aganagana ndi, “Nyasaye siaveeye ho.”

⁵ Umudamanu agasizwa mu viosi via akola sianyala kumanyiriza likalaga lia Nyasaye mba, kandi alegeliza avasigu veve.

⁶ Avoora mu mwoyo gwigwe, “Sinyala kusuundwa mba sindava mu vudinyu mihiga ni mihiga mba.”

⁷ Limoloma lilie lizuuyi vilaamo, vugadi kandi litihiza; aveeye mwangu kutivula makuva gi kivihiri kandi amadamanu.

⁸ Yivisa mu madaala kogoneka, aduuki kwita mu vwivisu avandu vatali niimbala. Asetaa nukuhima avadedekere.

⁹ Agonekaa machiriri mu ahukwivisa hehe kuli isimba. Agonekaa machiriri aduuki kuhamba vadaka. Agumiraa avadaka mu mitego jije nukuvakwesa.

¹⁰ Avadedekere vakutuulwa hasi, nukuduvulanywa; zinguru zinduru zivaguuti.

¹¹ Mundu muchamu avola mu mwoyo gwigwe, “Nyasaye yiiviriiyi! Amolizi zimoni zizie, na sianyala kondola mba!”

¹² O, Yahova, ahaanaa mageri ku vadamanu yavo! Utivilira yavo avadambizwa mba.

¹³ Umudamanu anyala ndi kuchaya Nyasaye nukwevolera umwene mumwoyo gwigwe, “Sianyala kumba mageri mba”?

¹⁴ Navuzwa ivi, O, Nyasaye, ololaa yavo avaveeye mu kivi nuvudinyu; na ivi ovezaa mwetegeku kuvakonya kazozo. Mundu mudedekere yiihanaa umwene ku Ivi, O, Nyasaye Wuvunyali, ivi okonyaa avavisandu kazozo.

¹⁵ Vunanyia zinguru zia vandu vachamu navadamanu; uvahe mageri malulu kigira uvudamanu vwa vamali kokora, kuduuka lwa vavura kovokola kandi.

¹⁶ Yahova aveeye Mwami mihiga ni mihiga, yavo avasigamiraa avanyasaye vandi, valatulizwa mu kivala chiche.

¹⁷ O, Yahova, ivi uhuliraa lisaala lia yavo avaveeye vahocha; ivi ulavadinyiriza.

¹⁸ Ivi ulahulira lianira lia avadambizwa navavisandu; ulavakalagila kolondekana ku vulungi vwavwo. Kunangwa avandu vatahindira mihiga ni mihiga vavuli kuvatihiza kandi mba.