Yohana 9 - KITABU KITAKATIFU

¹ Lwa Yeso yaali navitaa, yalora mundu mulala, uwaali niyiivulwa mboku.

² Aviigi veve vamuteeva “Mwigizi! Nivwaha wakola vwoni, mundu uyu, anoho aviivuli veve, ma ni yiivulwa mboku?”

³ Yeso yativura, “Livakula lilie yili siliveeye kigira yakola uvwoni anoho aviivuli veve mba, navuzwa yiivulwa mboku, kunangwa zinguru zia Nyasaye ziduuki kokora miyinzi muye havulavu.

⁴ Vukiri mbasu, gaduukanaa ngole miyinzi ja uyu uwanduma, kigira uvudiku vuzaa lwu mundu atanyala kokora miyinzi.

⁵ Ing'inga ya ngikiri mu kivala, mbeeye vulavu vwikivala.”

⁶ Lwa yamala kovora yaga, Yeso yatuuza amate mu marova, nazuganyia amate na marova nekedete chiche nalomba ovodohi, ma navaka ovodohi mu zimoni ziu mboku,

⁷ na muvooleraa, “Zia wisaave mu lidavalia lia Siloamu.” Kivuni chi lieta yili keveeye “Kutuma.” Kunangwa, mboku oyo yazia niyisaava, ma niyirana nalora.

⁸ Kunangwa, avatende veve na yavo avaari ni vamumanya maziambiri kuli mudaka musavasavi vavoola, “Uyu siaveeye mudaka ula ugiraa kwikala naasava?”

⁹ Valala kuvo vavoola, “Niyie.” Avandi vavoola “Awa! Navuzwa aveeye kuli niye.” Navuzwa uwaali mboku yavoola, “Ninzi!”

¹⁰ Vamuteeva, “Gaveeye ndi, zimoni zizio zinyoleki ndi kolola?”

¹¹ Naye yavativulira, “Mundu ulangwa Yeso, alombi ovodohi, naambaka muzimoni nambolera, ‘Zia wisaave mu lidavalia lia Siloamu.’ Kunangwa inzi ndaazia, ninzisaava, ma nindora.”

¹² Vamuteeva, “Aveeye hayi?” Naye yativura, “Inzi manyi mba!”

Avafarisayo vahenzeriza lihonywa liu mboku

¹³ Kunangwa vaahira mundu uwaali niyavakula oyo ku Avafarisayo.

¹⁴ Lidiku yilio liali lie Lisabato, lwa Yeso yalomba ovodohi nakunura zimoni ziu mundu oyo.

¹⁵ Kunangwa, Avafarisayo vateva mundu oyo kandi, “Onyooye ndi lilola?” Naye yavavolera, “Yambaki ovodohi mu zimoni, ninzia ninzisaava, ma kalunu ndolaa.”

¹⁶ Valala ku Avafarisayo vavoola, “Mundu uyu saiaveeye uwatula ku Nyasaye mba, kigira sialindaa Lilaga lie Lisabato mba.” Navuzwa avandi vavoola, “Mundu wu vwoni anyala kokora ndi vilolekizu ku yivi?” Vaali ni liavukana hagati haavo.

¹⁷ Avafarisayo vateva mboku oyo kandi, “Yee, ovola akohonyi livakula liilio; vulahi, ovola ki kuye?” Naye yavavolera, “Aveeye muporofeti!”

¹⁸ Avanene va Avayuda sivali vanyara kusuuvira ndi mundu uyu yiivulwa mboku na kalunu alolaa mba, kuduuka lwa valanga aviivuli veve.

¹⁹ Vateva aviivuli yava, “Uyu niyie mwana winyu wamuvoolaa yiivulwa mboku? Kalunu, anyooye ndi lilola?”

²⁰ Aviivuli veve vativura, “Kumanyi vulahi ndi uyu nu mwana wiitu, kandi yiivulwa mboku.

²¹ Navuzwa kuli aduuki kolola kunyi sikumanyi mba, anoho si kumanyi mundu umukunuyi zimoni zizie mba. Muteeve mwene; aveeye mundu muhindira, anyala kovora mwene.”

²² Aviivuli veve vavoola ndio kigira vaatia avanene va Avayuda kigira avanene yavo vaali nivavugilirizani ndi mundu woosi uwiyama havulavu ndi asuviraa Yeso kuva Mesia, alakungwa kutura mu Lisinagogi.

²³ Yiki nicho chagira aviivuli veve nivavoora, “Aveeye mundu muhindira, muteevi.”

²⁴ Kunangwa, valanga mundu waali mboku oyo haali kaviri nivavoora, “Ohe Nyasaye uvukumi. Kunyi kumanyi mundu okohonyi uyu aveeye mwoni.”

²⁵ Mundu zana oyo yativura, “Inzi simanyi niiva aveeye mwoni mba. Navuzwa manyi vuzwa kindu kilala! Ndaali mboku, na kalunu ndolaa.”

²⁶ Vamuteeva, “Yakola ki ku ivi? Yakohonyia ndi livakula liilio?”

²⁷ Mundu oyo yavativulira, “Inzi mali kumuvolera, navuzwa simwenya kuhuliriza mba. Kigira ki mwenya kuhulira kandi? Munyi kandi mwenya kuva aviigi veve?”

²⁸ Vaamunyega nivavoora, “Ivi oveeye mwigi weve; navuzwa kunyi koveeye aviigi va Musa.

²⁹ Kunyi kumanyi vulahi ndi Nyasaye yamoloma na Musa; navuzwa kulwu mundu uyu kali kunyi sikumanyi uwa atulaa mba.”

³⁰ Naye yavativulira, “Yiki ni kindu chokogenyia ligali! Munyi simanyi waatura mba, navuzwa yakunura zimoni ziange!

³¹ Kwamanya ndi Nyasaye siahuliraa avandu avoni mba, navuzwa ahuliraa mundu woosi umusigamiraa kandi okokora uvulariri vwivwe.

³² Kutura mulitanga lie livoora, gakiri kuhulirika ku mundu ku vosi uwahonyia mundu uwivulwa mboku mba.

³³ Galava ndi umundu uyu siyaatula ku Nyasaye, siyaali anyala kokora kindu choosi mba.”

³⁴ Vaamutivulira, “Ivi wivulwa kandi nuvilukizwa mu wvoni vonene, unyala ndi kwigiza kunyi?” Maku vamukunga kutura mu lisinagogi.

Livakula liu mu Roho

³⁵ Lwa Yeso yahulira ndi vamukungi, yavugana naye, namuteeva, “Ivi usuviraa mu Mwana wa Adamu?”

³⁶ Mundu oyo yamutivula, “Mwami, mbolera aveeye vwaha, kunangwa nduuki kumusuuvira!”

³⁷ Yeso yamuvolera, “Ivi umali kumulora, oyo niyie omoloma harara naivi kalunu.”

³⁸ Mundu oyo yavoola, “Mwami, suuviyi!” Ma nasigamira Yeso.

³⁹ Yeso yavoola, “Inzi ndaaza mu kivala kigira likalaga, kunangwa avavoku vaduuki kolola, na yavo avalolaa vaduuki kuvakula.”

⁴⁰ Valala ku Avafarisayo avaari ahimbi naye vahulira amakuva yaga, nivamuteeva, “Kali kunyi koveeye ndio kandi?”

⁴¹ Yeso yavativulira, “Mulava ni mwakaveeye avavoku, ngano si mwakaveeye nuvwoni; navuzwa kigira munyi muvooraa, Kunyi kololaa, yaga gavoora mukikiri voni.”