Yohana 8 - KITABU KITAKATIFU

¹ Navuzwa Yeso yazia mu Kiguru cha Mizeituni.

² Mugambazuri mumavwevwe, Yeso yirana mu Litembeli. Avandu vosi vazia kuye, nivamukumbiriza naye yikala hasi naavigiza.

³ Kunangwa, avigizi vi Lilaga na Avafarisayo valeta mukali mulala wa vanyoola naaheyaa. Vamusingiriza hagati haavo,

⁴ nivateeva Yeso, “Mwigizi! Mukali uyu kumunyooye naaheyaa.

⁵ Mu Lilaga lietu, Musa yalaga mukali kuli uyu alaswe namagina, navuzwa, ivi ovola ki kuye?”

⁶ Vavoola ndio kumugeriza, kunangwa vaduuki konyoora kindu chu kumuyalira ku. Navuzwa Yeso yinama hasi, na ng'oda mu marova ne kedete chiche.

⁷ Lwa vazizagilira kumuteeva, Yeso yasingira, navavoolera, “Mundu utaveeye ku nuvwoni ku munyi ave wukutanga ku mulasa ligina.”

⁸ Yirana kwinama hasi kandi nang'oda mu marova ne kedete chiche.

⁹ Navuzwa lwa vahulira yaga, vatanga kuzia mulala sa mulala kutangilira na vakulundu kuvo vosi. Yeso yaatigara yenyine, nu mukali oyo naakisingiyi imbiri weve.

¹⁰ Lwa Yeso yasingira yahenza navolera mukali oyo, “Mukali, vaveeye hayi avandu avakukuyaalaa? Avuli ho kali mulala ukukalagiyi?”

¹¹ Mukali oyo yamutivulira, “Mwami, sihaveeyeho nu mundu kali mulala!” Yeso yamuvolera kandi, “Inzi kandi singukalagira mba. Zia, na kutura kalunu uta kola vwoni kandi mba.”]

Yeso nuvulavu vwi lirova

¹² Yeso yavavolera kandi, “Inzi niyie uvulavu vwa avumukivala. Uyu onondaa sialagenda mu kisundi mba, navuzwa alava nu vulavu vuhaana livamwoyo.”

¹³ Kunangwa, Avafarisayo vamuvolera, “lvi welolekiza mwene. Lilolekiza liilio si liveeye liagiligali mba.”

¹⁴ Yeso yavativulira, “Kali niiva nzelolekiza inzi mwene, lilolekiza liange liveeye lia agiligali kigira inzi manyi wandatula nu wanzizaa. Navuzwa munyi simumanyi wandatula kandi wanzizaa mba.

¹⁵ Munyi mukalagaaku zing'anagani zia avandu, navuzwa inzi singalagiraa mundu kali mulala.

¹⁶ Kali ningalaga, likalaga liange liveeye liagiligali kigira siaveeye inzi weng'ine ukalaga mba. Navuzwa Baba wanduma aveeye ha lala nainzi.

¹⁷ Gang'odwa mu lilaga lienyu ndi lilolekiza lia avandu vaviri liveeye liagiligali.

¹⁸ Inzi nzelolekiza mwene, naye Baba wanduma andolekizaa kandi.”

¹⁹ Kunangwa vamuteeva, “Baba woovo aveeye hayi?” Yeso yavativulira, “Munyi si mu mananyi inzi, kandi simumanyi anoho Baba wange mba. Mulava ni mwamanya ngano mwamanya Baba wange kandi.”

²⁰ Yeso yamoloma amakuva yaga ahimbi na havundu ha masandugu ga mabese gaviikwa lwa yaali niyigizaa mu Litembeli. Na sihaaliho nu mundu wamugumira mba, kigira ing'inga yeeye yaali nikikiri kuduuka.

Wa nziza, si munyala kuzia yo mba

²¹ Yeso yavolera Avafarisayo kandi, “Inzi nziza ihale na munyi mulakanyenye, navuzwa mulakakuziri mu vwoni vwinyu. Wanzinzia simunyala kuuza yo mba.”

²² Kunangwa, avanene va Avayuda veteeva, “Aliyiita mwene? Kigira ki avoora, ‘Wanzizaa munyi simunyala kuduuka yo mba?’ ”

²³ Yeso yavativulira, “Munyi muveeye avandu va hasi mu kivala yiki, navuzwa inzi nduraa igulu mwigulu. Munyi muturaa mu kivala yiki, navuzwa inzi sindulaa mu kivala yiki mba.

²⁴ Yiki nicho kivuni chagira nimuvoolera ndi, mulakakuziri mu vwoni vwinyu. Mulakakuziri mu vwoni vwinyu niiva si musuuviraa ndi ‘Inzi mbeeye wa inzi mbeeye.’ ”

²⁵ Navo vamuteeva, “Ivi nivwaha?” Yeso yavativulira, “Inzi mbeeye kuli wa ndamuvolera kutura mulitanga!

²⁶ Mbeeye na amanyingi kovora ku munyi kandi amanyingi agukukalagira munyi. Navuzwa Oyo uwanduma aveeye uwiligali, kandi inzi mbolera kivala aga ndahulira kutura kuye vuzwa.”

²⁷ Si vamanyiriza ndi Yeso yamoloma kuvo kigira Baba weve mba.

²⁸ Kunangwa Yeso yavavolera, “Lwa muliiva nimwakaginga Mwana wa Adamu igulu ku musalaba, ulwene yilwo nilwo lwa mulimanya ndi, ‘Inzi niyie,’ kunangwa mulakamanye ndi inzi sinyala kokora kindu choosi ku vunyali vwange mwene, navuzwa mboraa vuzwa aga Baba yanzigiza geng'ine.

²⁹ Oyo wanduma aveeye harara nainzi kandi; kigira akikiri kondeka nzieng'ine, kigira ngolaa kazozo aga muyaanzizaa.”

³⁰ Lwa yavoola yaga, avandu vanyingi vamusuuvira.

Agiligali galamuha ovovoholore

³¹ Kunangwa, Yeso yavolera Avayuda yavo avaari nivamusuuviyi, “Niiva mulagumira amigizu gange mulava ligali aviigi vange;

³² mulamanya agiligali, na agiligali zana galamukola muve avavoholore.”

³³ Navo vativura, “Kunyi koveeye visukululwi via Aburahamu, kandi kunyi kukiri kuva avatugwa vu mundu woosi mba. Gaveeye ndi ivi ovola, ‘Mulava no vovoholore?’ ”

³⁴ Yeso yavativulira, “Agiligali muvooleraa, mundu ku vosi okola uvwoni aveeye mutugwa wu vwoni.

³⁵ Mutugwa siaveeye novomenyo vwu kuhindira munyumba mba, navuzwa mwana aveeye novomenyo vwi mihiga ni mihiga.

³⁶ Kunangwa, niiva Mwana wa Nyasaye alamuha vovoholore, mulava avavoholore ligali.

³⁷ Manyi vulahi ndi muveeye visukululwi via Aburahamu. Kali ndio, mwenya kunzita kigira simuvugiliraa amigizu gange komenya mu munyi mba.

³⁸ Inzi mboraa aga Baba amali kumanyia, navuzwa munyi mukoraa aga vaguuga vinyu vamuvolera.”

³⁹ Vaamutivulira, “Baba wiitu ni Aburahamu!” Yeso yavavolera, “Munyi mulava avana va Aburahamu ngano mwakakoli kuli Aburahamu yakola.

⁴⁰ Navuzwa munyi mwenya kunzita, kigira muvooleraa agiligali ga ndahulira ku Nyasaye; yaga sigaveeye aga Aburahamu yakola mba.

⁴¹ Munyi mukoraa aga avaguuga vinyu vaakora.” Navo vamuvolera, “Kunyi sikoveeye avana vindasimba mba! Koveeye na Baba mulala, naye ni Nyasaye.”

⁴² Yeso yavavolera, “ Nyasaye alava Baba winyu, ngano mwayinyanza, kigira ndaatula ku Nyasaye na kalunu mbeeye hano. Sindaaza ku vunyali vwange mwene, navuzwa Nyasaye yanduma.

⁴³ Kigira ki simuhuliraa agambooraa? Kigira ki munyi si munyala kuhulira likuva liange?

⁴⁴ Munyi muveeye avana vababa winyu Setani, nu uvulariri vwinyu ni okokora likayirwa lia baba winyu. Oyo yaali mulumindi kutura mulitanga kandi sianyala kusingira kolovega lwa agiligali mba, kigira agiligali sigaveeye muye mba. Choosi ichavoolaa cho vovehi avoora kuturana ni liiva lilie lia yalombwa nalio, kigira aveeye muvehi kandi ni baba wovovehi.

⁴⁵ Inzi mboraa agiligali, na nicho kivuni kigira munyi muvura kusuuvira.

⁴⁶ Nivwaha ku munyi unyala kundolekiza ndi mbeeye nuvwoni? Kunangwa, niiva mboraa agiligali, kigira ki musuraa kusuuvira?

⁴⁷ Uyu oveeye wa Nyasaye ahuliraa amakuva ga Nyasaye. Navuzwa munyi muvura kugahulira kigira munyi simuveeye avandu va Nyasaye mba.”

Yeso yaali ho imbiri wa Aburahamu nakikiri kotovolwa

⁴⁸ Avayuda vateva Yeso, “Si koveeye vulungi lwa kovora ndi ivi oveeye Musamaria, kandi oveeye nilidemoni?”

⁴⁹ Yeso yativura, “Inzi simbeeye nilidemoni mba, navuzwa nguminyaa Baba wange, navuzwa munyi si munguminyaa.

⁵⁰ Inzi si nzeyenyeraa uvukumi vwa nge mwene mba. Navuzwa mulala aveeye ho mulala we nyererizaa kandi akalagaa.

⁵¹ Agiligali muvooleraa, ugumira amigizu gange sialakuza mba.”

⁵² Avayuda vamuvolera, “Kalunu kumanyi agiligali ndi ivi oveeye ni lidemoni! Aburahamu yakuza, kandi avaporofeti vaakuza, navuzwa ivi ovola, ‘Ku vosi ugumira amigizu gange sialakuza mba!’

⁵³ Ivi wekolaa kuva munene ligali kuvita baba wiitu Aburahamu? Oyo yakuza kandi avaporofeti vaakuza. Wekolaa ivi mwene kuva vwaha?”

⁵⁴ Yeso yavativulira, “Niiva inzi nzikuminyaa mwene, uvukumi vwange sivoveeye kindu. Baba wange wa munyi muvooraa ni Nyasaye winyu, niyie unguminya.

⁵⁵ Munyi mukiri kumumanya, navuzwa inzi mumanyi vulahi. Niiva ndakavooye si mumanyi vulahi ndakaveeye muvehi kuli munyi. Navuzwa inzi mumanyi vulahi kandi ngumira likuva lilie.

⁵⁶ Aburahamu baba winyu yasangala kolola lidiku lie liza liange; yalilola kandi yayanza.”

⁵⁷ Kunangwa, Avayuda vamuvolera, “Ivi ukikiri kuduuka mihiga amusini, na ovola walola Aburahamu?”

⁵⁸ Yeso yavavolera, “Agiligali muvooleraa, imbiri wa Aburahamu akikiri kwivulwa, inzi ndaali ho.”

⁵⁹ Kunangwa vadoola amagina nivenya vamulase, navuzwa Yeso yiivisa, natura mu Litembeli.