Yohana 6 - KITABU KITAKATIFU

Yeso Yalihiza avandu zielefu zitano

¹ Inyima wa yaga, Yeso yambuka inyanza ya Galilaya eveeye ni lieta lindi Inyanza ya Tiberia.

² Kiduma kenene cha avandu cha mulonda kigira vaali nivaloli vilolekizu via yaali naakori ku avaari valwaye.

³ Yeso yanigira ku kiguru, niyikara harara na aviigi veve.

⁴ Lisavo lia Avayuda lilangwa Lipasaka liali ahimbi.

⁵ Kunangwa, lwa Yeso yalora kiduma cha avandu nikizaa kuye, yavolera Filipo “Kugura hayi migadi avandu yava vaduuki kulia?”

⁶ Yavoola yaga kogeriza Filipo, kigira yaali namanyi ichokokola.

⁷ Filipo yamutivulira, “Migadi ji zidinari zimia ziviri sijinyala kuduuka avandu yava mba, kali niiva samulala anyoora kedonye kekekeeke vuzwa!”

⁸ Mulala ku aviigi veve ulangwa Andereya, amwavo Simoni Petero, yamuvolera,

⁹ “Aveeye hano muyaayi mulala oveeye ni migadi jitano ji shairi ni zisuzi ziviri; navuzwa yivi sivinyala kuduuka avandu vanyingi kuli yava mba.”

¹⁰ Yeso yavolera aviigi veve, “Voleli avandu viikare hasi.” Vwali ho uvunyasi vunyingi ha zana yaho. Avandu viikara avaduuka avasaza zielefu zitano.

¹¹ Yeso yavugula migadi yijo, nasandiza Nyasaye, najihaana jigavulirwi avandu vaali nivikaye; yakola ndio kandi ni zisuzi, vuli mundu yanyoora kuli yenya.

¹² Lwa avandu vaali nivakiguta, Yeso yavolera aviigi veve, “Vungizi amadonye gatigaye gavuli kwoneka.”

¹³ Kunangwa, vavungiza amadonye gi migadi ji ishairi agatigala ku aga avandu valiza. Vizuliza vihinda likomi na viviri.

¹⁴ Lwa avandu valora kelolekizu yiki icha Yeso yakola, vavoola, “Ligali uyu niyie muporofeti zana uzaa mu lirova.”

¹⁵ Lwa Yeso yamanya avandu vetegeka kuuza kumuvugula kuzingulu vamukole Mwami Munene, yatura kandi, nazia mu Kiguru yenyine.

Yeso Yagenda ku amazi

¹⁶ Lwu mugolova gwaduuka, aviigi va Yeso vasulunguta kuzia ku inyanza,

¹⁷ nivanina mu liato, kandi nivambuka kuzia Kaperinaumi. Ing'inga yaali ni yakamwama, na Yeso yaali nakiri kuduuka kuvo.

¹⁸ Inyanza yaatanga kokora viguvuli kigira imbuza enene yaali nihuzaa.

¹⁹ Lwa aviigi vaali nivakazia ahimbi zikilomita zitano anoho sita, valora Yeso nagenda ku mazi, ni yaazaa ahimbi ku liato. Vaatia ligali.

²⁰ Yeso yavavolera, “Ninzi, mutatia mba!”

²¹ Maku vaali nuvuyanzi kuvugura Yeso nukumuviika mu liato; nonoho, liato liaduuka ku lujinga lwi kivala cha vazizaa mu.

Avandu venya Yeso

²² Lidiku lialonda ku, kiduma kenene cha avandu avaari nivatigaye kolovega lundi lwinyanza vamanya ndi liali ho liato lilala vuzwa. Yeso yaali nakiri kwingira mu liato harara na aviigi veve, nitali aviigi yavo vazia veng'ine nivamuleka.

²³ Amato gandi kutura Tiberia gaduukaa havundu yaho ha avandu vaali nivaliriyange migadi yijo, inyima wu Mwami yaali niyakasandiza Nyasaye.

²⁴ Lwa avandu yavo vamanya ndi Yeso harara na aviigi veve sivaveeyeho, vanina aveene mu maato nivazia Kaperinaumi, kwenya Yeso.

Yeso aveeye mugadi gwi livamwoyo

²⁵ Lwa avandu yavo vanyoola Yeso kolovega lundi lwi inyanza vamuteeva, “Mwigizi, uduuki hano ng'inga ki?”

²⁶ Yeso yavativulira, “Muvooleraa agiligali, simunyenyaa kigira muloli vilolekizu, navuzwa kigira muliiyi migadi nimwiguta.

²⁷ Mutayinziliri viukulia vioneka; navuzwa muyinziliri viukulia vimenya kuduuka ku livamwoyo litahera mba. Yivi nivio viukulia viu Mwana wa Adamu alimuha; kigira Baba Nyasaye umali kuviika muhuri gwi livugilirwa kuye.”

²⁸ Kunangwa vamuteeva, “Gakuduukiraa kokole ki kunangwa kove nikokola miyinzi ja Nyasaye?”

²⁹ Yeso yavativulira, “Yigu nigwo muyinzi gwa Nyasaye yenya mukore, musuuviri mu uyu uwa yatuma.”

³⁰ Vamuvolera, “Ulakola kelolekizu ki kolole, ku kuduuki kusuuvira ivi? Ulakola ki?

³¹ Avaguuga viitu valia amaana mwigendanyama, kuli Amang'oda Matakatifu gavoora ‘Yavaha mugadi kutura mwigulu valie.’ ”

³² Yeso yavavolera, “Muvooleraa Agiligali, si yaali Musa uwamuha mugadi kutura mwigulu mba navuzwa; ni Baba wange niyie umuheezaa mugadi gwa agiligali kutura mwigulu.

³³ Kigira mugadi gwa Nyasaye ahaanaa goveeye uyu uturaa mwigulu kandi uhaana livamwoyo ku avumukivala.”

³⁴ Kunangwa, vamuvolera, “Mwami, haana mugadi yigu ku kunyi kazozo.”

³⁵ Yeso yavavolera, “Inzi niye mugadi gwi livamwoyo. Uyu uza ku inzi sialiva ninzara mba. Uyu usuviraa inzi sialiva nu vuluhu mba.

³⁶ Navuzwa kuli ndaamuvolera ndi mumali kondola, navuzwa mukiri kusuuvira inzi.

³⁷ Vosi ava Baba ambezaa valaza ku inzi; nainzi sindakunga mundu woosi uza ku inzi mba.

³⁸ Kigira inzi sindaaza kutura mwigulu kokora uvulariri vwange, navuzwa kokora uvulariri vwa oyo uwanduma.

³⁹ Voveeye uvulariri vwa oyo uwanduma ndi mburi kogotiza mundu kali mulala ku yavo ava yamba, navuzwa mbasimugukizi vosi ku lidiku liu kumaliriza.

⁴⁰ Icha Baba wange yenya keveeye ndi, vosi avalolaa Mwana na vaduuki kumusuuvira valava ni livamwoyo litahera mba. Kandi inzi ndavasimugukiza kandi ku lidiku liu kumaliriza.”

⁴¹ Avandu vatanga kwigana kigira yavoola ndi, “Inzi nigwo mugadi gwatura mwigulu,”

⁴² kunangwa vavoola, “Uyu siaveeye Yeso mwana wa Josefu, wa baba na mama weve va kunyi kumanyi? Anyala ndi kovora, ‘Mali kwika kutura mwigulu?’ ”

⁴³ Yeso yavavolera, “Leki kwigana aveene.

⁴⁴ Sihaveeye ho nu mundu unyala kuuza ku inzi, uwa Baba wanduma akikiri koleta ku inzi. Inzi ndasimugukiza mundu oyo ku lidiku lie keheri.

⁴⁵ Gang'odwa mu vitabu via avaporofeti, ‘Nyasaye aligiza avandu vosi.’ Vuli mundu uhulira Baba na ukwiga kutura kuye, yaazaa ku inzi.

⁴⁶ Sihaveeye ho nu mundu uwalola Baba, natali uyu uturaa ku Nyasaye; uyu yenyine yalora Baba.

⁴⁷ Muvooleraa agiligali, uyu usuviraa, aveeye ni livamwoyo litahera mba.

⁴⁸ Inzi mbeeye mugadi gwi livamwoyo.

⁴⁹ Avaguuga vinyu valia imaana mwigendanyama, navuzwa vaakuza.

⁵⁰ Yigu nigwo mugadi gutulaa mwigulu, mundu nalia kugwo, sialikuza mba.

⁵¹ Inzi mbeeye mugadi goveeye mwoyo, ugwatula mwigulu. Mundu ku vosi nalia mugadi yigu, alava ni livamwoyo litahera mba. Mugadi gwa ndihaana kigira livamwoyo lia avumukivala goveeye muviri gwange, ugwa mbana kigira livamwoyo lia avumukivala.”

⁵² Maku Avayuda vatanga kuhangalizana aveene naveene nivavoora, “ Mundu uyu anyala ndi kukuha inyama yu muviri gwigwe kulie?”

⁵³ Yeso yavavolera, “Muvooleraa agiligali, nimutalia muviri gwu Mwana wa Adamu kandi munwi amasahi geege, si muveeye ni livamwoyo mba.

⁵⁴ Uyu uliizaa muviri gwange nukunwa amasahi gange aveeye ni livamwoyo litahera mba, ninzi ndamusimugukiza ku lidiku lie keheri.

⁵⁵ Kigira muviri gwange goveeye chukulia chi ligali, na amasahi gange gaveeye chukunwa chi ligali.

⁵⁶ Uyu ulia muviri gwange nukunwa amasahi gange, amenyaa mu inzi nainzi menyaa muye.

⁵⁷ Baba oveeye mwoyo yanduma, kandi kigira ye; inzi mbeeye mwoyo. Munzira ndala nzere ku vosi ulia inzi amenyaa kigira inzi.

⁵⁸ Maku, yigu nigwo mugadi gwatura mwigulu; sigoveeye mugadi gwa avaguuga vinyu valia nivakuza mba. Uyu ulia mugadi yigu alava ni livamwoyo litahera mba.”

⁵⁹ Yeso yavoola agene yago lwa yaali ni yigizaa mu lisinagogi lia Kaperinaumi.

Amakuva galetaa livamwoyo litahera mba

⁶⁰ Lwa avanyingi ku aviigi veve vahulira yaga, vavoola, “Yaga na amigizu amadinyu! Nivwaha unyala ku gahuliriza?”

⁶¹ Navuzwa Yeso vugira kovolerwa nu mundu woosi, yamanya mwene ndi aviigi veve vigaana kigira yaga, kunangwa yavateva, “Livoora yili limulomba kwikigatira?

⁶² Galakave ndi, niiva mulilora Mwana wa Adamu ni yanigira kuzia uwa yaali maziambiri?

⁶³ Roho wa Nyasaye niyie uhaanaa livamwoyo, zinguru ziu mundu si zinyala kindu mba. Amakuva ga inzi mali kumuvolera nigo galetaa Roho wa Nyasaye galetaa Roho wa Nyasaye uhaanaa livamwoyo.

⁶⁴ Navuzwa vaveeye ho valala ku munyi avatasuuvira.” Yeso yamanya kutura mu litanga ni vanga vwaha avatasuuvira, kandi nivwaha ulimuzaama.

⁶⁵ Yameda kovora, “Yiki nicho kivuni ichagira nimuvoolera, ndi avula ho mundu unyala kuuza ku inzi Baba wange natamutovoye.”

⁶⁶ Kigira yaga, avanyingi ku aviigi va Yeso viirana inyima ni vavura kogenda naye kandi.

⁶⁷ Kunangwa, Yeso yateeva avaari likomi na vaviri, “Munyi kandi mwenya kuzia?”

⁶⁸ Simoni Petero yativura, “Mwami, kuzie ku vwaha? Ivi oveeye na makuva gahaanaa livamwoyo litahera mba.

⁶⁹ Kunyi kwasuuvira, kandi kwamanya ndi ivi niyie Mutakatifu wa Nyasaye.”

⁷⁰ Yeso yavavolera, “Sindaatovora munyi likomi na vaviri? Navuzwa mulala ku munyi ni Setani!”

⁷¹ Yeso yavoola ageene yago ku Yuda mwana wa Simoni wa Esikarioti. Kigira Yuda, kali ni yaali mulala ku aviigi likomi na vaviri, niyie ulakamuzaame.