Yohana 4 - KITABU KITAKATIFU

¹ Avafarisayo vahulira ndi Yeso yanyoora kandi yabatizaa aviigi avanyingi kuvita Yohana.

² Navuzwa mugiligali Yeso mwene siyabatizaa mba, nitali aviigi veve nivavabatizaa.

³ Lwa Yeso yahulira amakuva ga avandu vavoola kuye, yatura Ivuyuda nazia Galilaya.

⁴ Mu logendo lwene yilwo gamudukira avitiri Samaria.

⁵ Musamaria, yaza mu lidaala lia Sikari, iliali ahimbi nu mulimi gwa Yakobo yaaha Josefu mwana weve.

⁶ Kidaho cha Yakobo, chaali ahene yaho. Kigira Yeso yaali naluhi ku logendo lwilwe, yikala ku lujinga lwi kidaho zana. Yaali ahimbi saa sita zia mbasu.

⁷ Mukali mulala Musamaria yaza kudaha amazi. Yeso yamuvolera, “Mbe ku amazi nwi.”

⁸ Ing'inga yeyo, aviigi veve vaali nivaziiyi mu lidaala kugura viukulia.

⁹ Mukali oyo yamutivulira, “Oveeye Muyuda, nainzi mbeeye mukali Musamaria; kunangwa unyala ndi kusava amazi?” Avayuda si vaveeye nuvuhambani na Vasamaria mba.

¹⁰ Yeso yamutivulira, “Niiva wakamanyi kihanwa cha Nyasaye ahaanaa na nivwaha okoteeva, ‘Mbe ku amazi nwi,’ ngano wakamuteevi naye alakuha amazi gi livamwoyo.”

¹¹ Mukali oyo yamuvolera, “Mwami, ivi si oveeye ni chukudahira amazi, kandi kidaho keveeye musi ligali, nonyoole hayi amazi livamwoyo yago?

¹² Ivi wekolaa kuva munene ligali kuvita baba wiitu Yakobo? Oyo yakuha kidaho yiki, harara na avana veve, nimitugu jije vanwa amazi gi kidaho yiki.”

¹³ Yeso yamutivulira, “Ku woosi unwa amazi yaga, alava nuvuluhu kandi.

¹⁴ Navuzwa ku woosi unwa ku amazi ga mbana, sialava nuvuluhu kandi mba. Ligali amazi ga ndimuha galava muye kidaho cha amazi gi livamwoyo agasinukaa kumuha livamwoyo litahera mba.”

¹⁵ Mukali oyo yamuvolera, “Mwami, mbe amazi yago mburi konyoora vuluhu kandi mba, kunangwa mburi kandi kuuza hano kudaha amazi.”

¹⁶ Yeso yamuvolera, “Zia ulange musaza woovo ma wirane.”

¹⁷ Mukali zana yamuvolera, “Inzi mbula musaza.” Yeso yamuvolera, “Ivi ovooye agiligali lwa ovola ‘Simbeeye nu Musaza.’

¹⁸ Kigira waali na vasaza vatano, na uyu wa omenyi naye kalunu siaveeye musaza woovo mba. Yaho omboleeye agiligali.”

¹⁹ Mukali yamuvolera, “Mwami, ndolaa ivi oveeye muporofeti.

²⁰ Avaguuga viitu vaasigamira Nyasaye mu kiguru yiki, navuzwa munyi muvooraa ndi gaduukanaa kusigamira Nyasaye mu Jerusalemi.”

²¹ Yeso yamuvolera, “Mukali, usuuviri inzi; ing'inga yiza lwa avandu valivula kusigamira Baba mu Kiguru yiki anoho mu Jerusalemi.

²² Munyi Avasamaria musigamiraa oyo wamutamanyi ligali navuzwa kunyi kumanyi uyu wakusigamiraa, kigira ovohonyi vutura ku Avayuda.

²³ Navuzwa ing'inga yiza kandi imali kuduuka, lwa vandu vasigamira; Baba mu Roho kandi mu agiligali yava nivo vandu va Baba yenya vamusigamiri.

²⁴ Nyasaye ni Roho, nayavo vamusigamira gavadukiraa vamusigamiri mu Roho nu mu agiligali.”

²⁵ Mukali oyo yamuvolera, “Manyi vulahi Mesia, ulangwa Kristo, yaazaa. Lwa aliiza alakakumanyie kindu choosi.”

²⁶ Yeso yamuvolera, “Inzi ovoolerana niivi, niyie.”

²⁷ Ahene yaho aviigi veve viirana. Vagenya ligali kolola namolomaa nu mukali oyo. Navuzwa si yaali ho nu mundu wamuteeva, “Wenyaa ki?” Anoho, “Kigira ki omoloma nu mukali uyu?”

²⁸ Kunangwa mukali oyo yaleka isiongo yeeye nazia mu lidaala kovoolera avandu,

²⁹ “Hambi mulole mundu omboleeye vindu viosi via ndaakola. Anyala kuva niye Mesia?”

³⁰ Avandu vaatura mu lidaala nivazia ku Yeso.

³¹ Ing'inga yene yeyo, aviigi veve vaali nivagoonyaa Yeso; “Mwigizi, ulie chukulia.”

³² Navuzwa Yeso yavavolera, “Inzi mbeeye nichukulia cha munyi mutamanyi.”

³³ Aviigi veve vateevana, “Koveeye ho nu mundu umuleteeye chukulia?”

³⁴ Yeso yavavolera, “Chukulia change ni kokora uvulariri vwa uyu uwanduma yenya, kandi kumala miyinzi jije.

³⁵ Munyi muvooraa ‘Jikiri mieli jine vuzwa, ma ing'inga yokogesa iduuki!’ Navuzwa inzi muvooleraa, heenzi vulahi ku milimi; viamo viajo viilavi kandi vietegeki kogeswa.

³⁶ Mugesi anyoora madanyi geege, ma avungiza viamo kigira livamwoyo litahera mba, kunangwa mundu utagaa nogesaa vasangala harara.

³⁷ Kigira yaga livoora yili nilieligali: ‘Mulala amiizaa nu wundi agesaa.’

³⁸ Inzi mutumaa mugese iviamo via mwavura kutulira ku logeli; valala vaakora miyinzi, navuzwa munyi munyoora viukala kuturana nologeli lwavo.”

³⁹ Avanyingi ku Avasamaria mu lidaala yilio vasuuvira mu Yeso kigira amakuva gu mukali oyo yaali navooye, “Amboleeye vindu viosi via ndaakola.”

⁴⁰ Avasamaria vazia ku Yeso nivamuteeva amenye navo; naye yamenya ho madiku gaviri.

⁴¹ Avandu vanyingi vasuuvira kigira livoora lilie.

⁴² Vavoolera mukali oyo, “Kunyi sikusuuviraa vuzwa kigira amakuva googo, navuzwa kunyi aveene kumali kumuhulira kandi kumanyi ligali uyu niyie Muhonyi wi lirova.”

Yeso Yahonyia muyaayi wu munene mulala

⁴³ Inyima wa madiku gaviri, Yeso yatura ahene yaho nazia Galilaya.

⁴⁴ Kigira Yeso mwene yaali navooye havulavu ndi, “Muporofeti siahevwa lizominywa mu kivala chiche mba.”

⁴⁵ Lwa yaduuka mu Galilaya, avandu uwene yeyo vamwingiriza. Kigira vaali nivaloli vindu viosi via Yeso yakola Jerusalemi ing'inga ya vaali nivaziiyi yo mu Lisavo lie Lipasaka.

⁴⁶ Maku Yeso yirana mu lidaala lia Kana mu Galilaya, uwa yaali naagirung'anyi amazi kugwa iwaini. Munene mulala wu vwamihi yaali yo uwu muyaayi weve yaali mulwaye mu Kaperinaumi.

⁴⁷ Lwu Munene oyo yahulira ndi Yeso yaazi kutura Ivuyuda kuduuka Galilaya, yazia kuye namugoonya azie Kaperinaumi kohonyia muyaayi weve uwaali naveeye ahimbi kukuza.

⁴⁸ Yeso yamuvolera, “Munyi nimutaloli vilolekizu ni viokogenyia, simunyala kusuuvira mba.”

⁴⁹ Munene oyo yamuvolera, “Mwami, nuyanza hamba kuzie niivi muyaayi wange nakikiri kukuza.”

⁵⁰ Yeso yamuvolera, “Zia vuzwa muyaayi woovo alahona.” Mundu oyo yasuuvira likuva lia Yeso yamuvolera ma nazia.

⁵¹ Lwa yaali nakiri kunzira, nasulungutaa, avatumikiri veve vavugana naye, nivamuvoolera, “Muyaayi woovo aveeye mwoyo.”

⁵² Naye yavateva ng'ingaki yanyooye lisosa. Vamuvolera, “Mugolova, saa saba zia mbasu, nilwo lwa yahona.”

⁵³ Maku baba oyo yizuliza isa yene yeyo niyio ya Yeso yamuvolera, “Muyaayi woovo ohoni.” Kunangwa avinyumba yeeye harara naye vasuuvira.

⁵⁴ Yiki chaali kelolekizu cha kaviri cha Yeso yaa kola lwa yaali yaka kutura Ivuyuda kuzia Galilaya.