Yohana 3 - KITABU KITAKATIFU

¹ Yaali ho mwimiliri mulala Muyuda uwalangwa Nikodemo, uwikiduma cha Vafarisayo.

² Lidiku lilala yaza ku Yeso vudiku, namuvolera, “Rabi, kumanyi ivi oveeye mwigizi watura ku Nyasaye, kigira avulaho mundu unyala kokora vilolekizu via okolaa yivi, Nyasaye nataveeye harara naye.”

³ Yeso yamutivulira, “Ngovolera agiligali, mundu navula kwivulwa vuhia, sianyala kolola Uvwami vwa Nyasaye mba.”

⁴ Nikodemo yamuteeva, “Mundu anyala ndi kwivulwa vuhia naveeye muhindira? Anyala kwingira munda mwa mama weve haali kaviri, yiivulwi kandi?”

⁵ Yeso yamutivulira, “Ngovolera agiligali, mundu natiivulwa liivulwa lia amazi ni lia Roho, sianyala kwingira mu Vwami vwa Nyasaye mba.

⁶ Chu muviri gwivulaa nichumuviri ni charoho yivulaa ni cha Roho.

⁷ Utagenya kigira ngovoleeye ndi gakuduukiraa wivulwi kaviri,

⁸ imbuza ihuuzaa hoosi hiyaanzaa; na ivi uhulira vuzwa lifuuma liayo, navuzwa siumanyi wa itulaa nu wizizaa mba. Nindio gaveeye kandi ku mundu woosi uwivulwa kutura ku roho.”

⁹ Nikodemo yamuteeva, “Vindu yivi vinyala kunyalika kuli ndi?”

¹⁰ Yeso yamutivulira, “Ivi oveeye mwigizi munene mu Isiraeli na siumanyi vindu yivi?

¹¹ Ngovolera ligali, kunyi komolomaa ku aga kumanyi kandi kololekizaa aga kwalola, navuzwa munyi simuyaanzaa kuvugilira amakuva gililolekiza lietu mba.

¹² Niiva inze mali kumuvolera ivindu viu mu lirova navuzwa munyi simusuuvira, munyala kusuuvira ndi niiva ndamuvolera ivindu viu mwigulu?

¹³ Siaveeyeho nu mundu uwaazia kuduuka mwigulu, natali Mwana wa Adamu uwiika kutura mwigulu.”

¹⁴ Kuli Musa yaginga igulu enzoka yu Mugasa mwigendanyama, nindio Mwana wa Adamu aligingwa igulu ku musalaba.

¹⁵ Kunangwa mundu woosi usuviraa muye aduuki kuva ni livamwoyo ilitahera mba.

¹⁶ Nyasaye yayanza avandu vu mu kivala, kali nahaana Mwana weve umuderwa, kunangwa ku vosi umusuuvira atadiva mba, navuzwa aduuki kuva ni livamwoyo ilitahera mba.

¹⁷ Nyasaye siyatuma Mwana weve kuuza mu kivala kukalagira avumukivala, navuzwa kohonyia avumukivala.

¹⁸ Uyu usuviraa Mwana si alakalagirwa; navuzwa yavo vatamusuuvira vamali kukalagirwa, kigira si vasuuvira Mwana muderwa wa Nyasaye mba.

¹⁹ Likalagwa liene ni yili: Uvulavu vumali kuuza mu kivala, navuzwa avandu vayaanza kisundi kuvita uvulavu kigira vikolwa viavo viveeye vidamanu.

²⁰ Mundu woosi okola uvudamanu adunyiraa uvulavu, kandi sianyala kuuza ku vulavu mba, kigira siyenya vikolwa vivie vidamanu vimanyikane havulavu mba.

²¹ Navuzwa olondaa agiligali yazaa ku vulavu, kunangwa vikolwa vivie viloleke vikoleywi mu liitia Nyasaye.

Lilolekiza lia Yohana Mubatizi ku Yeso

²² Inyima wa yaga, Yeso harara na aviigi veve vazia mu kivala chi Ivuyuda. Yamenya yo harara navo ku ing'inga nabatizaa avandu.

²³ Yohana kandi yaali nabatizaa avandu mu Ayinoni, ahimbi Salimu, kigira amazi manyingi gaali ahene yaho. Avandu vazia kuye, naye yavabatiza.

²⁴ Ing'inga yeyo Yohana yaali nakiri kovofwa Muvuhambe.

²⁵ Amahangari malulu gatulira hagati ha valala ku aviigi va Yohana nu Muyuda mulala ku makuva gu kwisaava kolondekana ni miima ji lisuuvira liavo.

²⁶ Kunangwa aviigi yava vazia ku Yohana nivamuvoolera, “Mwigizi, wizulizaa mundu waali harara niivi ku lovega lwa ivugwi wu mugera gwa Jorodani, uwa ivi walolekiza amakuva gi iliiza lilie? Henza, kalunu abatizaa, na avandu vosi vazizaa kuye!”

²⁷ Yohana yavavolera, “Mundu sianyala kuva ni kindu nataheeveywi na Nyasaye mba.

²⁸ Munyi aveene muveeye avalolekizi vange ku aga ndavoora ndi, ‘Inzi simbeeye Mesia, navuzwa ndatumwa na Nyasaye kwimilira imbiri weve!’

²⁹ Oyo oveeye nu Mwiha osereywi niye mwami we keserero. Navuzwa mulina wu mwami we keserero, usingira nukuhuliriza, asangalaa ligali lwa ahuliraa mwami wekeserero namolomaa. Kigira yaga uvuyanzi yivwo nivwo vwa inzi mbeeye navwo; kandi vuduukiziywi.

³⁰ Gaduukanaa oyo ameede koneneha ninzi gandukira ngeehe.”

Uyu uzaa kutura mwigulu

³¹ Uyu uza kutura mwigulu aveeye munene kuvita vosi; uyu uza kutura mu kivala aveeye wikivala, kandi amolomaa vindu vie kivala. Navuzwa uyu uzaa kutura mwigulu nu munene kuvita vosi.

³² Oyo ovola aga yalora na aga yahulira, navuzwa sihaveeyeho nu mundu uvugilira amakuva geege.

³³ Navuzwa mundu woosi uvugilira lilolekiza lilie umali kuviika muhuri gwi livugilira lilie ku yaga ndi, Nyasaye aveeye wiligali.

³⁴ Uyu wa Nyasaye yatuma amolomaa amakuva ga Nyasaye, kigira Nyasaye amuhezaa uvudukiru vwa Roho weve vugira kegero.

³⁵ Baba ayaanza Mwana weve kandi umali kuviika vindu viosi hasi hu vunyali vwivwe.

³⁶ Uyu usuviraa Mwana wa Nyasaye, aveeye ni livamwoyo litahera mba. Navuzwa uyu utatiza Mwana wa Nyasaye, sialilola livamwoyo kigira amaduywa ga Nyasaye galamenya kuye.