Yohana 20 - KITABU KITAKATIFU

Lisimuguka lia Yeso

¹ Mugambazuri mu mavwevwe, lidiku lia Jumapili, isi nikikiri imwamu, Maria Magadalena yazia ha kilindwa, nalora ligina liali ku kilindwa lituliziywi ku.

² Kunangwa yanyagula zimbiru nazia ku Simoni Petero nu ku mwigizi wundi wa Yeso yaali niyayaanza, navavoolera, “Vatulizi Mwami mu kilindwa, na sikumanyi aha vamuviki mba.”

³ Maku Petero harara nu mwigizi wundi oyo vazia kuduuka ha kilindwa.

⁴ Vombi vaviri vanyagura, navuzwa mwigizi wundi oyo yanyagula zimbiru kuvita Petero naduuka kutanga ha kilindwa.

⁵ Lwa yinama nahenza mu yalora zinguvu zie katani ziu kuyavira mu mukuzu, navuzwa si yingira mu mba.

⁶ Maku lwa Simoni Petero naye yaza naamulonda inyima, yingira mu kilindwa nalora zinguvu zie katani niziveeye mu.

⁷ Kitambaya chavofwa ku mutwi gwa Yeso si chaviikwa harara ni zinguvu ziu kuyavira mu mukuzu yizio mba. Chaali nikilingiywi kandi nikiviikiywi havundu hacho.

⁸ Kunangwa mwigizwi wundi uwaduuka kutanga ha kilindwa, yingira mu kandi, nalora, kandi nasuuvira ndi

⁹ Yeso umali kusimuguka. Navuzwa sivamanyiriza aga Mang'oda Matakatifu gavoora ndi kuduuka Yeso asimuguki kutura mu vakuzu mba.

¹⁰ Maku aviigi vaviri yavo viirana uwa vamenya.

Yeso Yaloleka ku Maria Magadalena

¹¹ Maria yaali nasingiyi ichova wi kilindwa, nalira. Lwa yaali nakiliraa, yinama nahenza mu kilindwa.

¹² Yalora zingelosi vaviri aviviika zinguvu zindavu zerere, nivikaye ahu muviri gwa Yeso gwaali, mulala hamutwi nu wundi havirenge.

¹³ Zingelosi yavo vamuteeva, “Mukali, kigira ki uliraa?” Naye yavavolera, “Vaakuvugula Mwami wange, na simanyi wa vamuviki mba!”

¹⁴ Maku yikivuka, nalora Yeso nasingiyi hene yaho, navuzwa siyamanya ni Yeso mba.

¹⁵ Yeso yamuteeva, “Mukali kigira ki uliraa? Wenyaa vwaha?” Maria yaganagana ndi aveeye mulindi wumulimi. Kunangwa yamuvolera, “Mwami, niiva ni ivi uvuguyi muviri gwa Yeso mbolera ahumuviki, nainzi nzie muvuguli.”

¹⁶ Yeso yamuvolera, “Maria!” Maria yagirung'ana namuhenza. Yamuvolera mu Luheburaina, “Raboni!” Yili ni likuva mu luheburaina livoora “Mwigizi.”

¹⁷ Yeso yamuvolera, “Utang'umira mba; Ngikiri kwanigira igulu wa Baba. Navuzwa zia ku avamwavo vange uvavoolere, ‘Nzirana ku uyu oveeye Baba wange kandi Baba winyu; Nyasaye wange kandi Nyasaye winyu.’ ”

¹⁸ Kunangwa Maria Magadalena yazia navolera aviigi, “Ndoli Mwami, kandi yavavolera aga Yeso yaali namuvooleye.”

Yeso yaloleka ku aviigi veve

¹⁹ Lwali hamugorova gwi lidiku lia Jumapili, kandi aviigi vaali nivavugani harara munyumba, viliango nivihaniywi kigira vaatia avanene va Avayuda. Yeso yaza, nasingira hagati haavo, navavoolera, “Mirembe jive ku munyi!”

²⁰ Lwa yamala kovora yaga, yavamanyia zimbara mu makono geege kandi mu zimbalu mwimwe. Aviigi veve vayaanza ligali kolola Mwami.

²¹ Yeso yavavolera kandi, “Mirembe jive ku munyi! Kuli Baba yanduma, kandi nainzi nduma munyi.”

²² Lwa yamala kovora yaga, yavaherera mwika navavoolera, “Vuguli Roho Mutakatifu.

²³ Nimusamiiha avandu vwoni vwavo, valasamifwa. Nimuvula kusamiiha avandu vwoni vwavo, valavula kusamiifwa.”

Yeso na Tomasi

²⁴ Tomasi walangwa Malongo, mulala ku avaari likomi na vaviri, si yaali navo lwa Yeso yaza mba.

²⁵ Kunangwa, aviigi vandi vamuvolera, “Koololi Mwami.” Tomasi yavavolera, “Nindalola zimbara zie misumari mu makono geege, nu kudiira kedete change muzio, kandi kudiira mukono gwange mu zimbalu zizie, sinyala kusuuvira mba.”

²⁶ Inyima wa madiku munane aviigi yavo vaali kandi harara munyumba, na Tomasi yaali harara navo. Miliango jaali ni jihaniywi. Navuzwa Yeso yaza, nasingira hagati haavo, navoora, “Mirembe ku munyi!”

²⁷ Maku yavolera Tomasi, “Leeta kedete chicho udiiri mu zimbara zia makono gange; leeta mukono gugwo uhambe mu zimbalu ziange. Utava nilihayahayiza, navuzwa usuuviri!”

²⁸ Tomasi yamutivulira, “Mwami wange kandi Nyasaye wange!”

²⁹ Yeso yamuvolera, “Usuuviyi kigira ondoli? Vaveeye nuvugasu yavo avasuuviyi nivakikiri kondola.”

Kivuni chi kitabu yiki

³⁰ Yeso yakola vilolekizu vinyingi imbiri wa aviigi veve ivia vula kung'odwa mu kitabu yiki.

³¹ Navuzwa yivi viang'odwa kunangwa munyi muduuki kusuuvira ndi Yeso ni Mesia. Mwana wa Nyasaye; na mu lisuuvira lienyu muye, mulava ni livamwoyo mu zie lieta lilie.