Yohana 2 - KITABU KITAKATIFU

¹ Ku lidiku lia kavaga nekeselero chaliho mu lidaala lia Kana, mu kivala cha Galilaya. Mama wa Yeso yaaliyo.

² Yeso harara na aviigi veve valangwa mu keserero yicho.

³ Lwi iwaini yafwa, Mama wa Yeso yamuvolera, “Sivaveeye niwaini mba.”

⁴ Yeso yamutivulira, “O, mama, kigira ki umbika mu makuva yaga? Ing'inga yange ikikiri kuduuka.”

⁵ Mama weve yavolera avatumikiri, “Mukore choosi icha amuvoleraa.”

⁶ Ziali ho ni zinyingu zinene sita izialombwa kutura ku magina, na vuli ndala yaali inyala kuginga zilita imia ndala. Ziali nizivikiywi ho kigira miima ja Avayuda ju kwitakasa.

⁷ Yeso yavolera avatumikiri yavo, “Yizulizi amazi mu zinyingu yizi.” Navo vazizuliza du.

⁸ Maku yavavolera, “Kalunu dahi ku, muhiliri munene wi lilia.” Navo vakora ndio.

⁹ Lwu munene wi lilia yazazama ku amazi yaga, agaali nigagirung'ani kugwa iwaini, si yamanya wituli, navuzwa avatumikiri avaari nivagidahi vamanya. Munene wi lilia yalanga mwami wasereraa;

¹⁰ namuvolera, “Vuli mundu atangaa kuhaana iwai ni indahi, navuzwa avandu nivakanwa inyingi, ma aleetaa iwaini inzangalalu. Navuzwa ivi utangi kuviika iwaini indahi ligali kuduuka kalunu!”

¹¹ Yeso yakola kelolekizu chu kutanga yiki mu lidaala lia Kana mu kivala cha Galilaya, naavuula uvukumi vwivwe, kandi aviigi veve vamusuuvira.

¹² Inyima wa yaga, Yeso yasulunguta harara na mama weve, na avamwavo veve na aviigi veve, nivazia Kaperinaumi. Vamenya yo madiku makekeeke.

Yeso Yingira mu Litembeli

¹³ Lisavo lia Vayuda lilangangwa Lipasaka liali ahimbi, kunangwa Yeso yazia Jerusalemi.

¹⁴ Uwene yeyo mu Litembeli yanyoora avandu vaali nivagulizaa zing'ombe, na magondi na amakuulu na avakiranyira mabese, nivikaye ku zimesa ziavo ziukukiranyia.

¹⁵ Yalomba muchaduri gwi zingova, nakunga vosi nivazia ichova wi Litembeli harara na magondi ni zing'ombe; yaakunaminya zimesa zia vakiranyi va mabese, kandi yuhulanyia mabese gaavo.

¹⁶ Yavolera avagulizaa amakuulu, “Tulizi vindu yivi yimu. Mutakoli inyumba ya Baba wange kuva havundu hi ichiitu mba!”

¹⁷ Aviigi veve vizuliza ndi Amang'oda Matakatifu gavoora, “ Uvuyanzi vwange vwu kudidikanira inyumba yooyo, O, Nyasaye, vusamba mu inzi kuli muliru.”

¹⁸ Avalala ku avanene va Vayuda vaativulira Yeso, niliteeva “Kelolekizu ki cha unyala kokora kukumanyia ndi oveeye nuvunyari kokora yaga?”

¹⁹ Yeso yavativulira, “Yononyi Litembeli yili ninzi ndaliumbaka kandi mu madiku gavaga.”

²⁰ Ahene yaho Avayuda vavoola, “Litembeli yili liumbakwa ku ing'inga yi mihiga arubaini na sita. Ivi ulaliumbaka ndi mu madiku gavaga?”

²¹ Navuzwa Yeso yaali namolomaa ku muviri gwigwe.

²² Kunangwa, lwa yasimugukizwa kutura mu vakuzu, aviigi veve vizuliza ndi yaali niyavoola yaga; kandi vasuuvira Amang'oda Matakatifu, kandi likuva lia Yeso yaali navooye.

Yeso yamanya liiva liu mundu

²³ Lwa Yeso yaali mu Jerusalemi mu lilia lie Lipasaka, avandu avanyingi vaamusuuvira inyima wokolola vilolekizu via yakola.

²⁴ Navuzwa Yeso si yisuuviriza mwene kuvo mba, kigira yamanya avandu vosi.

²⁵ Si yenya mundu amulolekizire amakuva gu mundu wundi mba, kigira mwene yamanya vulahi amakuva goosi agaali mu mioyo jaavo.