Yohana 18 - KITABU KITAKATIFU

Ligumirwa lia Yeso

¹ Lwa Yeso yaali niyakamara kovora lisaala yili, yazia engereka wi livona lia Keduroni harara na aviigi veve. Havundu yaho haali nu mulimi, Yeso harara na aviigi veve vazia mu.

² Yuda, uwazaama Yeso, yamanya havundu hene yaho kigira haali kanyingi Yeso yavuganaa na aviigi veve ahene yaho.

³ Kunangwa, Yuda yavugula muganda gwa avasikari va varumi na avalindi valala vi Litembeli avatumwa na Avafarisayo, navasaalisi nivaveeye nizitaaya, zimuri ni viugi.

⁴ Yeso, yaali namanyi goosi agaali nigazizaa kwekoleka. Yituliza nasingira imbiri wavo navateeva, “Mwenya vwaha?”

⁵ Navo vaamutivulira, “Yeso wa Nazareti!” Yeso yavavolera, “Inzi niyie.” Yuda Muzami yaali nasingiyi ahene yaho harara navo.

⁶ Kunangwa, lwa Yeso yavavolera, “Inzi niyie,” virana inyima, nivagwa hasi.

⁷ Yeso yavateva kandi, “Nivwaha wa mwenya?” Navo vativura, “Yeso wa Nazareti.”

⁸ Yeso yavavolera, “Inzi mali kumuvolera, ‘Inzi niyie.’ Kunangwa, niiva mwenya inzi, leki avandi yava vazie.”

⁹ Yavoola yaga ku gaduuki kuduukizwa kuva agiligali aga yavoola: “Baba yavo avawaamba avula ho kali mulala wandagotiza.”

¹⁰ Simoni Petero waali ni kivavi, yakesomola mu lwula, naatema ugutu gwu mukono mulungi gwu mutugwa wu Musaalisi Munene. Mutugwa oyo yalangwa Malikusi.

¹¹ Yeso yavolera Petero, “Yiranyia kivavi mu lwula. Uganaganaa inzi mburi kunwa kekombe chu vusaliri cha Baba wange yamba? ”

Yeso imbiri wa Anasi

¹² Kunangwa muganda gwa avasikari harara nu munene wagwo, na avalindi va Avayuda vagumira Yeso nivamuvoha.

¹³ Vamuhira kutanga ku Anasi. Anasi yaali navizara Kayafa uwaali naveeye Musaalisi Munene muhiga gwene yigwo.

¹⁴ Kayafa oyo niyie uwaali navoleeye vamiihi va Avayuda ndi nivulahi ligali mundu mulala akuzi mu vogono vwa avandu vosi.

Petero Yambakanaa Yeso

¹⁵ Simoni Petero harara nu mwigizi wundi valonda Yeso. Mwigizi wundi oyo yaali niyamanyikana ku Musaalisi Munene, kunangwa, yingira harara na Yeso hamugizi hu Musaalisi Munene.

¹⁶ Navuzwa Petero yaali nasingiyi ichova, ahimbi ha kirivwa. Kunangwa, mwigizi wundi oyo uwaali niyamanyikana ku Musaalisi Munene yatura ichova navoolerana nu mutumikiri mukaana uwalindaa muliango, ma niyingiriza Petero mugati.

¹⁷ Maku, mukaana walindaa kirivwa oyo yateeva Petero, “Ivi kandi si oveeye mulala ku aviigi vu mundu uyu?” Petero yamuvolera, “Ninzi mba!”

¹⁸ Avatumikiri na avalindi vaali nivafwani muliru kigira uvukindu vwali ho. Vaali nivotaa muliru. Petero yasingira harara navo niyotaa muliru.

Musaalisi Munene atevelerizaa Yeso

¹⁹ Kunangwa, Musaalisi Munene yateveleriza Yeso kigira aviigi veve, kandi kigira amigizu geege.

²⁰ Yeso yamutivulira, “Inzi ndaamoloma havulavu kazozo ku avandu vumukivala vosi. Vuli ing'inga ndigiza mu Masinagogi kandi mu Litembeli, havundu ha Avayuda vosi vavugana harara; na ngikiri kovora ku kindu choosi mu vwivisu mba.

²¹ Kigira ki ondeva? Teeva avandu yavo avahulira aga ndavavolera. Yavo vamanyi ligali aga ndaavoora.”

²² Lwa Yeso yaali niyakamara kovora yaga, mulala ku vanene va vasikari vi Litembeli, uwaali nasingiyi ahene yaho, yaala Yeso uluhi navoora, “Nindio utivulira Musaalisi Munene?”

²³ Yeso yamutivulira, “Niiva inzi mali kovora vudamanu, lolekiza uvudamanu zana. Navuzwa niiva mboye agiligali, kigira ki ivi unguyaa?”

²⁴ Kunangwa, Anasi yaahira Yeso, nakevoheywi, ku Musaalisi Munene Kayafa.

Petero yambakanaa Yeso kandi

²⁵ Petero yaali naakisingiyi ahene yaho niyotaa muliru. Kunangwa, avandi vamuteeva, “Ivi kandi sioveeye mulala ku aviigi vu mundu ula?” Yambakana navoora, “Ninzi mba!”

²⁶ Mulala ku avatumikiri vu Musaalisi Munene, umwiko wu mundu wa Petero yatema ugutu, yamuteeva, “Inzi mburi kolola ivi mu mulimi noveeye harara naye?”

²⁷ Petero yambakana kandi; nonoho idaywa yalagula.

Yeso Yahilwa imbiri wa Pilato

²⁸ Kunangwa, mugambazuri mu mavwevwe, Avayuda vatuliza Yeso munyumba ya Kayafa nivamuhila munyumba yuvwami iyalangwa Puritorio. Avanene va Avayuda vene sivingira mu Puritorio mba, kunangwa vavuli kwonogonywa, navuzwa vaduuki kulia chukulia chi Lipasaka.

²⁹ Pilato yazia ichova, navoora, “Nikindi ki cha muyaaliraa mundu uyu?”

³⁰ Vaamutivulira, “Niiva mundu uyu siyaakola uvudamanu, sikwakamuleti ku ivi mba.”

³¹ Pilato yavavolera, “Munyi aveene mumuvuguli mumukalagili kolondekana ni Lilaga lienyu.” Avayuda vaamutivulira, “Kunyi sikoveeye nuvunyari kwiita mundu mba.”

³² Yili liekoleka ndio liduuki kutwekizwa likuva lia Yeso yavoola kumanyia alikuza likuza ki.

³³ Pilato yirana kandi munyumba yalangwa Puritorio, nalanga Yeso, namuteeva, “Ivi niyie Mwami wa Avayuda?”

³⁴ Yeso yamutivulira, “Ovola yaga ivi mwene, anoho avandi vakovoleye amakuva gange?”

³⁵ Pilato yamutivulira, “Inzi mbeeye Muyuda? Ihiiri yooyo na avasaalisi vanene vakoleti ku inzi. Okoli kindiki?”

³⁶ Yeso yamutivulira, “Uvwami vwange sivoveeye vwu mu kivala yiki. Niiva uvwami vwange vwakaveeye vwu mu kivala yiki, ngano avatumikiri vange vakalwaani mburi kugumirwa na Avayuda. Awa, uvwami vwange sivoveeye vwu mu kivala mba.”

³⁷ Kunangwa Pilato yamuvolera, “Maku ivi nu Mwami?” Yeso yativura, “Ivi mwene ovola inzi nu Mwami. Kigira yaga inzi ndivulwa; kandi kigira yaga ndaaza mu kivala kovoolera avandu agiligali. Vuli mundu wa agiligali ahuliraa umwoyo gwange.”

³⁸ Pilato yateeva, “Agiligali ni ki?” Pilato lwa yamala kovora yaga, yazia kandi ku Avayuda ichova, navavoolera, “Inzi sindora kindu kidamanu kuye mba.

Yeso Yakalagirwa Likuza

³⁹ Navuzwa, muveeye nu mwima gwa inzi muvohololera mundu mulala mu ing'inga yi Lipasaka. Kunangwa, mwenya muvoholere Mwami wa Avayuda?”

⁴⁰ Kunangwa vahanzuka kandi nivavoora, “Awa! Mundu uyu mba! Kunyi kwenyaa Baraba!” Baraba yaali munuri.