Yohana 14 - KITABU KITAKATIFU

¹ Yeso yavolera aviigi veve, “Mutahenda mioyo jinyu. Musuuviri Nyasaye, musuuviri inzi kandi.

² Munyumba mwa Baba wange, muveeye novomenyo vunyingi. Nigataveeye ndio, ngano sindamuvolera, nziza kumulombera ovogono mba.

³ Kandi lwa mba ninzia kumulombera ovogono, ndirana kandi. Ndamuvugura inzi mwene, kunangwa aha inzi mbeeye munyi kandi muve ho.

⁴ Kandi munyi mwamanya inzira yukuzia wa nziza.”

⁵ Tomasi ulangwa Malongo yamuteeva, “Mwami, sikumanyi wuzizaa mba, kunyala kumanya ndi inzira yeyo?”

⁶ Yeso yamutivulira, “Inzi niyio inzira, agiligali kandi livamwoyo. Sihaveeyeho nu mundu unyala kuzia ku Baba natavitiyi ku inzi.

⁷ Mulava mwamanya inzi, ngano mwamanyia Baba wange kandi. Kutura kalunu mumumanyi, kandi mumali kumulora.”

⁸ Filipo yamuvolera, “Mwami, ukumanyie Baba; yago nigo ga kwenyaa ma gakuduuki.”

⁹ Yeso yamuvolera, “Filipo, menyi nimunyi zing'inga yizi ziosi, na ivi ukikiri kumanya? Uyu umali kolola inzi, aloli Baba. Kigira ki ovola ndi: ‘Kumanyie Baba?’

¹⁰ Ivi si usuviraa inzi mbeeye mu Baba na Baba aveeye mu inzi? Amakuva goosi aga mali kumuvolera sigaveeye gange mwene mba; navuzwa Baba aveeye mu inzi akolaa miyinzi jije mwene.

¹¹ Musuuviri ndi, inzi mbeeye mu Baba, naye Baba aveeye mu inzi. Nigataveeye ndio, usuuviri inzi kigira miyinzi ja ngolaa.

¹² Muvooleraa agiligali, uyu usuviraa mu inzi alakola miyinzi ja inzi ngolaa. Yee, alakola kali minene ligali kuvita kigira inzi nziza wa Baba.

¹³ Na ku choosi cha muteeva ku lieta liange, yiki ndakora, Baba aduuki kukuminyirwa mu Mwana.

¹⁴ Ni musaala kindu choosi ku lieta liange, inzi nda mukolera.

Yeso Yavasuuviriza Roho Mutakatifu

¹⁵ “Ni muva ni munyanza, mulagumira amalago gange.

¹⁶ Nainzi ndateeva Baba, naye alamuha umukonyi wundi, ulimenya nimunyi kazozo.

¹⁷ Oyo ni Roho ovolaa agiligali ga Nyasaye. Avumukivala sivanyala kumuvugilira kigira sivanyala kumulora anoho kumumanya mba. Navuzwa munyi mumumanya kigira amenyaa ni munyi kandi alakave mu munyi.

¹⁸ “Lwa mba ninzia sindamuleka kuli avavisandu mba; ndirana ku munyi kandi.

¹⁹ Mu ing'inga engekeeke, avumukivala si valandola kandi mba navuzwa munyi mulandola; na kigira inzi mbeeye mwoyo, munyi kandi mulava mwoyo.

²⁰ Lwi lidiku yilio liliduuka mulakamanye ndi inzi mbeeye mu Baba wange, kandi munyi muveeye mu inzi, kuli inzi mbeeye mu munyi.

²¹ “Uyu uvugilira amalago gange nukugagumira, uyu niyie uyanzaa, na uyu unyaanzaa Baba wange alamuyaanza nainzi kandi ndamuyaanza kandi ndivuura inzi mwene kuye.”

²² Yuda utali Yuda wa Esikarioti yamuvolera, “Mwami, galava ndi ivi ulivuula ku kunyi, navuzwa uvuli kwivuula ku avumukivala?”

²³ Yeso yamutivulira, “Mundu nanyaanza, alagumira amigizu gange. Baba wange alamuyaanza, kandi Baba wange harara nainzi kulaaza kuye, na kulamenya naye.

²⁴ Ku vosi utanyaanzaa siagumira amigizu gange mba. Na amigizu ga mumali kuhulira sigaveeye agange mba, navuzwa gaveeye aga Baba wanduma.

²⁵ “Mali kumuvolera vindu yivi lwa ngikiri ni munyi,

²⁶ Navuzwa, uyu Mukonyi, Roho Mutakatifu, wa Baba alituma mu lieta liange, alakamwigizi vindu viosi kandi kumwizuliza goosi aga ndamuvolera.

²⁷ “Mirembe nijo ja inzi mulekeraa. Mirembe jange inzi mwene muheezaa. Simuhezaa kuli avumukivala vahaana mba. Mutahenda mioyo jinyu anoho kuhayahaya, kandi mutava nuvuti mba.

²⁸ Munyi mwahulira lwa ndaamuvolera, ‘Nziza, navuzwa ndirana ku munyi kandi.’ Mulava nimwanyaanza, ngano mwakasangaye kigira nziza ku Baba; kigira aveeye munene ligali kuvita inzi.

²⁹ Inzi mali kumuvolera yaga kalunu imbiri wagakiri kwekoleka, kunangwa lwa gekoleka munyi muduuki kusuuvira.

³⁰ Sinyala komoloma ni munyi kandi ing'inga indambi mba, kigira Mwamihi wikivala yiki yaazaa.” Siaveeye nuvunyari ku inzi mba.

³¹ Navuzwa avumukivala vaduukana kumanya ndi ndayaanza Baba, na nicho kigira ngolaa vuli kindu kuli Baba andagaa ngole. “Singiri, gendi kuzie!”