Yohana 13 - KITABU KITAKATIFU

¹ Liali lidiku lilala lisavo lie Lipasaka nilikikiri kuduuka, Yeso yamanya ndi ing'inga yeeye yokutula mu kivala yiki nu kuzia ku Baba weve iduuki. Yaali ni yayanza avandu veve kazozo, avaveeye mu kivala; yee, yavamanyia ndi yavayanza kuduuka ku keheri.

² Yeso harara na aviigi veve, vaali komesa nivalizaa chukulia cha mugolova. Setani yaali namali kuviika mu mwoyo gwa Yuda muyaayi wa Simoni Esikarioti zing'anagani ziu kuzaama Yeso.

³ Yeso yamanya ndi, Baba weve umali kuviika vindu viosi hasi hi zinguru zizie, kandi yamanya ndi yatura ku Nyasaye kandi yirana ku Nyasaye

⁴ kunangwa, yatura komesa yi viukulia, naviika halovega likoti lilie, navugura itahoro ni yevoha mu kekenge.

⁵ Maku yaazuka amazi mubenzeni natanga kusaaviza virenge via aviigi veve kandi kuveeya ni itahoro ya yaali niyevohi.

⁶ Lwa yaduuka ku Simoni Petero, Petero yamuvolera, “Mwami, ivi wenyaa unzisavize virenge viange?”

⁷ Yeso yamutivulira, “Icha inzi ngolaa kalunu ivi siukimanyi mba, navuzwa ulalakimanye lwinyima.”

⁸ Petero yamuvolera, “Ivi siunyala kunzisaaviza virenge viange kali hakuzu mba!” Yeso yamutivulira, “Nindakusaaviza virenge, sioveeye ni lihambana nainzi mba.”

⁹ Simoni Petero yamutivulira, “Mwami, utasaaviza virenge vieng'ine mba, navuzwa na makono gange nu mutwi kandi.”

¹⁰ Yeso yamuvolera, “Oyo umali kwisinga siaduukanaa kwisaava nitali virenge, kigira umali kuva munifu muviri gwosi. Munyi vosi muveeye avanifu, navuzwa mulala siaveeye munifu mba.”

¹¹ Kigira Yeso yamanya nivwaha ulimuzaama, nicho ichagira navoora, “Munyi simuveeye avanifu vosi mba.”

¹² Lwa yamala kuvasaaviza virenge viavo, yiviika kandi makoti geege niyirana havundu hehe komesa navateeva, “Mumanyirizi icha ndakakola ku munyi?”

¹³ Munyi munangaa “Mwigizi” kandi “Mwami”, munyi muvooraa vulahi kigira mbeeye ndio.

¹⁴ Kunangwa, inzi oveeye Mwami kandi Mwigizi winyu, mali kusaaviza munyi virenge. Munyi kandi gamuduukira musaavizane virenge.

¹⁵ Kigira inzi mali kumuha kimanyiru, na munyi kandi mukore kuli mukoleeye.

¹⁶ Muvooleraa agiligali, mutugwa siaveeye munene ligali kuvita mwami uwamutuga mba. Anoho mutumwa siaveeye munene kuvita uwamutuma.

¹⁷ Kalunu munyi mumanya vindu yivi, muveeye nuvugasu nimuvikola.

¹⁸ “Yaga simbolanga ku munyi vosi mba. Inzi ndaamanya yavo avandatovola. Navuzwa gaduukanaa gadukizwi kuli Amang'oda Matakatifu gavoora, ‘Oyo waalia harara nainzi ugirung'ani kuva musigu wange.’

¹⁹ Inzi muvooleraa yaga kalunu, imbiri wagakiri kwekoleka. Lwa galiekoleka mulakasuuviri inzi niyie waali ho.

²⁰ Muvooleraa agiligali, ku vosi, uvugilira oyo wa inzi nduma, avugiliraa inzi, naye uvugilira inzi avugiliraa oyo uwanduma.”

Yeso aporofetaa lizaamwa lilie

²¹ Lwa Yeso yamala kovora yaga, yaahenda mwoyo navoora, havulavu, “Muvooleraa agiligali, mulala ku munyi alaanzaama!”

²² Aviigi veve vahenzana nivavula kumanya kali hakuzu nivwaha wa Yeso avoora mba.

²³ Mulala ku aviigi, uwa Yeso yaali ni yayanza ligali, yaali naasedemi ku kiritu cha Yeso.

²⁴ Kunangwa, Simoni Petero yasima Yohana, navoora, “Muteeve, nivwaha wavoola?”

²⁵ Mwigizwi oyo yisunda ahimbi ku Yeso, namuteeva, “Mwami, nivwaha?”

²⁶ Yeso yativura, “Oyo wanaambe ketonge chu mugadi cha ndongelizi mu bakuli yu munyu, niyie.” Kunangwa, yavugula ketonge chu mugadi, nadongeliza mu bakuli, naha Yuda, Mwana wa Simoni Esikarioti.

²⁷ Lwa Yuda yaali niyakamara kuvugura ketonge yicho, Setani yamugeriza. Yeso yamuvolera, “Ichawenyaa kokora, kola vwangu!”

²⁸ Navuzwa sihaali ho nu mulala ku avaari komesa, uwamanya kivuni chagira Yeso navoora ndio mba.

²⁹ Kigira Yuda yaali muviiki wa mabese, avalala kuvo vaganagana Yeso ya muvooleraa azie kugura vindu vienyeka mu lisavo, anoho ahaane kindu choosi ku avadaka.

³⁰ Lwa Yuda yaali niyakavugula kedonye chu mugadi, yatura ichova vwangu. Ma vwali vudiku.

Lilago lihia

³¹ Lwa Yuda yaali niyakatula ichova, Yeso yavoola, “Kalunu uvukumi vwu Mwana wa Adamu vuvuuliki, kandi Nyasaye akuminyiywi muye.

³² Niiva uvukumi vwa Nyasaye vuvuulikiyi mu Mwana, kandi ndio Nyasaye naye alalolekiza uvukumi vwu Mwana muye mwene, na alamukuminya vwangu.

³³ “Avana vakekeeke vange, ngikiri ni munyi ku ing'inga engekeeke vuzwa, itigaaye. Mulakanyenye, navuzwa kuli ndavolera avanene va Avayuda, kalunu inzi muvooleraa kandi, ‘Uwanziza munyi simunyala kuzia yo mba!’

³⁴ Kandi kalunu muheezaa lilago lihia: muyaanzane aveene naveene. Kuli wa inzi ndamuyaanza, munyi kandi muyaanzane ndio.

³⁵ Niiva muyaanzana aveene naveene, avandu vosi valamanya ndi munyi muveeye aviigi vange.”

Yeso Yaporofeta ndi Petero alamwambakana

³⁶ Simoni Petero yamuteeva, “Mwami, uzizaa hayi?” Yeso yamutivulira, “Wanzizaa siunyala kononda kalunu mba, navuzwa ulanonda lwinyima.”

³⁷ Petero yamuvolera, “Mwami, kigira ki sinyala kokolonda kalunu? Inzi nzetegeki kukuza naivi!”

³⁸ Yeso yamutivulira, “Hene ligali ulahaana livamwoyo liilio kigira inzi? Ngovolera agiligali, idaywa nikikiri kulagula, ulanyambakana haali kavaga.”