Yohana 12 - KITABU KITAKATIFU

Maria Yavaka Yeso maguta ha Bezani

¹ Madiku sita lilia lie Lipasaka ni likiri kuduuka, Yeso yazia Bezani wa Lazaro yamenya, uwa Yeso yaali nasimugukizi kutura mu vakuzu.

² Vamulombera ichukulia cha mugolova, na Marita yakeleeta komesa. Lazaro yaali mulala ku yavo avaari ni viikaye harara na Yeso komesa.

³ Kunangwa Maria yavugula ijuba ya maguta gafunyaa umwayu, aginaridi enzere aguvuguli vonene. Yavaka virenge via Yeso, na niyeeya virenge zana ni liisu lilie. Inyumba yoosi yekolera mwayu.

⁴ Navuzwa Yuda wa Esikarioti, mulala ku avaari aviigi veve, uyu uwa zaama Yeso, yavoola,

⁵ “Kigira ki amaguta yaga gavuli kugulizwa zidinari mia tatu, na zilahevwa avadaka?”

⁶ Si yavoola yaga kigira yahendera nokovelera avadaka, navuzwa kigira yaali umbiki wa mabese, na kuli yaali mwivi, vuli ing'inga yivaa kutura mu livikiru yilio.

⁷ Navuzwa Yeso yavoola, “Leki mukali oyo ave! Leka aviiki ichaveeye nacho kigira lidiku lie liteevwa liange.”

⁸ Avadaka mulava navo kazozo, navuzwa simulava harara nainzi zing'inga ziosi mba.

Lilohiza mu vwivisu ukwita Lazaro

⁹ Lwa avayuda avanyingi vahulira ndi Yeso aveeye Bezani, vazia yo, sigali kigira Yeso vuzwa, navuzwa kandi vaduuki kolola Lazaro wa Yeso yasimugukiza kutura muvakuzu.

¹⁰ Kunangwa, Avasaalisi vanene valohiza zing'anagani viiti Lazaro kandi.

¹¹ Kigira Lazaro, Avayuda vanyingi vatanga kuvasuura vasaalisi, nivasuuvira mu Yeso.

Yeso yingira mu Jerusalemi nisango enene yi Liguuta

¹² Lidiku lialonda ku, kiduma kenene cha avandu avaari nivaazi mu lisavo lie lipasaka, vahulira ndi Yeso yaazaa Jerusalemi.

¹³ Kunangwa vaavugura zisia zia makindu nivazia kumwaganira, nivakuba isango nivavoora, “Hosana! Agasizwi uyu uzaa mu lieta liu Mwami. Agasizwi Mwami wa Isiraeli.”

¹⁴ Yeso yanyoora kemoli chisukiri kilala, naniina ku kuli Mang'oda Matakatifu gavoora,

¹⁵ “Utatia mba, lidaala lia Jerusalemi! Henza, Mwami woovo yaazaa, yikaye ku kemoli chisukiri.”

¹⁶ Ing'inga yeyo aviigi veve sivamanyiriza vindu yivi viosi mba, navuzwa lwa Yeso yaali niyakakuminywa nilwo lwa vizuliza agaali ni gang'odwa kuye, kandi aga avandu vaali nivamukoleeye.

¹⁷ Kiduma chaali harara naye ing'inga ya yalanga Lazaro kutura mu kilindwa, naamusimugukiza kutura muvakuzu, vavoola agekoleka.

¹⁸ Kivuni chagira kiduma cha avandu vazia kumwaganira, chaali ndi, vahulira vosi ndi Yeso yaali naakori kelolekizu yiki.

¹⁹ Kunangwa, Avafarisayo vavolerana, “Muloraa? Sikunyala kokora kindu choosi mba. Heenzi kuli kivala choosi kimulondaa.”

Avaguriki valala venya kolola Yeso

²⁰ Avaguriki valala avaari harara na avandu vazia Jerusalemi kusigamira Nyasaye mu ing'inga yilisavo yili.

²¹ Kunangwa vazia ku Filipo, mundu wa Bezisaida wi lidaala lia Galilaya, nivavoora, “Mwami, kwenyaa kolola Yeso.”

²² Filipo yazia navolera Andereya, navo vaviri vazia kovoolera Yeso.

²³ Yeso yavavolera, “Ing'inga yu kukuminya Mwana wa Adamu iduuki!

²⁴ Muvooleraa agiligali, enzori yi ingano itigalaa yenyine vuzwa nitagiywi mu marova ma ikuze, itigalaa yeng'ine. Navuzwa niiva ilakuza, yaama ingano inyingi.

²⁵ Uyanzaa livamwoyo lilie alaligotiza, na udunyiraa livamwoyo lilie mu kivala yiki alava ni livamwoyo litahera mba.

²⁶ Uyu wenyaa kundumikira gamuduukira anonde, kandi hoosi ha mbeeye, niho hu mutumikiri wange ava, kandi mundu ku vosi undumikira, Baba wange alamuha uvukumi.

Yeso Yamoloma ku likuza lilie

²⁷ “Kalunu mwoyo gwange gohendaa. Nambole ki? Mbore, ‘Baba, ombonyie ku ing'inga yu vusaliri yiyi?’ Awa, kigira yiki nicho chagira inze ninziza kunangwa nduuki kuvitira mu ing'inga yu vusaliri yiyi.

²⁸ Baba, ukuminyi lieta liilio!” Maku mwoyo gwamoloma kutura mwigulu, “Mali kulikuminya kandi ndaalikuminya.”

²⁹ Kiduma cha avandu avaari nivasingiyi ahene yaho vahulira mwoyo yigwo, na valala kuvo vavoola ndi liali lihiligana lie inguba, na vandi navo nivavoora, “Engelosi amolomi naye!”

³⁰ Navuzwa Yeso yavativulira, “Mwoyo yigu siguuzi kigira inzi mba, navuzwa kigira munyi.

³¹ Kalunu ni ing'inga yi likalagirwa lia avumukivala yiki. Kalunu Mwamihi munene wikivala yiki alakungwa.

³² Lwa ndigingwa igulu ku musalaba nu kuhilwa mwigulu kutura mu kivala, ndang'usa avandu vosi sa mulala vaze ku inzi.”

³³ Yavoola yaga kuvamanyia ni likuza ki lia alikuza.

³⁴ Kunangwa, kiduma yicho cha mutivulira, “Kunyi kovoolerwa ni Lilaga lietu ndi Mesia alamenya ni kunyi mihiga ni mihiga. Unyala ndi, kovora Mwana wa Adamu adukanaa kuhilwa mwigulu? Nivwaha Mwana wa Adamu uyu?”

³⁵ Yeso yavavolera, “Uvulavu vukikiri ni munyi ku ing'inga engekeeke. Gendi lwa mukikiri mu vulavu yivu kunangwa; kisundi kivuli kumunyoola, kigira ogendaa mu kisundi siamanyi wazizaa mba.

³⁶ Kunangwa, ing'inga yamukikiri nuvulavu, musuuviri mu vuvulavu muduuki kuva avana vu vulavu.” Inyima wokovoola amakuva yaga, Yeso yazia niyivisa mwene kutura kuvo.

Livula kusuuvira lia avandu

³⁷ Kali niiva yakola vilolekizu vinyingi yivi viosi imbiri wavo, si vamusuuvira mba,

³⁸ na ndio amakuva gu muporofeti Isaya gavoora gaduuki kuduukizwa: “Mwami, nivwaha wasuuvira livoora lia amakuva giitu? Kandi, nivwaha wavuulirwa zinguru ziu Mwami?”

³⁹ Kunangwa si vaali vanyara kusuuvira mba. Isaya yavoola kandi

⁴⁰ “Nyasaye umali kuvakuliza zimoni ziavo; kandi umali kudinyia mioyo jaavo gase valalola ni zimoni ziavo kandi vamanye ni mioyo jaavo, ma viganire, nainzi nduuki kuvahonyie.”

⁴¹ Isaya yavoola vindu yivi kigira yalora uvukumi vwa Yeso, kandi navoora amakuva geege.

⁴² Kali ndio, avanyingi ku avanene va Avayuda vasuuvira mu Yeso. Navuzwa, kigira liitia Avafarisayo, si viyama havulavu ndi vamusuuvira mba, gase valakungwa mulisinagogi.

⁴³ Vayaanza lizominywa na avandu kuvita lizominywa na Nyasaye.

Makuva ga Yeso galakakalagiri vandu

⁴⁴ Kunangwa Yeso yahanzuka nu mwoyo munene navoora, “Mundu usuviraa mu inzi, siasuviraa inzi zieng'ine, navuzwa asuviraa uyu uwanduma kandi.

⁴⁵ Olola inzi alolaa kandi oyo uwanduma.

⁴⁶ Inzi mali kuuza mu kivala kuli uvulavu. Kunangwa mundu kuvoosi usuviraa mu inzi avuli kutigala mu kisundi.

⁴⁷ Uhulira amakuva gange, navuzwa navula kugagumira, inzi si mukalagiraa mba, kigira sindaaza kukalagira avumukivala, navuzwa kuvahonyia.

⁴⁸ Uyu usulaa inzi kandi siagumira makuva gange, aveeye numukalagi. Amakuva gandavoola galava umukalagi weve mu lidiku lie keheri.

⁴⁹ Inzi simbolaa kuvunyali vwange mwene, navuzwa Baba wanduma niyie uwaamba aga ndukanaa mbore kandi molome.

⁵⁰ Inzi manyi ndi lilago lilie liletaa livamwoyo litahera mba. Kunangwa, inzi mboraa vuzwa aga Baba yambolera mbore.”