Yohana 10 - KITABU KITAKATIFU

¹ Yeso yavoola, “Muvooleraa agiligali, mundu ku vosi uvula kwingilira mu kirivwa che ekego cha magondi, navuzwa afudula ma yingilira halovega, uyu aveeye mwivi kandi mwiguliri.

² Navuzwa mundu wingilira mu kirivwa, oyo niyie mwayi wamagondi.

³ Mulindi wi kirivwa amwiguliraa, kandi magondi gahulira mwoyo gwigwe lwa alaangaa sia lilala ku lieta lialio, ma agimiliraa kugatuliza ichova.

⁴ Lwa amala kugatuliza ichova, yimira imbiri wago nago gamulonda, kigira gaamanya mwoyo gwigwe.

⁵ Amagondi yaga si ganyala kolonda mugeni mba, nitali gamwiruka kigira sigamanyi mwoyo gwu mugeni oyo mba.”

⁶ Yeso yavavolera lugano yilu, navuzwa yavo si vamanya icha yavavolera mba.

Yeso aveeye mwayi mulahi

⁷ Kunangwa, Yeso yavavolera kandi, “Muvooleraa, agiligali, inzi ni kirivwa cha magondi.

⁸ Avandu vosi avaazaa imbiri wange naviivi kandi aviguliri, navuzwa magondi sigavahulira mba.

⁹ Inzi mbeeye kirivwa. Ku vosi uwingira kuvitira ku inzi alahonywa; alingira kandi atuli ichova kandi alanyoola vwayiru.

¹⁰ Mwivi yaza vuzwa kigira ukwiva, ukwita nu kudiviza. Inzi ndaaza kunangwa amagondi gange gaduuki konyoora livamwoyo, kandi valinyoole linyingi ligali.

¹¹ “Inzi mbeeye mwayi mulahi. Mwayi mulahi ahaanaa livamwoyo lilie kigira amagondi geege.

¹² Mundu utungwa siaveeye mwayi mwene amagondi. Lwa alolaa kivwi nikizaa alekaa amagondi ma yiruka. Kigira si gaveeye ageege mba. Kunangwa lwa kivwi kigwizaa ku lilala agandi gasalana.

¹³ Oyo yiruka kandi siahenderaa amagondi yago mba kigira aveeye mundu wu kutungwa vuzwa.

¹⁴ “Inzi mbeeye mwayi mulahi, kandi manyi avaveeye avange, navo avaveeye avange, vamanya inzi,

¹⁵ Kuli Baba amanya inzi, kandi ndio, inzi manya Baba kandi mbana livamwoyo liange kigira amagondi gange.

¹⁶ Mbeeye kandi na amagondi gandi amanyingi agataveeye gu mu kego yiki. Kuduuka ngaleete kandi. Nago kandi galahulira mwoyo gwange, na galava chayo kilala nu mwayi mulala.

¹⁷ “Kivuni kigiranga Baba nanyaanza keveeye kigira inzi mbugilira kuhaana livamwoyo liange, kunangwa nduuki kulinyoola kandi.

¹⁸ Siaveeye nu mundu unyala kunyagalivamwoyo liange; inzi mwene nzihaanaa. Mbeeye nu vunyali vwu kwihana mwene kwitwa, kandi vunyali vwu kuva mwoyo kandi. Yaga nigo aga Baba yandaga kokora.”

¹⁹ Liali ho ni liavukana kandi hagati ha Avayuda kigira amakuva gene yaga.

²⁰ Avanyingi kuvo vavoola, “Aveeye ni lidemoni; kandi nu mulalu! Kigira ki mu muhulirizaa?”

²¹ Navuzwa avandi vavoola, “Yaga sigaveeye amakuva gu mundu oveeye ni lidemoni mba. Lidemoni linyala kwigura zimoni zia avavoku?”

Yeso Yasuulangwa na Avayuda

²² Muku liali ho lisavo liu kusaalisa Litembeli mu Jerusalemi. Ing'inga yeyo yaali yu vukindu.

²³ Yeso yaali nagenda mu Litembeli, mu lusimbu lwa Solomoni.

²⁴ Kunangwa Avayuda vamukumbiriza, nivamuteeva, “Ulavika mioyo jietu mulihayahaya kuduuka ng'inga ki? Niiva ivi niyie Mesia, kovolere agiligali.”

²⁵ Yeso yavativulira, “Inzi ndaamuvolera, navuzwa munyi simwasuuvira mba. Miyinzi ja ngolaa ku lieta lia Baba wange jindolekizaa.

²⁶ Navuzwa munyi si musuuviraa mba, kigira simuveeye magondi gange mba.

²⁷ Amagondi gange gahulira mwoyo gwange; inzi ngamanyi, nago ganondaa.

²⁸ Inzi ngahezaa livamwoyo litahera mba, na sigalidiva kali hakuzu mba. Avula ho mundu unyala kunyaga kutura mu makono gange.

²⁹ Baba wange uwaamba amagondi yaga aveeye munene kuvita vosi, na avula ho unyala kugatuliza mu makono ga Baba.

³⁰ Inzi na Baba wange, koveeye kindu kilala.”

³¹ Maku Avayuda vaavugura amagina vamulase kandi.

³² Yeso yavavolera, “Mali kumumanyia miyinzi minyingi milahi kutura ku Baba. Ni guliha ku yijo gwa munyalagia mundase amagina?”

³³ Avayuda vaamutivulira, “Sikukulasaa amagina kigira miyinzi milahi, navuzwa kigira linyega Nyasaye. Ivi wekolaa mwene kuva Nyasaye, navuzwa oveeye mundu vuzwa.”

³⁴ Yeso yavativulira, “Sigang'odwa mu Lilaga lienyu ndi Nyasaye yavoola, ‘Munyi muveeye avanyasaye?’

³⁵ Nyasaye yalanga avandu yavo, avanyasaye, avandu va yaaha likuva lilie, na kunyi kumanyi ndi Mang'oda Matakatifu gavoora agiligali kazozo, na siganyala kuvunagwa mba.

³⁶ Ku lwa inzi Baba yandovola kandi naanduma mu kivala. Kunangwa munyala kovora ndi, ‘Ivi onyegaa Nyasaye?’ Gaveeye kigira ndavoora, ‘Inzi nu mwana wa Nyasaye?’

³⁷ Niiva singolaa miyinzi ja Baba wange, mutasuuviri mba.

³⁸ Navuzwa niiva ngolaa miyinzi, kali naiva si musuuviraa inzi musuuviri mu miyinzi yijo muduuki kumanya nukumanyiriza ndi Baba aveeye mu inzi, ninzi mbeeye muye.”

³⁹ Vageriza kandi kumugumira, navuzwa yazonoka mu makono gaavo.

⁴⁰ Maku Yeso yazia kandi engereka wu mugera gwa Jorodani, havundu ha Yohana yabatiziraa kutanga; kandi yamenya yo.

⁴¹ Avandu vanyingi vazia kuye nivavoora, “Yohana si yakola kelolekizu choosi mba. Navuzwa goosi aga Yohana yavoola ku mundu uyu gaveeye agiligali.”

⁴² Avandu vanyingi, havundu yaho vasuuvira muye.