Yohana 1 - KITABU KITAKATIFU

Likuva lie livamwoyo

¹ Lirova nilikikiri kolombwa, liali ho Likuva, kandi likuva zana liali harara na Nyasaye, kandi likuva liali Nyasaye.

² Kutura mulitanga Likuva liali harara na Nyasaye.

³ Nyasaye yalomba vindu viosi kuvitira muye. Sichaaliho ni kindu kali kilala ku vilombe viosi, ichalombwa vugira Ye.

⁴ Likuva liali uvutangiliru vwi livamwoyo. Livamwoyo yili lialeta ku avandu.

⁵ Uvulavu yivu vwakaa mu kisundi, navuzwa kisundi kikiri kuvuguuta kali hakuzu.

⁶ Nyasaye yatuma mutumwa weve, mundu uwalangwa Yohana,

⁷ yaza kuli mulolekizi, alolekize vulavu yivu, kunangwa avandu vosi vaduuki kusuuvira kuvitira muye.

⁸ Oyo siyaali uvulavu, navuzwa yaza kulandiza uvulavu yivwo.

⁹ Yivwo nivwo uvulavu vwi ligali; uvulavu vuzaa mu kivala kwaaka ku vuli mundu.

¹⁰ Likuva liali mu lirova, kandi muye Nyasaye yalomba lirova, navuzwa lirova, siliamumanya mba.

¹¹ Yaza mu kivala chiche mwene, navuzwa avandu veve sivamuvugilira mba.

¹² Navuzwa ku yavo vosi avamuvugilira kandi avaasuuvira muye, yavaha uvunyali kuva avana va Nyasaye.

¹³ Yava sivaveeye avana va Nyasaye ku liivulwa lia masahi, anoho kuzingulu ziu muviri, anoho kuvulaliri vwa avandu, navuzwa ku vulaliri vwa Nyasaye.

¹⁴ Likuva liagwa mundu, namenya hagati hiitu; niyizuuyi zimbavasi na agiligali. Nakunyi kumali kolola uvukumi uvwa yanyoora kuli vwu muyaayi muderwa wa Baba.

¹⁵ Yohana yamulolekiza ku avandu nahanzuka, “Uyu niye wandamuvoolera lwa ndavoora, uza inyima wange, aveeye munene ligali kumbita, kigira yaali ho ningikiri kwivulwa.”

¹⁶ Kuturana kuvudukiru vwi zimbavasi zizie, umali kukugasiza kwosi, naakohezaa ligasizwa kazozo.

¹⁷ Nyasaye yahaana Lilaga kuvitira ku Musa, navuzwa zimbavasi na agiligali viaza kuvitira mu Yeso Kristo.

¹⁸ Siaveeyeho nu mundu kali mulala uwalola Nyasaye mba. Mwana muderwa wa Nyasaye yeng'ine, oveeye ku kiritu cha Baba, umali kumuvuura.

Lilwaza lia Yohana Mubatizi

¹⁹ Yili nilio, lilolekiza lia Yohana, lwa aviimiliri va Avayuda vatuma avasaalisi na vandu va Levi kutura Jerusalemi vazie koteeva Yohana ndi “Ivi nivwaha?”

²⁰ Yohana siyasuura kuvativulira, navuzwa yiyama havulavu navoora, “Inzi simbeeye Mesia mba.”

²¹ Vamuteeva, “Kunangwa ivi nivwaha? Ivi ni Elija?” Yohana yativura, “Awa, inzi simbeeye niye mba.” Vamuteeva, “Ivi oveeye muporofeti?” Yavativulira, “Awa!”

²² Navo vamuteeva, “Kunangwa, ivi nivwaha? Okohe mativuli kwilanyiri yavo avakutumi. Ivi mwene ovola ki?”

²³ Yohana yavativulira, “Inzi niyie wu muporofeti Isaya yavoola amakuva geege: ‘Mwoyo gwu mundu guhanzukaa mwigendanyama; Lungikizi inzira yu Mwami.’ ”

²⁴ Avandu yavo vaali nivatumiywi na Avafarisayo.

²⁵ Maku, vateva Yohana, “Niiva ivi sioveeye Mesia kinga Elija, anoho muporofeti, kigira ki ubatizaa?”

²⁶ Yohana yavativulira, “Inzi mbatizaa namazi, navuzwa hagati hinyu asingiyi mulala wa munyi mutamanyi.

²⁷ Oyo yazaa inyima wange, navuzwa inzi sindukani kali kovoholora migoye ji vilatu vivie mba.”

²⁸ Yaga goosi gekoleka ha Bezani, ku lwangereka lwi ivugwi wu mugera gwa Jorodani uwa Yohana yaali nabatiziraa.

Yeso Mwana wi Ligondi lia Nyasaye

²⁹ Lidiku lialonda ku, Yohana yalora Yeso niyazaa kuye, kandi yavoola, “Henza, uyu niye Mwana wi ligondi wa Nyasaye utuliza vwoni vwa avumukivala!

³⁰ Uyu niye wa ndaamuvolera lwa ndavoora, ‘Inyima wange, yazaa mundu mulala oveeye munene ligali kumbita, kigira yaali ho ningikiri kwivulwa.’

³¹ Inzi mwene sindamanya alava vwaha, navuzwa ndaaza nimbatizaa na mazi, kunangwa nduuki kumukola amanyikane ku avandu va Isiraeli.”

³² Yohana yahaana lilolekiza yili, “Ndaalora Roho niyiika kutura Mwigulu kuli likuulu kandi niyikara kuye.

³³ Inzi sindamumanya oyo niye, navuzwa Nyasaye uwanduma kubatiza avandu na mazi, yaali niyamboleye ndi ‘Mundu wo olola Roho niyazaa kuye kutura mwigulu nu kwikala kuye, uyu niyie ubatizaa na Roho Mutakatifu.’

³⁴ Mali kolola kandi muvooleraa ndi aveeye Mwana wa Nyasaye.”

Aviigi va Yeso vu kutanga

³⁵ Lidiku lialonda ku, Yohana yaali kandi hazana harara na aviigi veve vaviri.

³⁶ Lwa yalora Yeso navitaa, yavoola, “Henza! Uyu niye Mwana wi Ligondi lia Nyasaye.”

³⁷ Lwa Aviigi vaviri yavo vahulira Yohana navoora ndio, valonda Yeso.

³⁸ Yeso yikivuka nalora aviigi zana nivamulondaa. Yavateva, “Mwenya ki?” Navo vaamutivulira, “Rabi, ivi omenyi hayi?”

³⁹ Yeso yavavolera, “Hambi mulole.” Aviigi yavo vaza, nivalora ha yamenya, nivahonga naye lidiku liosi. Yaali nidukaa saa komi zia ha mugolova.

⁴⁰ Mulala ku aviigi vaviri yavo vaali Andereya amwavo Simoni Petero.

⁴¹ Nonoho yanyoora amwavo weve Simoni ma namuvolera, “Konyooye Mesia.”

⁴² Kunangwa yaleeta Simoni ku Yeso. Yeso yahenza Simoni navoora, “Ivi oveeye Simoni mwana wa Yohana. Kalunu ulalangwa Kefa.”

Yeso alaangaa Filipo na Nazanieli vamulonde

⁴³ Lidiku lialonda ku Yeso yatovola kuzia Galilaya. Yanyoora Filipo, namuvolera, “Hamba ononde.”

⁴⁴ Filipo yaatulaa Bezisaida, lidaala lia Andereya na Petero.

⁴⁵ Filipo yanyoora Nazanieli namuvolera, “Konyooye mulala wa Musa yang'oda kuye mu kitabu chi Lilaga, kandi avaporofeti vang'oda kuye. Aveeye Yeso mwana wa Josefu, wa Nazareti.”

⁴⁶ Naye Nazanieli yateeva Filipo, “Kindu kilahi kinyala kutura Nazareti?” Filipo yamuvolera, “Hamba olole.”

⁴⁷ Lwa Yeso yalora Natanaeli niyazaa kuye, yavoola, “Heenzi, uyu aveeye Muisiraeli wiligali, sikeveeye ho ni kindu chuvugadi muye mba!”

⁴⁸ Naye Nazanieli yamuteeva, “Umanyi ndi?” Yeso yamutivulira, “Nukikiri hasi hu musaala gwu mukuyu, kali Filipo nakiri kukulanga, ngololi.”

⁴⁹ Nazanieli yamutivulira, “Mwigizi, ivi niyie Mwana wa Nyasaye! Ivi oveeye Mwami wa Isiraeli!”

⁵⁰ Yeso yamuvolera, “Ivi usuuviyi kigira ngovoleeye ndi ngololi hasi hu Musaala gwu Mukuyu? Ulalola vindu vinene kuvita yivi ligali.”

⁵¹ Yeso yaazizagilira kovora, “Agiligali muvooleraa, Mulalora ligulu niliguliywi nizingelosi va Nyasaye nivanina nu kwika kutura ku Mwana wa Adamu.”